މި ސަރުކާރުން އިންޑިއާއެކީ ހަދާފައިވާ އެއްބަސްވުންތަކުގައި ގައުމީ ސަލާމަތަށް ނުރައްކާވާ އެއްވެސް ކަމެއް ހިމެނިފައި ނުވާކަމަށް މިއަދު 241 ކޮމިޓީން ނިންމި ޖަލްސާއަށް ކޮމިޓީގައި ހިމެނިވަޑައިގަންނަވާ ޕީޕީއެމްގެ މަޖިލިސް މެމްބަރުން ހާޒިރު ވެވަޑައި ނުގެން، ކޮމިޓީގައި ތިއްބެވި އެމްޑީޕީގެ މެމްބަރުން ވޯޓުން، މި އެއްބަސްވުން ތަކަކީ، ގައުމީ ސަލާމަތަށް އެއްވެސް ނުރައްކަލެއް ނެތް އެއްބަސްވުންތަކެއް ކަމުގައި ކަނޑައަޅާ ނިންމައިފިއެވެ.

ރައްޔިތުންގެ މަޖިލިހުގެ 241 ކޮމިޓީގައި ޕީޕީއެމްގެ ފަރާތުން ތިއްބަވަނީ މަޑުއްވަރި ދާއިރާގެ މެމްބަރު އާދަމް ޝަރީފްއާއި ގުރައިދޫ ދާއިރާގެ މެމްބަރު އައްސާން މައުމޫނެވެ.

އިންޑިއާއި އެކު ހަދާފައިވާ އެއްބަސްވުންތަކާ ގުޅޭގޮތުން ގޮތް ނިންމި ކޮމިޓީ ބައްދަލުވުމުގައި ޕީޕީއެމްއިން ބައިވެރިވެފައި ނުވާއިރު، އިންޑިއާއެކު މިސަރުކާރުން ހަދާފައިވާ އެއްބަސްވުންތަކާ ގުޅޭގޮތުން ޕީޕީއެމް އިސްވެ އޮވެ މާލޭގެ މަގުތަކުގައި ކޮންމެ ހަފްތާ ބަންދެއްގައި ދަނީ މުޒާހިރާ ކުރަމުންނެވެ.

އަދި އެޕާޓީންވަނީ އިންޑިއާއާއެކީ މިސަރުކާރުން ހަދާފައިވާ އެއްބަސްވުންތަކާ ދެކޮޅު ހެދުމުގެ ގޮތުން މިހަފްތާ ބަންދުގައި ފުވައްމުލަކުގައިވެސް މުޒާހިރާ ކޮށްފައެވެ.

ރާއްޖެއާ އިންޑިއާއާ ދެމެދު ހަދާފައިވާ ތިން އެއްބަސްވުމެއްގައި ގައުމީ ސަލާމަތަށް ނުރައްކާވާ އެއްވެސް ކަމެއް ނެތް ކަމަށާއި އެ އެއްބަސްވުންތައް ރަނގަޅު ކަމަށް 241 ކޮމިޓީން މިއަދުވަނީ ނިންމާފައެވެ. މިއަދު ކޮމިޓީ ކުރިޔަށް ދިޔައިރު، ކޮމިޓީގައި ހިމެނިވަޑައިގަންނަވާ ޕީޕީއެމް ޕިއެންސީގެ މެމްބަރުން ތިއްބެވީ ޕާޓީގެ ހަރަކާތްތަކުގެ ބައިވެރިވެޑައިގަތުމަށް ފުވައްމުލަކަށް ވަޑައިގެންނެވެ.

އިންޑިއާއެކު މިސަރުކާރުން ހަދާފައިވާ އެއްބަސްވުންތަކުގެ ސަބަބުން ގައުމުގެ ސަލާމަތަށާއި އަދި މިނިވަންކަމަށް ބުރޫ އަރާމުންދާކަމަށް އެންމެ ބޮޑަށް ވަކާލާތު ކުރަމުންދާ ޕީޕީއެމް/ޕީއެންސީ ކޯލިޝަންގެ މެމްބަރުން 241 ކޮމިޓީގެ ނިންމުން ނިންމި ބައްދަލުވުމަށް ހާޒިރުވެފައި ނުވާތީ ކޮމިޓީގައި ހިމެނިވަަޑައިގަންނަވާ އެމްއެންޕީގެ މެމްބަރު، ވިލިމާލެ ދާއިރާގެ މެމްބަރު އަހުމަދު އުޝާމް ވިދާޅުވެފައި ވަނީ އެއީ "ޒިންމާދާރުކަން ކުޑަ ކަމެއް" ކަމުގައެވެ. އުޝާމް ވިދާޅުވި ގޮތުގައި ބަހާ އަމަލާ ދިމާނުވުމަކީ ކަންބޮޑުވާން ޖެހޭ މައްސަލައެކެވެ.

އުޝާމް ވިދާޅުވީ ކޮމިޓީ ބައްދަލުވުން އޮންނަކަން 3 ދުވަސް ކުރިން މެމްބަރުންނަށް އަންގާފައިވާ ކަމަށާއި، އަދި އޮންލައިކޮށް ބައިވެރިވުމުގެ ފުރުސަތުވެސް ކޮމިޓީން މެމްބަރުންނަށް ދީފައިވާ ކަމުގައެވެ.

މިއަދު ބޭއްވުނު ކޮމިޓީގެ ބައްދަލު ވުމުގައި  އެމްޑީޕީގެ މެޖޯރިޓީ އޮންނަ ސަލާމަތީ ހިދުމަތްތަކާ ބެހޭ ކޮމިޓީގައި ނެގި ވޯޓުގައި، އިންޑިއާއާ އެކު ހަދާފައި އޮތް ތިން އެއްބަސްވުމުގައިވެސް، ގައުމީ ސަލާމަތަށް ނުރައްކާވާ އެއްވެސް ކަމެއް ނެތްކަމަށް ވޯޓު ދެއްވީ ހަމައެކަނި އެމްޑީޕީގެ މެމްބަރުންނެވެ.