ކުއްލިއަކަށް ހާލުދެރަވެގެން ގދ.ތިނަދޫއިން މާލެއަށް ގެނެސް އައިޖީއެމްއެޗް އިން ހެދި ޓެސްޓްތަކުން އެކިއުޓް ލުކީމިއާ (ލޭގެ ކެންސަރު) ޖެހިފައިވާކަން އެނގުނު އުމުރުން 13 އަހަރުގެ އައިމިނަތު ޝައިހާ ޝަހީދު ނިޔާވެއްޖެއެވެ.

ޝައިހާއަކީ ގދ. އަތޮޅު ތަޢުލީމީ މަރުކަޒުގެ ގްރޭޑް 7 ތަޢުލީމު ހާޞިލްކުރަމުން ދިޔަ ކުއްޖެކެވެ. ކުއްލިއަކަށް ލޭގެ ކެންސަރު ޖެހިފައިވާކަން އެނގިފައި ވުމާއިއެކު، މިބަލީގެ އިތުރު ފަރުވާއަށް މާލެ ގެންދެވި އޭގެފަހުން ޝައިހާ ވަނީ އިންޑިޔާއަށް ގެންދެވިފައެވެ. ނަމަވެސް ޝައިހާގެ ހާލަތަށް މާބޮޑު ކުރިއެރުމެއް ނުލިބި، ރޭގެ ފަތިހުގެ ވަގުތެއްގައި، ޝައިހާގެ ފުރާނަ ވަނީ އަޅުގަނޑުމެންނާއި ވަކިވެ، ދެމިއޮތުމުގެ އާލަމަށް ދަތުރުކޮށްފައެވެ.

ޝައިގެ ހަށިގަނޑު އަނބުރާ ރާއްޖެއަށް ގެނައުމަށް އާއިލާއިން މިހާރު މި ދަނީ މަސައްކަތް ކުރަމުންނެވެ. މާލެ ގެނެވުނުހާ އަވަހަކަށް ޖަނާޒާގެ ކަންކަން ހަމަޖައްސައި އެކަން ޙިއްސާކުރާނެކަމަށް އާއިލާގެ ފަރާތުން މަޢުލޫމާތު ދެއެވެ. މި ފުރުޞަތުގައި އެކި ގޮތްގޮތުން ޝައިގެ ފަރުވާއަށް އެހީތެރިވެދިން ފަރާތްތަކާއި، ޝައިއަށް ހެޔޮ ދުޢާ ކޮށްދިން ފަރާތްތަކަށް އާއިލާގެ ފަރާތުން ޝުކުރު އަދާކުރެއެވެ.

ޝައިހާގެ ކުއްލި ވަކިވުމާއިއެކު މުޅި ތިނަދޫވަނީ ހިތާމައާއި ހިތްދަތި ކަމުގެ ތެރޭގައެވެ. ތިނަދޫ ސްކޫލުގެ ދަރިވަރުންނާއި، ޓީޗަރުންނާއި، ބެލެނެވެރިންވެސް ވަނީ މިހިތާމައިގައި ބައިވެރިވަމުންނެވެ.

ޝައިހާ ނިޔާވުމާއި ގުޅިގެން ގިނަ ބަޔަކު ދަނީ ޝައިހާގެ ފުރާނައަށް ސުވަރުގޭގެ މަތިވެރި ނިއުމަތް މިންވަރު ކުރެއްވުމަށް އެދި ދުއާކުރަމުންނެވެ. ޚަބަރު އޮންލައިންގެ ފަރާތުންވެސް މަރުހޫމާގެ ފުރާނަފުޅަށް ސުވަރުގޭގެ މަތިވެރި ނިއުމަތް މިންވަރު ކުރެއްވުން އެދި ދުޢާކޮށް، އާއިލާއަށް ކެތްރިކަން ދެއްވުން އެދި ދުޢާކުރަމެވެ.