މިވެރިކަން އައުމުގެ ކުރިން ރާއްޖޭގައި ހިނގާދިޔަ މަރުތަކަށް އިންސާފު ހޯދައި ދޭނެކަމަށް ބުނެ ވެރިކަމަށް އައި މީހުން މިއަދު މަރުތަކުގެ ވާހަކަ ނުދައްކައި، އެކަމަށް އިންސާފު ހޯދައިދޭން މަސައްކަތް ކުރާތަނެއް ނުފެންނަ ކަމުގައި މިސަރުކާރުގެ ފުރަތަމަ ޖެންޑަރ މިނިސްޓަރ އަދި އެމްއެންޕީހެ ނައިބް ރައީސް ޝިދާތާ ޝަރީފް ވިދާޅުވެއްޖެއެވެ.
ސަރުކާރަށް ތިން އަހަރު ފުރުމާއި ގުޅިގެން ޝިދާތާ ކުރެއްވި ޓުވީޓުގައި ވިދާޅުވީ ކޯލިޝަން ސަރުކާރަށް ތިން އަހަރު ފުރިގެންދިޔައިރު، ވެރިކަމަށް އައުމަށް ވެ ވަޑައިގެންނެވި އެންމެ ބޮޑެތި ވައުދުތަކުގެ މަތީން ހަނދާން ނައްތާލާފައިވާކަމަށެވެ. ވެރިކަމަށް އައުމަށް ވެފައިވާ އެންމެ ބޮޑެތި ވައުދުތަކުގެ ތެރޭގައި މަރުތަކަށް އިންސާފު ހޯދުން ހިމެނޭކަމަށެވެ.
މިގޮތުން ގެއްލުވާލާފައިވާ ނޫސްވެރިޔާ، ރިލުވާނާއި، އަނިޔާވެރި ގޮތަކަށް މަރާލި ޔާމީން ރަޝީފާއި، ޑރ.އަފްރާޝީމް އަލީގެ މަރުގެ ވާހަކައަކީ އެންމެ އަޑު ހަރުކޮށް މިހާރުވެ ވެރިން ދެއްކި ވާހަތައް ކަމަށެވެ. މިމަރުތަކާއި އަދިއެނޫންވެސް މަރުތަކަށް އިންސާފު ހޯދުމަށް ހަރު އަޑު އޭރުވާހަކަ ދައްކައި، ވަކާލާތު ކުރި މީހުން މިއަދު ނުފެންނަ ކަމީ ސަރުކާރުގެ އެންމެ ބޮޑު ފެއިލިއާކަމަށް ޝިދާތާ ވިދާޅުވިއެވެ.
ކޯލިޝަން ސަރުކާރަށް ތިން އަހަރު ފުރިއްޖެ. ވެރިކަމަށް އައުމަށް ވޯޓު ހޯދަން އެންމެ އަޑުހަރުކޮށް ދެއްކި ވާހަކައަކީ ރިލްވަން ގެއްލުވާލި ވާހަކަ، ޔާމީން ރަޝީދުގެ މަރުގެ ވާހަކަ، އަފްރާޝީމްގެ މަރުގެ ވާހަކަ. މިއަދު މިކަމާއިގެން އުޅޭ މީހަކު ނެތް. މީ ސަރުކާރުގެ އެންމެ ބޮޑު ފެއިލިއާ.
– ޝިދާތާ ވިދާޅުވިއެވެ.
ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތަށް އިންސާފު ހޯދައި ދިނުމަކީ ރައީސް އިބްރާހިމް މުހައްމަދު ޞާލިހުގެ ރިޔާސީ ވައުދު ފުޅެކެވެ. ރައީސް ޞާލިހު ވަނީ ވެރިކަމާއި ހަވާލުވިދާ މަދު ދުވަސްތަކުގެ ތެރޭގައި މަރުތަކުގެ މައްސަލަތައް ތަހުގީގް ކުުރުމަށް ރިޔާސީ ކޮމިޝަނެއް އުފައްދަވައި މައްސަލަތައް ތަހުގީގް ކުރުމަށް ހަވާލު ކުރައްވާފައެވެ. ނަމަވެސް އެކޮމިޝަނުން ބަލަމުންދާ މައްސަލަތަކުގެ ތެރެއިން މިހާތަނަށް ނިމިފައިވަނީ ވަރަށް މަދު މައްސަލަތަކެވެ.
ކޮމިޝަނަށް އެކަށިގެންވާ މަސައްކަތެއް ނުކުރެވޭތީ ގިނަ ބަޔަކު ދަނީ މަރުތަކުގެ ކޮމިޝަން އުވާލުމަށް ގޮވާލާފައެވެ. އަދި ކޮމިޝަނަށް ކުރަމުންދަނީ ރައްޔިތުންގެ ފައިދާއިން ބޭކާރު ޚަރަދުތައްކަމަށްބުނެ ގިނަ ބައެއްގެ ފާޑުކިޔުން ވަނީ ކޮމިޝަނަށް އަމާޒުވެފައެވެ.
