ދިވެހި ކަނޑުތަކަށް ވަންނަ ބޭރުގެ މަސްބޯޓުތައް މިހާރަށްވުރެ ފުރިހަމައަށް މޮނިޓާ ކުރެވެން ޖެހޭ ކަމުގައި މޯލްޑިވްސް ނޭޝަނަލް ޕާޓީ އެމްއެންޕީގެ ރައީސް އަދި ރައްޔިތުންގެ މަޖިލީހުގެ ދަނގެތި ދާއިރާގެ މެމްބަރު މުހައްމަދު ނާޒިމް ވިދާޅުވެއްޖެއެވެ.
ނާޒިމް މިފަދައިން ވިދާޅުވީ ރާއްޖެއަށް ވަގަށްވަންނަ މަސްބޯޓުތަކުގެ ކަންބޮޑުވުން ފާޅުކޮށް، ހއ.އިހަވަންދޫ މަސްވެރިން ކަންބޮޑުވުން ފާޅު ކުރުމާއި ގުޅިގެންނެވެ. ނާޒިމްއަކީ ރާއްޖޭގެ ޑިފެންސް މިނިސްޓަރުކަންވެސް ކުރައްވާފައިވާ އަދި ސިފައިންގެ ޚިދުމަތުގައި ގިނަ ދުވަހު ޚިދުމަތް ކުރައްވާފައިވާ ތަޖުރިބާ ހުންނެވި ބޭފުޅަކަށްވާއިރު ނާޒިމް ވަނީ ކަނޑުގެ ސަރަހައްދު ބެލެހެއްޓުމުގައި މިހާރަށްވުރެ ފުރިހަމައަށް މޮނިޓަރކޮށް ބެލެހެއްޓެން ޖެހޭކަމަށް ވިދާޅުވެފައެވެ.
ރާއްޖޭގެ އިގްތިސާދީ ސަރަހައްދު މިހާރަށްވުރެ ފުރިހަމައަށް މޮނިޓާކޮށް ދިވެހި ކަނޑުތަކަށް ވަންނަ ބޭރުގެ މަސްބޯޓުތައް މިހާރަށްވުރެ ފުރިހަމައަށް މޮނިޓާ ކުރެވެން ޖެހޭ. އަދި ދިވެހި މަސްވެރިންގެ ޝަކުވާތަކަށް ކަމާބެހޭ ވުޒާރާތަކުން މިހާރަށްވުރެ ބޮޑަަށް އިޖާބަދޭން ޖެހޭ.
– ނާޒިމް ވިދާޅުވިއެވެ.
— Col(rtd)Mohamed Nazim MP (@nazim7878) November 27, 2021
އިހަވަންދޫ މަސްވެރިން ބުނައިވަނީ ހުސްވި ހަފުތާގައި ރާއްޖޭގެ އުތުރުން ރާއްޖޭގެ ބޯޑަރުސަރަހައްދަށް ބޭރުގެ 4 މަސްބޯއްޓު ވަދެގެން އުޅުނުކަމަށެވެ. އަދި މި 4 މަސްބޯއްޓުގެ ވީޑިއޯއިން ފެންނަ ގޮތުން މި 4 މަސްބޯއްޓަކީ އެއްކުންފުންޏަކަށް ނިސްބަތްވާ ބޯއްޓުތަކެއް 4 ބޯއްޓުގެ ވެސް ގެގަނޑާ ބޯއްޓުގެ ކުލަ އަދި ބޯއްޓުގެ ޑިޒައިން ހުރީ އެއްގޮތަކަށް ކަމުގައެވެ. މި 4 ބޯއްޓުވެސް ރާއްޖޭގެ ސަރަހައްދުތަކުގަ ވަނީ ދާއަޅާގެން މަސް ހިފާފައިކަމަށާއި، މަސްވެރިންނަށް މިބޯއްޓުތަށް ފެނިފައިވަނީ ރާއްޖޭގެ އުތުރުން އިހަވަންދޫ ގެ ހޮޅަނގުން 25 މޭލާ 75 މޭލާ ދެމެދުންކަމަށް މަސްވެރިން ވަނީ ބުނެފައެވެ.
ރާއްޖޭގައި މިފަހުން ވަގަށް މަސްވެރިކަން ކުރަން ވަންނަ މަސްބޯޓުތައް ހިފަހައްޓައި ރިޕޯޓްކޮށް ހަދަނީ ދިވެހި މަސްވެރިންނެވެ. ރާއްޖޭގެ ކަނޑުގެ ސަރަހައްދު ބެލެހެއްޓުމަށް ކޯސްޓްގާޑާއި، އިންޑިއާ ސިފައިންވެސް ގުޅިގެން ގިނަ މަސައްކަތްތަކެއް ކުރެއެވެ. ނަމަވެސް ގިނަ ފަހަރަށް ރާޑަރުތައް އެކަށީގެންވާ ގޮތަށް މަސައްކަތް ނުކޮށް، ނުވަތަ ބަލަހައްޓަންޖެހޭ ވަރަށް ނުބެލެހެއްޓުމުން ގިނަ އަދަދެއްގެ ބޯޓުތަށް ވަގަށް ވަދެ ދިވެހި ކަނޑުތަކުގެ ބޭނުން ކުރަމުންދާކަމުގެ ޝަކުވާ އަބަދުވެސް މަސްވެރިން ކުރެއެވެ.
One Response
ވަރަށްބޮޑު ތެދުފުޅެއް. މަސްބޯޓު އެކަންޏެއްނޫން، އެހެންކަހަލަ ބޯޓުތައްވެސް މޮނިޓަރ ކުރެވެން ޖެހޭނެކަން މާބޮޑަށްވެސް މަނިކުފާނަށް އެނގިވަޑައިގަންނަވާނެ. މިބުނީ ވަރަށް ވާހަކަ. ބަޔަކަށް ނޭގި އޮވެދާނެ ކަންނޭގެ. އެނގޭ ބަޔަކަށް އެނގޭނެ.