ބަރުލަމާނީ ނިޒާމަކީ އާއިލީވެރިކަމާއި ރަސްކަމަށް މަގުފަހިވާ ޚުދުމުހުތާރު ނިޒާމެއްގެ ގޮތުގައި މޯލްޑިވްސް ޓްރޭޑް ޔޫނިއަންގެ ނާއިބު ރައީސް ސަައުދުﷲ އަހުމަދު ސިފަކުރައްވައިފިއެވެ. ސަޢުދު މިފަދައިން ހާމަކުރައްވާފައި މިވަނީ، 2023ގެ ފަހުން ރާއްޖޭގައި ރިޔާސީ ނިޒާމެއް ނޯންނާނެކަމަށް ޤަބޫލުކުރައްވާކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެފައިވަނިކޮށެވެ.
ސަޢުދު ވިދާޅުވީ 2023 ގައި ނިޒާމީ ވޯޓެއް ބޭއްވުމަށްވުރެ ޤައުމުގައި މުހިންމު ކަންތަކެއް އެބަހުރިކަމަށާއި، މި ޤައުމުގައި ވެރިކަމުގެ ނިޒާމްވަނީ ރައްޔިތުން ކަނޑައަޅާފައިކަމަށެވެ.
ބަރުލަމާނީ ނިޒާމަކީ އާއިލީ ވެރިކަމާއި ރަސްކަމަށް މަގުފަހިވާ ޚުދުމުހުތާރު ނިޒާމެއްކަމަށްވެސް ސަޢުދު ވިދާޅުވިއެވެ. ސަޢުދު ވިދާޅުވީ މަޖިލީހުގައި ތިބޭ ވަޒީރަކު އެ މަޖިލީހަށް މަޖިލީހަށް ޖަވާބުދާރީ ވާނެ ގޮތެއް އެ ނިޒާމުގައި ނޭނގޭކަމަށްވެސް ސަޢުދު ވިދާޅުވިއެވެ.
2023 Nizamee votah vuren Qaumugai muhinmu kanthakeh eba huri.mi qaumugai verikamuge nizaam vanee Rahyithun kada alhaifa.Barulamaanee nizaam akee ailee verikamaa Raskamah magu fahiva hudhumuhuthaaru nizaameh.Majuleehuge thibey vazeeraku e majuleehah javab dharee vaane gotheh neyge
— Saudulla Ahmed (@saudullaahmed1) December 2, 2021
ސަޢުދު މިހެން ވިދާޅުވެފައިވާއިރު، އާސްކް ސްޕީކާ ޕްރޮގްރާމްގައި ރައީސް ނަޝީދު ވިދާޅުވެފައިވަނީ 2023ގެ އިންތިޚާބަށް އެމްޑީޕީގެ ޕްރައިމަރީ އޮންނާނެކަމަށާއި، އޭގައި ވާދަކުރައްވާނެކަމަށެވެ. ނަމަވެސް އެމަނިކުފާނު ޤަބޫލުކުރައްވަނީ 2023ގެ އާއި ހަމައަށް މިހާރު އޮތް ރިޔާސީ ނިޒާމް އޮތުމަށްފަހު އޭގެ ފަހުން އެ ނިޒާމް ނޯންނާނެކަމަށެވެ.
ރައީސް ނަޝީދު މިހެން ވިދާޅުވިއިރު އެމަނިކުފާނަކީ ބަރުލަމާނީ ނިޒާމަށް އަބަދުވެސް ވަކާލާތުކުރައްވާ ބޭފުލެކެވެ. ރައީސް ނަޝީދު މީގެ ކުރިންވެސް ވިދާޅުވެފައިވަނީ، ބަރުލަމާނީ ނިޒާމެއް ގެނައުމާމެދު 2022 ވަނަ އަހަރުގެ ނޮވެމްބަރު މަހު ފެންނަ ނުފެންނަ ވޯޓަކަށް ގޮސް، 2023 ވަނަ އަހަރު ނިޒާމް ބަދަލުކުރުމަށް ހުރިހާ ޕާޓީތަކުން އެއްބަސްވާކަމަށެވެ.
ރާއްޖެއަށް ބޭނުންވަނީ ބަރުލަމާނީ ނިޒާމެއް ނޫން، ބޭނުންވަނީ ފުރިހަމަ އިސްލާމީ ޝަރީޢަތެއް: ސަޢުދު
މީގެ ކުރިންވެސް ސަޢުދު ވަނީ ބަރުލަމާނީ ނިޒާމާއި ދެކޮޅަށް ވާހަކަފުޅު ދައްކަވާފައެވެ. ސަޢުދު ވިދާޅުވީ، ރާއްޖެއަށް ބޭނުންވަނީ ބަރުލަމާނީ ނިޒާމެއް ނޫންކަމަށާއި، ބޭނުންވަނީ ފުރިހަމަ އިސްލާމީ ޝަރީޢަތެއް ޤާއިމްކުރުންކަމަށެވެ.ސަޢުދު ވިދާޅުވީ، ރާއްޖެއަށް ބޭނުންވަނީ ބަރުލަމާނީ ނިޒާމެއް ނޫންކަމަށާއި، ބޭނުންވަނީ އިސްލާމި ޝަރީޢަތް އެންމެ ފުން މާނާގައި ޤާއިމްކުރުންކަމަށެވެ. ވައްކަމާއި ކޮރަޕްޝަންފަދަ އެންމެހައި ނުބައި ކަންތައްތަކުން ޤައުމު ސަލާމަތްކުރެވިގެން ނޫނީ ހަމަޖެހޭ މުޖުތަމަޢުއަކަށް ފުރުޞަތެއް ނެތްކަމަށާއި، ތަރައްޤީއާއި ތަހުޒީބުވެސް ނުލިބޭނެކަމަށްވެސް ސައުދު ވިދާޅުވެފައިވެއެވެ.
ރާއްޖޭގައި މިހާރު މިއޮތް ވެރިކަމުގެ ނިޒާމު ބަދަލުކުރެވޭނީ އާންމު ރައްޔިތުންގެ ވޯޓަކުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ ވިދާޅުވެފައެވެ. 2008 ވަނަ އަހަރު ދިވެހިން ބަލައިގަތް ފެހި ޤާނޫނު އަސާސީއަށް އަމަލުކުރަން ފެށުމުގެ ކުރިން ރާއްޖޭގައި އޮންނަން ބޭނުންވާ ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 95،619 މީހުން ވޯޓުދީފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށެވެ.
ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ. މި ވޯޓުގައި 199،841 މީހުން ވޯޓުލުމަށް ރަޖިސްޓްރީކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.
