ރާއްޖޭގެ މާލިއްޔާއާއި ހިތުހުރި ގޮތަކަށްކުޅެ، ފައިސާ ޗާޕުކޮށް، ލޯނު ނަގާ ހަދާއިރު އެމްއެމްއޭ ގަވަރުނަރު ހައްގު ބަސް ބުނަންޖެހޭ ކަމުގައި ކުރީގެ އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.
ސައީދު މިހެން ވިދާޅުވީ ފައިސާ ޗާޕް ކުރުމަށް ރައްޔިތުންގެ މަޖިލީހުން ސަރުކާރަށް ދީފައި އޮތް ހުއްދައިގެ މުއްދަތު ދެ ވަނަ ފަހަރަށް އިތުރު ކުރަން ސަރުކާރުން އެދި، ޖުމުލަ 7.7 ބިިލިއަން ރުފިޔާ ޗާޕް ކުރަން ސަރުކާރުން މަސައްކަތް ކުރަން ނިންމާފައިވާ ނިންމުމާއި ގުޅިގެން އެކަމަށް ފާޑުވިދާޅުވުމާއި ގުޅިގެންނެވެ.
ސައީދު ވިދާޅުވީ ދައުލަތުގެ ހުރިހާ ބާރެއް އޮވެ، މަޖިލިސްގެ ސުޕަ މެޖޯރިޓީ އޮތުމުން ދައުލަތުގެ މާލިއްޔާ އާއި ހިތުހުރި ގޮތަކަށް ކުޅެމުންދާކަމަށެވެ. މިއީ އެއްގޮތަކަށްވެސް ކަން ކުރެވޭނެ އުސޫލެއް ނޫންކަމަށާއި، މިކަންކަމުގައި ދައުލަތުގެ މާލީ ހިންގުމުގައި އެންމެ ފަހުބަސް ބުނަންޖެހޭ ގަވަރުނަރު ހައްގު ބަސްބުނަން ޖެހޭކަމަށް ސައީދު ވިދާޅުވިއެވެ.
މިހާރު ކުރިއަށްދާ ފައިސާ ޗާޕް ކުރުމުގެ މައްސަލައަކީ ބޮޑު މައްސަލައެއް. އެއްވެސް އެކައުންޓިބިލިޓީއެއް ނެތި، މަޖިލިސް މެޖޯރިޓީ އޮތީމާ ޤާނޫނު ލޮކް އެޅުމަށްފަހު މޮޑޭ ފުށްގަނޑެއްހެން، ހިތުހުރި ވަރަކަށް ޗާޕްކޮށް، ލޯނު ނަގާއިރު ހައްގު ބަސް ބުނުމަށް އެމްއެމްއޭ ގަވަރުނަރަށް ގޮވާލާން.
ސައީދު ވިދާޅުވިއެވެ.
2020 ވަނަ އަހަރުގެ އޭޕްރީލް މަހުން ފެށިގެން ސަރުކާރުން ޗާޕް ކޮށްފައިވާ ފައިސާގެ އަދަދު މިހާރު ވެސް ހަތަރު ބިލިއަނަށް ވުރެ ގިނަ ރުފިޔާއަށް އަރައެވެ. ފައިސާ ޗާޕް ކުރުމަކީ ޑޮލަރުގެ އަގު ވެއްޓި ތަކެތީގެ އަގު ބޮޑުވެގެން ދާނެ ކަމެއް ކަމަށް އިގްތިސާދީ މާހިރުން ވިދާޅުވެއެވެ.
އެއީ ދައުލަތުގެ ޚަރަދަށް ޒިންމާވުމުގެ ގާނޫނުގެ 32 ވަނަ މާއްދާގެ (ހ)، (ރ)، އަދި (ބ) ގައި ބަޔާންކޮށްފައިވާ އުސޫލުތަކާއި ހަމަތަކުން އިސްތިސްނާ ކުރުމަށް ހަމަ އެ ގާނޫނުން ރައްޔިތުންގެ މަޖިލީހަށް ދީފައިވާ ބާރެކެވެ. ޕަބްލިކް ބޭންކް އެކައުންޓް (ޕީބީއޭ) އިން ހައްދެއް ނެތި އޯވާޑްރޯ ކުރުމަކީ ނުވަތަ ފައިސާ ޗާޕް ކުރުމަކީ 2013 ގެ ކުރިން ސަރުކާރުތަކުގެ އާންމު އަމަލެކެވެ.
ނަމަވެސް ކުރީގެ ރައީސް އަބްދުﷲ ޔާމީން ވެރިކަމަށް އައުމަށް ފަހު ސަރުކާރު ހިންގަން ބޭނުންވާ ފައިސާ ޗާޕް ކުރުން 2013 ގައި ހުއްޓާލިއެވެ. އޭގެ ބަދަލުގައި ޕީބީއޭ ބޭނުންކުރީ ހަމައެކަނި ސަރުކާރުގެ ދަރަނި އަދާ ކުރާށެވެ.
