ރާއްޖޭގައި މިހާރު ކުރިޔަށްދާ އިންޑިއާ އައުޓު ހަރަކާތަކީ ހުރިހާ ގޮތަކުން ބެލި ކަމުގައި ވިނަމަވެސް ފަހަކަށް އައިސް ރާއްޖޭގެ ފަސްގަޑުގައި އިންޑިއާ ސަރުކާރާ ދެކޮޅަށް ހިންގޭ އެންމެ ބޮޑު އެއް ސިޔާސީ ހަރަކާތެވެ. އަދި މި ހަރަކާތުގެ ތެރޭގައި އިންޑިއާ ސަރުކާރުގެ މައްޗަށް ސިޔާސީ ގޮތުންނާއި އަދި އެނޫން ގޮތްގޮތުންވެސް ބޮޑެތި ތުހުމަތުތައް ކުރެވި، އިންޑިއާއިން ރައްޖޭގެ މިނިވަންކަން ނިގަޅައިގެންފައިވާ ކަމުގެ ތުހުމަތުތައްވެސް އިދިކޮޅު ސިޔާސީ ފަރާތްތަކުން ދަނީ ކުރަމުންނެވެ.

އަދި މި ތުހުމަތުތައް އިދިކޮޅު ސިޔާސީ ހުރިހާ ގިންތިއެއްގެ މީހުން ކުރަމުންދާއިރު، އެންމެ ބޮޑަށް ފާހަގަ ވެގެން ގޮސްފައިވާ އެއް ކަމަކީ، އިދިކޮޅު ލީޑަރު، ރައީސް ޔާމިން ޖަލު ހުކުމުން ސަލާމަތްވެ، ޕީޕީއެންއިން ބޭއްވި ބޮޑު ޖަލްސާގައި، ރާއްޖޭގައި ތިބި އިންޑިއާ ސިފައިންނަށް ދިން އިޒާރުތަކާއި، އަދި އިންޑިއާ ސަރުކާރުގެ މައްޗަށް އިދިކޮޅު ލީޑަރު ކުރެއްވި ބޮޑެތި ތުހުމަތު ތަކެވެ.

މި ގޮތުން މިޖަލްސާގައި އިންޑިއާ އަސްކަރިއްޔާ ރާއްޖެއިން ފައިބަން ޖެހޭނެކަމަށް ވިދާޅުވަމުން ރައީސް ޔާމިންވަނީ، އިންޑިއާއިން ރާއްޖޭގެ މީޑިއާތަކަށް ފައިސާދީ، ރާއްޖޭގައި ހިންގާ ގިނަ ނޫސްތައް ރާއްޖޭގައި ހުންނަ "އިންޑިއާ އެމްބަސީގެ ދަށުގައި" ވާކަމަށް ވިދާޅުވެ، އިންޑިއާ އެމްބަސީގެ މައްޗަށް ބޮޑެތި ތުހުމަތުތަކެއް ކުރައްވާފައެވެ.

ދެން އެހުރިހާ ނޫސްވެރިން އެތިބީ އިންޑިއާގެ މިތާ ހުންނަ އެމްބަސީން ފޮނުވާ ލާރިކޮޅު ނަގައިގެން އެމީހުން އެތިބެނީ، ނޫސްވެރިކަމުގެ މިނިވަންކަމެއް ރާއްޖެއަކު ނެތް.

ޕީޕީއެމްއިން އެންމެ ފަހުން ބޭއްވި، އެޕާޓީއަށް ސަޕޯޓުކުރާ ގިނަބަޔަކު ހާޒިރުވި ޖަލްސާގައި ވާހަކަ ދައްކަވަމުން ރައީސް ޔާމިން ވިދާޅުވެފައި ވެއެވެ.

ޑިމޮކްރަސީގެ 4ވަނަ ބާރަށް ބޮޑު ތުހުމަތެއް!

