ޝާހުރުކް ޚާންގެ ދޮށީ ދަރިފުޅު މަސްތުވާ ތަކެތީގެ މައްސަލައެއްގައި މިދިޔަ މަހުގެ 2 ވަނަ ދުވަހު ހައްޔަރު ކުރުމަށްފަހު ކަފާލާތުގެ ދަށުން ދޫކޮށްލީ މިދިއަ މަހުގެ 30 ވަނަ ދުވަހުއެވެ.
އެ މައްސަލައިގެ ސަބަބުން އެ އާއިލާއަށް ގިނަގުނަ ކަންތައްތަކާ ކުރިމަތިލާން ޖެހުނެވެ. އަދި ