އިސްލާމީ އުއްމަތާ މިއަދު ކުރިމަތިވެފައިވާ މުޞީބާތްތައް ގިރާކޮށްފައި ދެވޭވަރުގެ ޤާބިލުކަން، އިސްލާމީ އުއްމަތުގެ ވަޙްދަތުގައްޔާއި، އެއްބަނޑުއެއްބަފައިކަމުގެ ގޮތުންތަކުގައި އެބަހުރިކަމަށް ވިދާޅުވެ ދިވެހިންގެ އެއްބައިވަންތަކަން ވަރުގަދަކުރުމަށް މިއަދުގެ ހުކުރު ޚުޠުބާގައި ގޮވާލައްވައިފިއެވެ.
މިއަދު ރާއްޖޭގެ މީހުން ދިރިއުޅޭ ރަށްތަކުގައި ދެއްވި ހުކުރު ޚުޠުބާ ޚާއްޞަކޮށްފައިވަނީ އިސްލާމީ ވަޙްދަތާއި އެއްބައިވަންތަކަމުގެ މުހިންމުކަމުގެ މައްޗަށެވެ. މި މަޢުޞޫއަށް އަލިއަޅުއްވާލައްވާ ޚުޠުބާގައި ވިދާޅުވީ، އިސްލާމް ދީނުގެ އިރު ދުނިޔޭގެ މައްޗަށް އަރައި، އަލިވެ އުޖާލާވެ، ބަބުޅައިގަތީ އިސްލާމީ ވަޙްދަތުގެ ސަބަބުންކަމަށެވެ.
އިސްލާމީ ފުތޫޙާތުތައް ދުނިޔޭގެ އިރުމައްޗަށާއި، ހުޅަނގަށް ފެތުރިގެން ދިޔައީ، އިސްލާމީ އެއްބައިވަންތަކަމުގެ ސަބަބުންކަމަށާއި، އިސްލާމީ ދައުލަތުގެ ސިންގާސަނާއަށް ދުނިޔޭގެ ޤައުމުތައް ބޯލަނބައި، ކިޔަމަންގަތީ، އިސްލާމީ އެއްބައެއްވަންތަކަމުގެ ސަބަބުންކަމަށް ޚުޠުބާގައި ބަޔާންކުރެއްވިއެވެ. މި އެއްބައިވަންތަކަމަކީ،
ވަޙްދަތާއި، އިސްލާމީ އުޚުއްވަތްތެރިކަން ނެތި ފިލައި ދިޔުމުން، އިސްލާމީ ދައުލަތުގެ ގޮށްތައް މޮހި، ބާރުތައް ނިކަމެތިވެ، ކަފާސްވިކަމަށާއި، އެހިނދު އަޅުގަނޑުމެންގެ
ދުޝްމަނުން އަޅުގަނޑުމެންގެ މައްޗަށް ތަފާތު ގޮތްގޮތަށް ބާރު ފޯރުވަންފެށިކަމަށް ޚުޠުބާގައި ވިދާޅުވިއެވެ.
ލޮބުވެތި މުސްލިމް އަޚުންނޭވެ! އިސްލާމީ އުއްމަތާ މިއަދު ކުރިމަތިވެފައިވާ މުޞީބާތްތައް ގިރާކޮށްފައި ދެވޭވަރުގެ ޤާބިލުކަން، އިސްލާމީ އުއްމަތުގެ ވަޙްދަތުގައްޔާއި، އެއްބަނޑުއެއްބަފައިކަމުގެ ގޮތުންތަކުގައި އެބަ ހުށްޓެވެ. މިކަމަށް ޓަކައި އެންމެ ފުރަތަމަކުރަން ޖެހޭ ކަމަކީ، އިސްލާމީ ވަޙްދަތަށް ބޭނުންވާ ބިންގާ ވަރުގަދަ ކުރުމެވެ. އެކަމަށް ބޭނުންވާ އީމާންކަމުގެ އިޙްސާސްތަކާއި، އަސާސުގެ ޝުޢޫރުތައް ހަރުދަނާކުރުމެވެ.