މިނިވަން ނޫސްވެރިކަމަކީ ޑިމޮކްރަސީގެ 4ވަނަ ބާރެވެ. އަދި އެއީ މިނިވަން ޑިމޮކްރަސީއެއްގައި މުޅި ދައުލަތް ޒިންމާދާރު ކުރުވޭ ހާލަތުގައި އޮންނަ ހަމައެކަނި ބާރުވެސް މެއެވެ.

އެހެންކަމުން، ދައުލަތުގެ ތެރޭގައި ހިގާ ނޭއްގާނީ ކަންތައްތަކާއި، އަދި ދައުލަތުގެ ވެރިންނާއި ސިޔާސީ އެކިއެކި ފަރާތްތައް ޒިންމާދާރުކޮށް، ހަމަމަގަށް އެޅުވުމުގެ ވަރަށް ބޮޑު ޒިންމާއެއް އަބަދުވެސް މީޑިއާތަކުން އުފުލަން ޖެހެއެވެ.

އެހެންނަމަވެސް، ރާއްޖޭގައި ހިގަމުންދާ ސިޔާސީ ތަޅާފޮޅުމާއި، އެއްބަޔަކު އަނެއް ބައެއްގެ މައްޗަށް ކުރެވެމުންދާ ތުހުމަތު ތަކުގެ ތެރޭގައި މީޑީއާގެ މައްޗަށްވެސް އަބަދުވެސް ތަފާތު ތުހުމަތުތައް ކުރެވި، އަދި މީޑިއާ އެކިއެކި ނުފޫޒުތަކުގެ ދަށުވެފައި އޮންނަ ކަމުގެ ތުހުމަތުތަކަކީވެސް އަބަދުވެސް ކުރެވެމުންދާ ތުހުމަތުތަކެވެ.

އެހެންނަމަވެސް، ބޭރުގައުމަކުން ރާއްޖޭގެ މީޑިއާތަކަށް ރިޝްވަތު ދޭކަމުގެ ތުހުމަތުތަކާއި، އަދި ވަކީން ޚާއްސަކޮށް ރާއްޖޭގައި ހުރި ބޭރު ގައުމެއްގެ އެމްބަސީއަކުން ރާއްޖޭގެ މީޑިއާތައް "ހިސޯރުކޮށްފައި" އޮންނަކަމުގެ ތުހުމަތަކަކީ، މިބީދައިން މީގެ ކުރިން ކުރެވިގެން ގޮސްފައިވާ ތުހުމަތުތަކެއް ނޫންކަން ފާހަގަ ކޮށްލަން ޖެހެއެވެ.

ޕީޕީއެމްއިން އެންމެ ފަހުން ބޭއްވި އެޕާޓީގެ ބޮޑު ޖަލްސާގައި ރައީސް ޔާމިން ވިދާޅުވި ގޮތުގައި ރާއްޖޭގައި މިނިވަންކަމާއެކު ހިގަމުންދަނީ "އޮންލައިން" ބައެއް މީޑިއާތައް އެކަންޏެވެ. އަދި ވަކި ގޮތަކަށް އާޓިކަލްތައް ލިޔެ، ވަކި ބަޔަކު ބޭނުންވާ ގޮތަކަށް ނޫސްތަކުގައި ރިޕޯޓް ކުރަމުންދާކަމީ މިނިވަން ނޫސްވެރިކަމެއް ނޫންކަމަށް ވިދާޅުވަމުން، ރައީސް ޔާމީން ވިދާޅުވީ އެމަނިކުފާނު ވެރިކަމުގައި، ނޫސްވެރިންނަށް ބިރުދައްކައި، މިނިވަން ނޫސްވެރިކަމަށް ހުރަސް އަޅާފައި ނުވާނެކަމަށެވެ. ނަމަވެސް މިއަދު ވެރިކަމުން ފެނިގެންދަނީ ނޫސްވެރިކަމުގެ މިނިވަންކަން ނަގާލައި ޖާނަލިސްޓުން ކޮންޓްރޯލް ކޮށްގެން ނޫސްތަކުގައި ލިޔަމުންދާ ތަން ކަމަށްވެސް މި ޖަލަސާގައި ރައީސް ޔާމިން ވިދާޅުވެފައި ވެއެވެ.

