މިނިވަން ނޫސްވެރިކަމަށް ހުރަސް އަޅަނީ ދަމާ ގެންގޮސް ހައްޔަރުކޮށްގެން އެކަންޏެއް ނޫން ކަމުގައި ކުރީގެ ބަންޑާރަ ނައިބް ދިޔާނާ ސައީދު ވިދާޅުވެއްޖެއެވެ.

ރާއްޖޭގައި މިހާރު މިނިވަން ނޫސްވެރިކަމެއް ނެތްކަމަށް ރައީސް ޔާމީން ރޭ ވިދާޅުވެ ދެއްކެވި ވާހަތަކާއި ގުޅިގެން "މިހާރު" ނޫހުގައި ލިޔެފައިވާ އާޓިކަލްއަށް ފާޑުވިދާޅުވެ ދިޔާނާ ވިދާޅުވީ ނޫސްވެރިންނަށް ހުރަސް އެޅުމަކީ ހަމައެކަނި ދަމާގެންގޮސް ޖަލަށް ލައިގެން ހައްޔަރުކޮށްގެން ކުރާ ކަމެއްނޫންކަމަށެވެ.

މިއަދު ނޫސްވެރިންނަށް ނުފޫޒު ފޯރުވުމުންދަނީ މީޑިއާ ހިންގަމުންދާ މީހުންނާއި ގުޅުންހުރި މީހުންނަށް ބޮޑެތި ވަޒީފާތައްދީ، ބޮޑެތި މަޝްރޫޢުތައް އެބޭފުޅުންނަށް ހޯދައި އެކަންކަން ކޮށްދެމުން ކަމަށެވެ. މީޑިއާތަކުގައި ހުންނަ މީހާ ނަގައިގެން ގެންގޮސް ބަންދު ކުރުމެކޭ މިކަމެކޭ އެއްވެސް ތަފާތެއް ނެތްކަމަށް ދިޔާނާ ވިދާޅުވިއެވެ.

މިނިވަން ނޫސްވެރިކަމަށް ހުރަސް އަޅަނީ ދަމާ ގެންގޮސް ހައްޔަރުކޮށްގެން އެކަންޏެއް ނޫން، މީޑިއާ ގެންގުޅޭ މީހުންނާއި އާއިލާތަކަށް ބިޔަ ވަޒީފާތައްދީ، ތިމާވެއްޓާއި، ބަޖެޓަށް ބެލުމެއްނެތި އެއާޕޯޓް އަޅައިދީ ޕްރޮޖެކްޓް ދީގެންވެސް އަނގަ ބަނދުކުރޭ. މިއެންމެންވެސް ލަދު ގަންނަންޖެހޭ ނޫންތޯ.

– ދިޔާނާ ވިދާޅުވިއެވެ.

Minivan noosverikamah huras alhanee dhamaa gengoss hayyarukohgen ekanyeh noon, media gengulhey meehunaa aailaathakah biya vazeefaathah dhee, thimaavettaa budget ah belumeh nethi airport alhaidhee project dheegenves anga bandhukurey.

Mi enmenves ladhu gannanjehey noontho? pic.twitter.com/ZRQOOT9rrq

— Dhiyana ????????? (@dhiyanasaid) December 4, 2021

ރޭގެ ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ، ރާއްޖޭގައި މިނިވަންކަމާއިއެކު އެއްވެސް ކަމެއް މަސައްކަތް ކުރެވޭ ހާލަތެއް ނެތްކަމަށެވެ. ނޫސްވެރިކަމުގެ މިނިވަންކަން އިންތިހާއަށް ގެއްލި ވަކި ގޮތަކަށް ނޫސްވެރިންގެ ނިންމުން ނިންމާތަން މިއަދު ފެންނަމުންދާކީ ފެންނަން އޮތް ހަގީގަތެއްކަމަށެވެ.

ސްޕްރީމް ކޯޓުން މިނިވަންވުމުންވެސް މިއަދު ބައެއް ނޫސްތަކުން ވަކި ގޮތަކަށް އާޓިކަލްތައް ލިޔުއްވައި، ވަކި ބަޔަކު ބޭނުންވާ ގޮތަކަށް ނޫސްތަކުގައި ރިޕޯޓް ކުރަމުންދާކަމީ މިނިވަން ނޫސްވެރިކަމެއް ނޫންކަމަށެވެ. ރައީސް ޔާމީން ވިދާޅުވީ އެމަނިކުފާނު ވެރިކަމުގައި، ނޫސްވެރިންނަށް ބިރުދައްކައި، މިނިވަން ނޫސްވެރިކަމަށް ހުރަސް އަޅާފައި ނުވާނެކަމަށެވެ. ނަމަވެސް މިއަދު ވެރިކަމުން ފެނިގެންދަނީ ނޫސްވެރިކަމުގެ މިނިވަންކަން ނަގާލައި ޖާނަލިސްޓުން ކޮންޓްރޯލް ކޮށްގެން ނޫސްތަކުގައި ލިޔުންކަމަށެވެ.