ފަސް އަހަރުގެ ޖަލު ހުކުމަކުން މިއަދު ސަލާމަތްވި ކުރީގެ ރައީސް އަބްދުﷲ ޔާމީން ރާއްޖޭން ބޭރަށް ފުރާވަޑައިގަތުން މަނާ ކުރުމަށްޓަކައި ކޯޓު އަމުރަކަށް ފުލުހުން އެދިއްޖެއެވެ.
މައުލޫމާތު ލިބިފައިވާ ގޮތުގައި ކްރިމިނަލް ކޯޓުގައި ފުލުހުން އެގޮތަށް އެދުނީ ފުލުހުން ތަހުގީގު ކުރަމުންދާ މައްސަލައެއް އޮތުމުން ޔާމީން ރާއްޖޭން ބޭރަށް ފުރާވަޑައިގެންފިނަމަ ތަހުގީގަށް ހުރަސް އެޅިދާނެތީއެވެ. ނަމަވެސް އެއީ ކޮންމައްސަލައެއް ކަމެއް އަދި ސާފެއް ނުވެއެވެ. ފުލުހުން އެގޮތަށް ކޯޓު އަމުރަކަށް އެދުނުނަމަވެސް އަދި އެފަދަ އަމުރެއް ނެރެފައެއް ނުވެއެވެ. ފުލުހުންނާއި ކްރިމިނަކް ކޯޓުންވެސް މިކަމާބެހޭ ގޮތުން އަދި ރަސްމީ ސިފައެއްގައި އެއްވެސް އެއްޗެއް ނުބުނެއެވެ.
ޔާމީންގެ މައްޗަށް އިއްވާފައިވާ ފަސް އަހަރުގެ ޖަލު ހުކުމް މިއަދު ސުޕްރީމް ކޯޓުން ބާތިލު ކުރުމާއެކު ޔާމީން ވަނީ ސިޔާސީ ހަރަކާތްތަކާވެސް އަލުން ގުޅިފައެވެ. ނަމަވެސް ޔާމީންއާބެހޭ ބަޔެއް ތަހުގީގުތައް ފުލުހުން އަދިވެސް ދަނީ ކުރަމުންނެވެ.