މިސަރުކާރުގެ އޮންލައިން ނޫސްތައް އެކަނި މިނިވަންކަމާއެކީ ލިޔަނީ، ހުރިހާ އެހެން ނޫސްތައ އެހެރީ ސަރުކާރުގެ ޖީބުގަ އެހެރީ. މިތާކު ނެތް މިނިވަން ކަމެއް. މިތާކު ނެތް ފްރީޑަމް އޮފް އެކްސްޕްރެޝަންއެއް. މިތާކު ނެތް މިނިވަން ޖާނަލަޒިމަމްއެއް.

ރައީސް ޔާމިން ވިދާޅުވެފައި ވެއެވެ.

ކޮންމެއަކަސް، ރާއްޖޭގެ ގިނަ މީޑިއާތައް ރާއްޖޭގައި ހުންނަ އިންޑިއާ އެމްބަސީގެ ދަށުވެފައިވާ ކަމުގެ ތުހުމަތު އިދިކޮޅު ލީޑަރު ކުރައްވާފައިވާއިރު، ރާއްޖޭގައި ހުންނަ އިންޑިއާ އެމްބަސީން ދާދިފަހުންވަނީ، އެގައުމާ ދެކޮޅަށް ރާއްޖޭގެ ބައެއް މީޑިއާތަކުން ނަފްރަތު އުފައްދަމުން ދާކަމުގެ ތުހުމަތު ކޮށް، އެފަދަ ނޫސްތަކާ ދެކޮޅަށް ފިޔަވަޅު އަޅައިދިނުމަށް ދިވެހި ސަރުކާރުގެ ކިބައިން ރަސްމީކޮށް އެދިފައެވެ. އަދި ރާއްޖޭގައި ތިއްބަވާ އިންޑިއާގެ ޑިޕްލޮމެޓިކް އޮފިޝަލުންގެ ރައްކާތެރިކަން ކަށަވަރު ކޮށްދިނުމަށްވެސް ދިވެހި ސަރުކާރުގެ ކިބައިން އިންޑިއާ ސަރުކާރުން އެދިފައި ވެއެވެ.

ސޯޝަލް މީޑިއާގެ ބައެއް ވަސީލަތްތަކުގައާއި އަދި ބައެއް ނޫސްތަކުގައި އެގައުމާ ދެކޮޅަށް ނަފްރަތު އުފެއްދުމަށް މަސައްކަތް ކުރާކަމުގެ ތުހުމަތު އިންޑިއާ އެމްބަސީން ކޮށްފައިވަނީ، ރާއްޖޭގައި ހުންނަ އިންޑިއާ  އެމްބަސީގެ އިސް އޮފިޝަލަކާއި ގުޅޭގޮތުން އިދިކޮޅު ސިޔާސީ ހަރަކާތަށް ތާއީދު ކުރާ ނޫހެއްގައި ލިޔުނު އާރޓިކަލްއަކާއި ގުޅިގެންކަން ފާހަގަ ކޮށްލެވެއެވެ. އެއަށްފަހު ފޮރިންގ މިނިސްޓްރީންވަނީ، ރާއްޖޭގައި ތިއްބަވާ ބޭރުގައުމުތަކުގެ ޑިޕްލޮމޭޓުންނާ މެދު ނަފްރަތު އުފެއްދުމަށް އެއްވެސް މީޑިއާއަކުން މަސައްކަތް ނުކުރުމަށް އިލްތިމާސްވެސް ކޮށްފައެވެ.

އިންޑިއާ ހައިކޮމިޝަންގެ މައްޗަށް ބޮޑު ތުހުމަތެއް! ހައިކޮމިޝަން ހަނު!

ޕީޕީއެމް އިން އެންމެ ފަހުން ބޭއްވި ބޮޑު ޖަލްސާގައި، ރާއްޖޭގައި ހުންނަ އިންޑިއާ ހައިކޮމިޝަންގެ މައްޗަށް އިދިކޮޅު ލީޑަރު ކުރެއްވީ ކުޑަ ތުހުމަތެއް ކަމުގައި ދެންނެވޭކަށް ނެތެވެ. ރާއްޖޭގައި ހުންނަ ބޭރު ގައުމެއްގެ އެމްބަސީއަކުން ރާއްޖޭގެ ނޫސްތަކަށް ރިޝްވަރު ދޭކަމުގެ ތުހުމަތަކީ ކުޑަ ތުހުމަތަކަށް ނުވާނެތީއެވެ.

އަދި ވަކީން ޚާއްސަކޮށް މިފަދަ ތުހަމަތެއް އިދިލޮޅު ލީޑަރު އާންމު އެއްވުމެއްގައި ކުރެއްވުމުން އެއީ އާދައިގެ ތުހުމަތަކަށްވުރެ ސީރިއަސް ތުހުމަތަކަށް ވެގެން ދޭވެސްމެއެވެ.

އެހެންނަމަވެސް، ރައީސް ޔާމިން އިންޑިއާ ހައިކޮމިޝަންގެ މައްޗަށް ކުރި މި ތުހުމަތާއި ގުޅޭގޮތުން އިންޑިއާ ހައިކޮމިޝަންއިން އެއްވެސް ކޮމެންޓެއް، ނުވަތަ ޖަވާބެއްވެސް މިހާތަނަށް ދީފައެއް ނުވެއެވެ. ހައިކޮމިޝަން އޮތީ ހަނުއެވެ. މިއީ ދޮގެއްކަންވެސް އަދި ތެދެއްކަންވެސް އިންޑިއާ ހައިކޮމިޝަންއިން ހާމަ ކޮށްދީފައެއް ނުވެއެވެ.

އެހެންނަމަވެސް ސާފުކޮށް އެގެން އޮތް ކަމަކީ، ދިވެހި މީޑިއާތައް ބޭރުގެ ގައުމެއްގެ ދަށުވެފައި އޮތް ކަމުގެ ތުހުމަތު އިދިކޮޅު ލީޑަރު ކުރެއްވުމުން، މިއީ ތެދެއްތޯ އަދި ދޮގެއްތޯވެސް ކަށަވަރު ކުރުމެއް ނެތި، މިތުހުމަތު ހެޔޮހިތުން ގަބޫލުކޮށް، މިކަމުގެ މައްޗަށް ގިނަ ބައެއްގެ ހިތުގައި ނަފްރަތުގެ ހުޅު އިތުރަށް ރޯވެގެން ދާނެކަމެވެ. ރާއްޖޭގެ އެކި ކަންކޮޅުތަކުގައި މިހާރުވެސް ކުރިޔަށްދާ އިންޑިއާ އައުޓް ހަރަކާތުގެ ތެރެއިން އިންޑިއާ ސަރުކާރުގެ މައްޗަށް އެތައް ބައެއްގެ ހިތްތަކުގައި އުފެދިގެން ގޮސްފައިވާ ނަފްރަތާއި ރުޅިވެރިކަމުގެ މައްޗަށް އިތުރު ނަފްރަތާއި ރުޅިވެރިކަން އުފެދިގެން ދިއުން ނޫން އެހެން ނަތީޖާއެއް ނުނިކުންނާނޭ ކަމީ ކަށަވަރުވެ ޔަގީންވާ ކަމެކެވެ.

އަދި ވަކީން ޚާއްސަކޮށް، ރާއްޖޭގެ ޑިމޮކްރަސީގެ 4 ބާރު، ދުނިޔޭގެ ބޮޑު ބާރެއްގެ ނުފޫޒުގެ ދަށުވެފައި އޮތްކަމަށް މިކުރެވުނު ތުހުމަތު ހަގީގަތް ސާފުވެގެން ދިއުމަކީ، ދިވެހި ޑިމޮކްރަސީއަށްޓަކައިވެސް ކޮންމެހެންވެސް މުހިންމު ކަމެއްކަމުގައި ވެސް މުފުރުސަތުގައި ދަންނަވަން ޖެހެއެވެ.