– ހުކުރު ޚުޠުބާ
ޚުޠުބާގައި ވަނީ މުސްލިމުންގެ އެއްބައިވަންތަކަމާއި، އިސްލާމީ އުޚުއްވަތްތެރިކަން ވަރުގަދަކުރުމަށް ޓަކައި، ކުރަންޖެހޭ ދެވަނަ ކަމަކީ، މުސްލިމުންގެ ހިތްތައް އެކަތިގަނޑަކަށް ހެދުމަށް ހިތްތަކުގައި އޯގާވެރިކަމާއި، ކުލުނުވެރިކަމާއި، ހިތްހެޔޮކަމުގެ ޝުޢޫރުތަކުގެ އޮށް އިންދައި، އެއަށް ފެންދީ ހައްދައި ބޮޑުކުރުމަށް
މަސައްކަތް ކުރުންކަމަށް ބަޔާންކޮށްފައެވެ.
މިކަމާ އަރާރުންވެދާނެ ކޮންމެ ކަމަކާކުރައްވާފައިވާ ބަސްފުޅެއްގެ މާނާގައި ވެއެވެ. "އަދި ތިޔަބައިމީހުން އެންމެން ﷲ ގެވާފަށުގައި (އެބަހީ: ﷲގެ ދީނު ގައި) ހިފަހައްޓާށެވެ! އަދި، ވަކިވަކިވެ ނުގަންނާށެވެ! އަދި، ތިޔަބައިމީހުން (އެއްބަޔަކު އަނެއްބަޔަކަށް) ޢަދާވާތް ތެރިން ކަމުގައިވަނިކޮށް، ތިޔަބައިމީހުންނަށް ދެއްވި ނިޢުމަތް ތިޔަބައިމީހުން ހަނދުމަކުރާށެވެ! އެކަލާނގެ ތިޔަބައިމީހުންގެ ހިތްތައް އެކުވެރި ކުރެއްވިއެވެ. ދެން، އެކަލާނގެ ދެއްވި ނިޢުމަތު ގެ ސަބަބުން ތިޔަބައިމީހުންނީ އަޚުންތަކެއް ކަމުގައި ވެއްޖައީމެއެވެ. އަދި، ތިޔަބައިމީހުން ނަރަކައިގެ ވަޅުގަނޑެއްގެ ތުންފަތްމަތީގައި ވީމުއެވެ. ދެން، އެކަލާނގެ ތިޔަބައިމީހުން އެއިން ސަލާމަތްކުރެއްވިއެވެ. ﷲ، އެކަލާނގެ އާޔަތްތައް ތިޔަބައިމީހުންނަށް ބަޔާންކޮށްދެއްވަނީ، އެފަދައިންނެވެ. (އެއީ) ތިޔަބައިމީހުން ތެދުމަގު ލިބިގަތުމަށްޓަކައެވެ.
– ޚުޠުބާ
އިސްލާމީ ވަޙްދަތު ޤާއިމުކުރުމަށް ބޭނުންވާ ކަންތައްތަކުގެ ތެރޭގައި ދެބަސްވުންތަކާއި، އަރާރުންތަކާ ދުރުހެލިވުން ހިމެނޭކަމަށާއި، އިސްލާމީ ވަޙްދަތާއި އީމާންކަމުގެ އުޚުއްވަތްތެރިކަން ޤާއިމު ކުރެވޭނީ، އަމިއްލަ މަޞްލަޙަތު ތަކާއި ދުންޔަވީ މަންފާތަކަށް ވުރެ އުއްމަތުގެ މަޞްލަޙަތުތައް އިސްކުރެވިގެންކަމަށް ވިދާޅުވިއެވެ.
މިއަދުގެ ޚުޠުބާގައި ވަނީ އިސްލާމީ ވަޙްދަތަކީ ވަކި ސަޤާފަތަކާ ނުވަތަ ވަކި ޤައުމަކާ ނުވަތަ ވަކި ފަންތިއަކާ ނުވަތަ ވަކި ޖިންސަކާ ދެކޮޅަށް މުސްލިމުން އުފުލާ ޝިޢާރެއް ނޫންކަމަށާއި، އެއީ އެއްވެސް މުޖްތަމަޢަކަށް ނުރައްކަލެއް އޮތް ކަމެއްވެސް ކަމަށްވެސް ވިދާޅުވެފައެވެ. އެކަމަކު މިއީ ހެޔޮ ކަންތައްތަކަށް އަމުރުކުރުމަށާއި، ނުބައި ކަންތައްތައް މަނާކުރުމުގެ ތަރަހައިގެ ތެރޭގައި އޮތް ކަމެއްކަމަށާއި މި ޝިޢާރުގެ އަމާޒަކީ މާތް އުއްމަތެއް ބިނާކުރުންކަމަށް މިއަދުގެ ހުކުރު ޚުޠުބާގައި ވިދާޅުވިއެވެ.
