އަދާލަތު ޕާޓިއަކީއަކީ ރިޔާސީ އިންތިޚާބު ކާމިޔާބުކުރުމަށް ކޯލިޝަން ހަދާވަރުގެ ޕާޓިއެއް ނޫންކަމަށް މަހިބަދޫ ދާއިރާގެ މެންބަރު އަޙްމަދު ޠާރިޤް (ޓޮމް) ވިދާޅުވެއްޖެއެވެ.

ޓޮމް މިފަދައިން ވިދާޅުވެފައިމިވަނީ، ކޯލިޝަނާއި ނުލާ ވެރިކަމަށް ނާދެވޭނެކަމަށް އަދާލަތު ޕާޓިގެ ރައީސް އަދި ހޯމް މިނިސްޓަރ ޢިމްރާން ޢަބްދުﷲ ވިދާޅުވުމާއި ގުޅިގެން ދެއްވި ރައްދުގައެވެ. ހޯމް މިނިސްޓަރ ޢިމްރާން ޢަބްދުﷲ ވަނީ އިދިކޮޅު ލީޑަރު ރައީސް ޢަބްދުﷲ ޔާމީންނާއެކު ކޯލިޝަން ހަދާނެ ޕާޓިއެއް ނެތުމުން، އިންތިޚާބު ކާމިޔާބުކުރުމަށް ކުރެވޭނެކަމާމެދު ސުވާލު އުފައްދާފައެވެ.

އެކަމަށް ރައްދު ދެއްވައި މަހިބަދޫ ދާއިރާގެ މެންބަރު އަޙްމަދު ޠާރިޤް (ޓޮމް) ވިދާޅުވީ، އަދާލަތު ޕާޓީއަކީ ރާއްޖޭގެ ރިޔާސީ އިންތިޚާބަކަށް ހިސާބުޖަހާއިރު، ކޯލިޝަން ހަދަން ގުނަންޖެހޭ ވަރުގެ ޕާޓީއެއް ނޫންކަމަށެވެ. ރައީސް ޔާމީން 2013ގައި ވެރިކަމަށް ވަޑައިގަތީ އަދާލަތު ޕާޓީއާއެކު ކޯލިޝަން ހަދައިގެން ނޫންކަމަށްވެސް އޭނާ ވިދާޅުވިއެވެ. ރައީސް ޔާމީންް ކޯލިޝަން ހެއްދީ ޖުމްހޫރީ ޕާޓިއާއެކުކަމަށް ވިދާޅުވެ ޓޮމް ވަނީ އެފަހަރުވެސް އަދާލަތު ޕާޓި ޖުމްހޫރީ ޕާޓީގެ ބަނޑުދަށުން ލެއްގީމަށެވެ.

އަދާލަތަށް ފާޑުވިދާޅުވަމުން ޓޮމް ވިދާޅުވީ، ރައީސް އިބްރާހީމް މުޙައްމަދު ޞާލިޙަށް ޓިކެޓު ލިބިވަޑައިގަތަކީ ކަނޑުވެފައިވަނިކޮށް ކަމުން ފިރުއައުނު މުދާވެސް އޮޑިއަށް އެރުވީ ހިކިފަސްތަނެއް ފެންނަން ނެތިގެންކަމަށެވެ. ޓޮމް ވަނޯ 2023ގައި މިހާރު ސަރުކާރުގައި ތިެއްބެވި ފަރާތްތައް ބަލިކުރާނެކަމަށްވެސް ވިދާޅުވެފައެވެ. ޓޮމް ވިދާޅުވީ، ފުރުސަތުގެ ބޭނުން ހިއްޕަވައިގެން ވަޒީރުންކޮޅެއްގެ ޖާގަ ލިބިވަޑައިގަންނަވާތޯ އުޅުއްވުން އެއީ ރައްޔިތުންނާ ގުޅުން އޮތް ކަމެއް ނޫންކަމަށެވެ.

ޓޮމް މިހެން ވިދާޅުވެފައިވާއިރު، ސަރުކާރު ކޯލިޝަންގައި ހިމެނޭ އަދާލަތު ޕާޓީއަށް ސަރުކާރު ހިންގާ މައި ޕާޓީ އެމްޑީޕީގެ އިސް ބޭފުޅުންނާއި މަޖިލިސް މެންބަރުންވެސް ފާޑުކިޔުން ވަނީ އަމާޒުވެފައެވެ. އެގޮތުން ޤާނޫނު ހަދާ މަޖިލީހުން އަދާލަތަށް އެންމެ ގޮނޑިއެއްވެސް ކާމިޔާބުނުކުރެވި ސަރުކާރުގައި ބާރުގަދަ މަޤާމުތަކުގައި އަދާލަތު ޕާޓިގެ ބޭފުޅުންތިބެ ނަތީޖާ ނުނެރެވޭކަމަށްވެސް އެފަރާތްތަކުން ވިދާޅުވެއެވެ.