ކޯވިޑް19އަކީ މި ގަރުނުގައި ދުނިޔެ ކުރިމަތިލީ އެންމެ ނުރައްކާތެރި ސިއްޙީ އާލަމީ ވަބާއެވެ. އަދި އެއީ ލޮލަށް ނުފެންނަ، އެހެންނަމަވެސް މުޅި ދުނިޔެއެކީ އެ ދުޝްމަނަކާ ހަނގުރާމަ ކުރަން ޖެހިފައިވާ ނުރައްކާތެރި ދުޝްމަނެއްވެސް މެއެވެ.
މިގޮތުން ކޯވިޑް19އާއި ދެކޮޅަށް ހަގުރާމަކޮށް، ކުއްޖެއް ބޮޑެއް ތަފާތު ކުރުމެއްނެތި، މުޅި ދުނިޔޭގެ ގިނަ ގައުމުތަކުގެ އިގްތިސާދުތައް އިދަޖެހި، އަދި އަނެއްބައި ގައުމުތަކުގެ އިގުތިސާދުތައް އިދަ ޖެހުމަކާހަމައަށް ގޮސްފައިވަނިކޮށް، ކޯވިޑް19އާއި ދެކޮޅަށް ދޭނެ ވެކްސިންތައް ދުނިޔޭގެ ގައުމުތަކުން އީޖާދު ކޮށްފައި ވިނަމަވެސް، ކޯވިޑް19ގެ އާ ވޭރިއެންޓްތައް ވުޖޫދުވެ، ހޯދިފައިވާ ވެކްސިންތަކާ ދެކޮޅަށްވެސް މިވައިރަސްވަނީ ވަރުގަދަކަން ދައްކާ އެތައް ގޮންޖެހުންތަކެއް ކުރިމަތި ކުރުވާފައެވެ. ވައިރަސް މިއުޓޭޓްވެ، ގައިންގަޔަށް އަސްލު ވައިރަހަށްވުރެ މާ ފަސޭހައިން ވާސިވުމުގެ ގާބިލްކަން ލިބިފައިވާ ވޭރިއެންޓްތައް ވަނީ ފާއިތުވެދިޔަ ދޮޅު އަހަރެއްހާ ދުވަހުގެ ތެރޭގައި ދުނިޔޭގެ އެތައް ގައުމެއްގައި ފެނިގެން ގޮސްފައެވެ.
މީގެތެރޭގައި، ދުނިޔޭގެ ގިނަ ގައުމުތަކެއް ދެވަނަ ފަހަރަށް ކޮލްޑައިން ކުރުވަން މަޖުބޫރު ކުރުވި ޑެލްޓާ ވޭރިއެންޓް ހިމެނެއެވެ. މި ވޭރިއެންޓް އެންމެ ފުރަތަމަ ފެނިގެން ދިޔައީ ދެކުނު އެފްރިކާއިންނެވެ. އަދި އެއަށްފަހު ޔޫރަޕްގެ ގައުމުތަކުގެ ތެރެއިން އެންމެ ފުރަތަމަ އިގިރޭސިވިލާތަށް މިވޭރިއެންޓް އެތެރެވެ، ޑެލްޓާ ވޭރިއެންޓްގެ ނުރައްކާތެރި އެތަކެއް ރާޅުތަކަކާ ދުނިޔޭގެ ގައުމަތަށް ފާއިތުވެދިޔަ އަހަރު ފަހުކޮޅާއި މިއަރު ކުރީކޮޅު ކުރިމަތި ލާފައި ވެއެވެ. މީގެތެރޭގައި ޑެލްޓާ ވޭރިއެންޓުގެ ނުރައްކާތެރިކަމާއި ދިވެހި ރާއްޖެއިންވެސް ފާއިތުވެދިޔަ މާރްޗް އެޕްރިލްމަހު ކުރިމަތިލާފައިވެއެވެ. މި ރާޅުގައި އެއް ދުވަހެއްގައި އެކަނިވެސް ރާއްޖެއިން 13 މީހަކު ނިޔާވެގެން ގޮސްފައި ވެއެވެ.
އާވޭރިއެންޓެއްގެ ނުރައްކާތެރިކަން!
ގައިން ގަޔަށް އާދަޔާ ޚިލާފަށް ފަސޭހަކަމާއެކު ފެތުރިގެން ދިއުމުގެ ގާބިލްކަން ލިބިފައިވާ، ކޯވިޑް19ގެ މުޅިން އާ ވެރިއެންޓެއް ސައުތު އެފްރިކާއިން ފެނި، ދުނިޔޭގެ ގިނަ ގައުމުތަކުގެ ބޯޑަރުތައް އެގައުމުގެ ރައްޔިތުންނަށް ނުވަދެވޭ ގޮތަށް އަނެއްކާވެސް މިވަނީ ބަންދު ކުރަން ފަށާފައެވެ.
އަދި މީގެ އިތުރުން، ކޯވިޑް19، ފަސެހަކަމާއެކު ފެތުރާދޭ އާވޭރިއެންޓެއް ފެނުމާއި ގުޅިގެން ދުނޔިޔޭގެ ސައިންސްވެރިން ދަނީ ކަންބޮޑުވުންވެސް ފާޅުކުރަމުންނެވެ.
B.1.1.529ގެ ނަންދެވިފައިވާ މިވޭރިއެއްނޓް ސައުތު އެފްރިކާގެ އެކި ހިސާބުތަކަށް މިހާރު ފެތުރިފައިވާ ކަމަށް ވެއެވެ. އަދި ދުނިޔޭގެ ސައިންސްވެރިންގެ ކަންބޮޑު ވުމަކީ، މި ވޭރިއެންޓޭޓް އަވަސްއަވަހަށް، ގިނައިން މިއުޓޭޓް ވަމުން ދިއުމާ ގުޅިގެން ގިނަ ބަޔަކަށް ބަލި ޖެހުމުގެ ފުރުސަތު ފައިވެގެން ދިއުމުގެ އިތުރުން، އޭގެ ނަތީޖާއެއްގެ ގޮތުން ހަށިގަޑުގެ ދިފާއީ ނިޒާމަށް ނޭދެވޭ އަސަރު ކުރާނެކަމަށް ވާތީއެވެ.
މިވޭރިއެންޓް މިހާތަނަށް އައިއިރު ސައުތު އެފްރިކާގެ އިތުރުން ބޮޓްސުވާން، ހޮންގކޮންގ އަދި ބެލްޖިއަމްއިންވަނީ ފެނިފައެވެ.
މިހާތަނަށް ފެނިފައިވާ ކޯވިޑް19ގެ ވޭރިއެންޓުތަކާއ އަޅާބަލާއިރު އެތައް ގުނައެއް ނުރައްކާތެރިކަން ބޮޑު، ގައިންގަޔަށް ފެތުރުމުގެ ގާބިލްކަންވެސް އެތައް ގުނައެއް އިތުރަށް ލިބިގެންގޮސްފައިވާ ކޯވިޑް19ގެ މި ވޭރިއެންޓް އެންމެ ފުރަތަމަ ސައުތު އެފްރިކާއިން ފެނި، އަދި މިހާރު ދުނިޔޭގެ ގައުމުތަކަށް ފެތުރެން ފަށާފައި ވާއިރު މިވޭރިއެންޓްގެ އަސްލު ދެނެގަތުމަށް ދުނިޔޭގެ ސިއްޙަތުޖަމިއްޔާގެ ތަޖުރިބާކާރުން މިހާރުވަނީ މަސައްކަތް ފަށާފައެވެ.
އަދި މިފަހްތާގެ ހުކުރުދުވަހު ދުނިޔޭގެ ސިއްޙަތު ޖަމިއްޔާގެ ތަޖުރިބާކާރުން ބައްދަކޮށް ވަނީ، މިއީ ދުނިޔޭގެ ގައުމުތަކުން "ކަންބޮޑުވާން ޖެހޭ މިންވަރުގެ" ނުރައްކާތެރި ވޭރިއެންޓެއް ކަމުގައި ނިންމާފައެވެ. މީގެއިތުރުން ޑަބްލިއުއެޗްއޯއިންވަނީ "އޮމިކްރޯން"ގެ ނަމުން މިވޭރިއެއެންޓަށް ނަންދީފައެވެ.
"މިހާރު ފެންނަންހުރި ހެލިތަކަށް ބަލާއިރު، އަދި ކޯވިޑް19 އާލަމީ ވަބާއަށް އައިސްފައިވާ ނުރައްކާތެރި ބަދަލުތަކަށް ބަލާއިރު، ދުނިޔޭގެ ސިއްޙަތު ޖަމިއްޔާއިންވަނީ B.1.1.529 ވޭރިއެންޓަކީ ކަންބޮޑުވާން ޖެހޭވަރުގެ ވޭރިއެންޓެއްކަމަށް ނިންމާފައި، އަދި މި ވޭރިއެންޓަށް އޮމިކްރޯންގެ ނަންދީފައި،" ޔޫއެން ހެލްތު އޭޖެންސީން ނެރެފައިވާ ބަޔާނެއްގައި ބުނެފައި ވެއެވެ.
މިހަފްތާގެ ހުކުރ ދުވަހު، ދުނިޔެގެ ސިއްޙަތު ޖަމިއްޔާ، ޑަބްލިއުއެޗްއޯއިން ބުނެފައިވަނީ، ރިސާޗަރުންނަށް މި ވޭރިއެންޓްގެ އަސްލު ހަގީގަތް ދެނެގަނެ އަދި މި ވައިރަހުން ކުރަމުންދާ އަސަރުތައް ދެނެގަތުމަށް ހަފްތާތަކެއް ނަގާނެ ކަމަށެވެ.
