ރާއްޖެއަށް ބޭނުންވަނީ ބަރުލަމާނީ ނިޒާމެއް ނޫންކަމަށާއި، ބޭނުންވަނީ ފުރިހަމަ އިސްލާމީ ޝަރީޢަތެއް ޤާއިމްކުރުންކަމަށް މޯލްޑިވްސް ޓްރޭޑް ޔޫނިއަންގެ ނާއިބު ރައީސް ސަައުދުﷲ އަހުމަދު ވިދާޅުވެއްޖެއެވެ.
ސަޢުދު މިހެން ވިދާޅުވީ ރާއްޖޭގައި ބަރުލަމާނީ ނިޒާމެއް ޤާއިމްކުރުމަށް ރުލަމާނީ ނިޒާމެއް ގެނައުމާމެދު 2022 ވަނަ އަހަރުގެ ނޮވެމްބަރު މަހު ފެންނަ ނުފެންނަ ވޯޓަކަށް ގޮސް، 2023 ވަނަ އަހަރު ނިޒާމް ބަދަލުކުރުމަށް ހުރިހާ ޕާޓީތަކުން އެއްބަސްވާކަމަށްވެސް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެފައިވަނިކޮށެވެ. އަދި ބަރުލަމާނީ ނިޒާމެއް ޤާއިމްކުރުމަށް ގޮވާލާ ޕެޓިޝަނެއް ތައްޔާރުކުރުމުގެ މަސައްކަތްވެސް ކުރިއަށްދާ ވަގުތެއްގައެވެ.
ސަޢުދު ވިދާޅުވީ، ރާއްޖެއަށް ބޭނުންވަނީ ބަރުލަމާނީ ނިޒާމެއް ނޫންކަމަށާއި، ބޭނުންވަނީ އިސްލާމި ޝަރީޢަތް އެންމެ ފުން މާނާގައި ޤާއިމްކުރުންކަމަށެވެ. ވައްކަމާއި ކޮރަޕްޝަންފަދަ އެންމެހައި ނުބައި ކަންތައްތަކުން ޤައުމު ސަލާމަތްކުރެވިގެން ނޫނީ ހަމަޖެހޭ މުޖުތަމަޢުއަކަށް ފުރުޞަތެއް ނެތްކަމަށާއި، ތަރައްޤީއާއި ތަހުޒީބުވެސް ނުލިބޭނެކަމަށްވެސް ސައުދު ވިދާޅުވިއެވެ.
Raajje ah beynun vanee barulamaanee nizaameh noon.beynun vanee islaamee shareeyatheh qaaim kurun eyge enme fuh maanaiga.vahkamaai ,corruption enmehai nubai kanthakun Qaumusalaamah kuruvigen noonee hama jehey mujuthama akah furusatheh neh.Tharahqee aa thahuzeeb ves nulibeyne.
— Saudulla Ahmed (@saudullaahmed1) November 29, 2021
ރާއްޖޭގެ ވެރިކަމުގެ ނިޒާމް ބަރުލަމާނީއަށް ބަދަލުކުރުމަށް ރައީސް ނަޝީދާއި އެމްޑީޕީގެ ބައެއް ފަރާތްތަކުން ވަކާލާތުކުރަމުން ދިޔަނަމަވެސް، ރައީސް އިބްރާހީމް މުޙައްމަދު ސާލިހު ދެކެވަޑައިގަންނަވާ ގޮތުގައި ވެރިކަމަށް ވަޑައިގެންނެވުމަށް އެކުލަވާލެއްވި މެނިފެސްޓޯގައި ނިޒާމު ބަދަލުކުރާ ވާހަކަ ނެތްކަމަށާއި، އެހެންކަމުން، އެއީ މިސަރުކާރުގެ ސިޔާސަތު ނޫންކަމަށް ސަރުކާރުން ހާމަކޮށްފައިވެއެވެ.
ރާއްޖޭގައި މިހާރު މިއޮތް ވެރިކަމުގެ ނިޒާމު ބަދަލުކުރެވޭނީ އާންމު ރައްޔިތުންގެ ވޯޓަކުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ ވިދާޅުވެފައެވެ. 2008 ވަނަ އަހަރު ދިވެހިން ބަލައިގަތް ފެހި ޤާނޫނު އަސާސީއަށް އަމަލުކުރަން ފެށުމުގެ ކުރިން ރާއްޖޭގައި އޮންނަން ބޭނުންވާ ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 95،619 މީހުން ވޯޓުދީފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށެވެ.
ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ. މި ވޯޓުގައި 199،841 މީހުން ވޯޓުލުމަށް ރަޖިސްޓްރީކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.
