ރާއްޖޭގެ ޚާރިޖީ ސިޔާސަތު މިއަދު ފެނިގެންދަނީ އެއްޤައުމަކަށް ގޮސް ހުސްވެފައިވާތަން ކަމަށާއި، އެއްވެސް ޤައުމެއްގެ ދަށުވުމަކީ ރަނގަޅު ގޮތެއް ނޫންކަމަށް ކުރީގެ ފޮރިން މިނިސްޓަރ ދުންޔާ މައުމޫން ވިދާޅުވެއްޖެއެވެ.
އަވަސް އޮންލައިންގެ ޓޯކް ޝޯ "ސުވާލަކަށް ފަހު ސުވާލެއް" ޕްރޮގުރާމުގައި ދުންޔާ އޭގެ ޚާރިޖީ ސިޔާސަތުން ލިބުނު ތަޖުރިބާގެ މައްޗަށް އަލި އަޅުވާލައި ވާހަކަ ދައްކަވާފައެވެ. ރާއްޖެއަކީ ޚާރިޖީ ގޮތުން ހުރިހާ ޤައުމަކާއިވެސް ހަމަހަމަ ގުޅުމެއް ބާއްވަންޖެހޭ މުސްތަގިއްލު ޤައުމަކަށްވާއިރު، މިއަދު އެކަން ވަރަށް ބޮޑަށް ބަދަލުވެފައިވާކަމަށެވެ. ދުންޔާ ވިދާޅުވީ ރާއްޖޭގައި ހަމަހަމަ ކަމާއިއެކު ގެންގުޅުނު ޚާރިޖީ ސިޔާތު ގެއްލިގެން ގޮސްފައިވަނީ 2008 ވަނަ އަހަރުން ފެށިގެންކަމަށެވެ.
ނިމިދިޔަ ރައީސް އަބްދުﷲ ޔާމީންގެ ވެރިކަމުގައިވެސް ޗައިނާއާއިއެކު މާބޮޑަށް ގާތް ގުޅުމެއް ބާއްވައި، މާބޮޑަށް ޗައިނާއަށް ބަރޯސާވުމުން އެކަން އެގޮތަށް ނުކުރެއްވުމަށް ދެންނެވިކަމަށް ދުންޔާ ވިދާޅުވިއެވެ. އަދި ހަމަހަމަ ކަމާއިއެކު ޚާރިޖީ ސިޔާސަތު ގެންގުޅުއްވުމަށް އޭރު ވަރަށް ބޮޑު އިސްކަމެއް ދެއްވިކަމަށެވެ.
ދުންޔާ ވިދާޅުވީ ނިމިދިޔަ ވެރިކަމުގައި ހިނގަދިޔަ ގޯސްތައް ފާހަގަކޮށް އެކަންކަން ރަނގަޅު ކުރުމަށް އައި ސަރުކާރުން ފެނިގެންދަނީ އެއަށްވުރެއް ގޯސްކޮށް އެކަންކަން ތަކުރާރު ކުރާ މަންޒަރުކަމަށެވެ. ޚާއްސަކޮށް ޚާރިޖީ ސިޔާސަތު އިންޑިއާއަށް އެކަނި ބަރޯސާވެ، މިނިވަންކަމާއި ސިޔާސަދަތާއި މެދު ސުވާލު އުފެދޭ ހިސާބަށް ކަންކަން ގޮސްފައިވާކަމަށެވެ.
އަޅުގަނޑަށް މި ފެންނަނީ ވަރަށް ބޮޑަށް އިންޑިއާއަށް ގޮސް ހުސްވެފައި އޮންނަ ކަހަލަ ގޮތަކަށް އިނގޭތޯ. އެއީ އަޅުގަނޑަށް އިޝޫއެއް. އެއީ އަޅުގަނޑުމެންގެ އިންޑިޕެންޑެންސް ކޮމްޕްރޮމައިސްވާތީ.
– ދުންޔާ ވިދާޅުވިއެވެ.
ދުންޔާ ވަނީ މި ޕްރޮގުރާމުގައި ރާއްޖޭގެ ޚާރިޖީ ދާއިރާގެ މިހާރުގެ ހާލަތާއިމެދުވެސް ކަންބޮޑުވުން ފާޅު ކުރައްވާފައެވެ. ޚާއްސަކޮށް ފޮރިން މިނިސްޓަރު ރާއްޖޭގައި ނެތި ވުޒާރާ ހިންގަވަމުންދާކަމީ ނުހަނު ކަންބޮޑުވާކަމެއްކަމަށެވެ. މިހާލަތަކި ރާއްޖޭގެ ޚާރިޖީ ދާއިރާގެ ބޭނުން އެންމެ ބޮޑަށް ބޭނުންވާ ވަގުތަށްވާއިރު، މިހާލަތުގައި މިނިސްޓަރަކު ނެތުމަކީ ސަރުކާރަށްވެސް އަދި ރާއްޖެއަށްވެސް އެކަމުން ނޭދެވޭ އަސަރުތަކެއް ކުރާނެ ކަމެއްކަމަށް ދުންޔާ ވިދާޅުވިއެވެ.
ކޮންމެ ދިވެހި ރައްޔިތަކަށްވެސް ދުނިޔޭގެ މަތީ މަޤާމެއް ނުވަތަ ޝަރަފެއް ލިބުމަކީ ދިވެހިން ފަހުރުވެރިވާނެ ކަމެއްކަމަށާއި، ނަމަވެސް ތިމާއާއި މަތިވެފައިވާ ޒިންމާއާއި މަސްއޫލިއްޔަތު އެއްފަރާތްވާނެހެން މިފަދަ ކަންކަން ކުރުމަކީ އެކަމުން ޤައުމަށްވެސް ފައިދާ ކުރާނެ ކަންކަމެއް ނޫންކަމަށް ދުންޔާ ވިދާޅުވިއެވެ.
މި ޕްރޮގުރާމުގައި ދުންޔާ ވިދާޅުވީ މިވަގުތު އޮތް އެންމެ ބޮޑު ދެ ސިޔާސީ ޕާޓީއަށްވެސް ސަރުކާރު ހިންގުމުގެ ފުރުސަތު ރައްޔިތުން ދީފައިވާ ކަމަށާ ނަމަވެސް ރައްޔިތުން އުންމީދުކުރި މިންވަރާއި ގާތަށްވެސް މަސައްކަތް ކުރެވިފައިނުވާތީ މިއީ އައު ބަދަލެއް ގެންނަން ޖެހޭ ވަގުތު ކަމަށެވެ.
ދުންޔާ ވިދާޅުވީ ކުރީގެ ޑިފެންސް މިނިސްޓަރު މުހައްމަދު ނާޒިމް އިސްވެ ފައްޓަވާފައިވާ ސިޔާސީ މަަސައްކަތަށް ވަރަށް ބޮޑު އިތުބާރެއް އެބައޮތް ކަމަށެވެ. އަދި އެއީ ގައުމާއި ރައްޔިތުންނަށް އިހުލާސްތެރި މަސައްކަތްތަކެއް ކޮށްދެއްވާނެ ބޭފުޅަކަށް ވެވަޑައިގަންނަވާނެ ކަމަށެވެ. 2023ގެ އިންތިހާބުގައި ރައްޔިތުންނަށް ލިބޭނެ އެންމެ ރަނގަޅު އެއް ޗޮއިސްއަކީވެސް އެއީ ކަމަށް ވިދާޅުވިއެވެ.