ގައުމުތަކަށް އިތުރު ލޮކްޑައުނަކަށް ދެވިދާނެތަ؟
ސައުތު އެފްރިކާއިން މި ފެނުނު ކޯވިޑް19ގެ އާ ވޭރިއެންޓްގެ ނުރައްކާތެރިކަން އިހުސާސްވެ، ވޭރިއެންޓް ދުނިޔޭގެ ގައުމުތަކަށް ފެތުރެން ފެށީތާ މަދު ދުވަސްކޮޅެއްގެ ތެރޭގައި ދުނިޔޭގެ ގައުމުތަކުގައި މިވަނީ އިންތިހާއަށް ބިރުބެރިކަން ފެތުރެން ފަށާފައެވެ. އަދި ގިނަ ގައުމުތަކުން މިހާރުވެސް ވަނީ ވޭރިއެންޓް ފެތުރެން ފަށާފައިވާ ގައުމުތަކުން އެގައުމަތަށް މީހުން ވަނުން މަނާކޮށް ބޯޑަރުތައް ބަންދު ކުރަންވެސް ފަށާފައެވެ.
މިގޮތުން އެމެރިކާއާއި ޔޫރަޕްގެ ގިނަ ގައުމުތަކުން މިހާރުވެސް ވަނީ އެފްރިކާ ބައްރުގެ ގިނަ ގައުމުތަކަށް އެގައުމުތަކުގެ ބޯޑަރުތައް ބަންދު ކޮށްފައެވެ.
އެމެރިކާގެ ރައީސްވަނީ މިހަފްތާގެ ހޯމަ ދުވަހުން ފެށިގެން ސައުތު އެފްރިކާއިން އެމެރިކާއަށް ދަތުރު ކުރުން މަނާކުރުމަށް އަމުރު ކޮށްފައެވެ. މީގެ ތެރޭގައި، ބޮޓްސުވާނާ، އެސްވާޓިނި، ލެސޯތޯ، މަލާވި، މޮޒަމްބީކް، ނެމްބިއާ، ޒިންބާބުވޭގައި، މި ގައުމުތަކަށް ވަނުމަށްފަހު ކުރިޔަށް ހިނގާ 14 ދުވަހުގެ ތެރޭގައި މިގައުމުތަކުން އެމެރިކާއަށް އެއްވެސް މީހަކު ދަތުރުކުރުން މަނާކުރުމަށްވެސް ބައިޑްން ވަނީ އަންގާފައެވެ.
އެހެންނަމަވެސް، ދުނިޔޭގައި ފަހަކަށް އައިސް ލޮކްޑައުތަކަށް އަލުން ތައާރަފްކުރި ގައުމުތަކުގައި ލޮކްޑައުންތަކާ ދެކޮޅަށް ގައުމުތަކުގެ ރައްޔިތުން މަގުތަކަށް ނިކުމެ ވަނީ މުޒާހިރާވެސް ކޮށްފއެވެ. މިގޮތުން އޮސްޓްރިއާ ފާއިތުވެދިޔަ ހަފްތާގައި މުޅި ގައުމު ލޮކްޑައުން ކުރުމަށް ނިންމުމާއި ގުޅިގެން އެގައުމުގެ ސަރުކާރާ ދެކޮޅަށް ރައްޔިތުން އަދިވެސް ދަނީ މުގަތަކުގައި މުޒާހިރާ ކުރަމުންނެވެ.
އެހެންކަމުން، ދުނިޔޭގައި ފެތުރެން ފަށާފައިވާ މި ނުރައްކާތެރި ވޭރިއެންޓްގެ ނުރައްކަލާއެކު ގައުމުތަކުގެ ސަރުކާރުތަކުން އެގައުމްތައް ލޮކްޑައުން ކުރަން ނިންމައިފިނަމަ ގައުމުތަކުގެ ރައްޔިތުންގެ ފަރާތުން ބޮޑެތި ގޮންޖެހުންތަކާއި، ދެކޮޅު ހެދުންތައް ކުރިމަތިވެގެންދާނެ ކަމަށް ބެލެވެއެވެ. އަދި މިހާލަތު ރާއްޖެއަށްވެސް ކުރިމަތިވެގެން ދާނެކަމަށް ބެލެވޭއިރު، މިއީ އިގްތިސާދަށާއި އަދި އެނޫން ގޮތްގޮތުން އަނެއްކާވެސް ދުނިޔެއަށް ކުރިމަތިވެގެންދާ ބޮޑު ގިލަންވެރިކަމެއްގެ ގޮތުގައި ނޫނީ ބެލެވޭކަށް ނެތެވެ.
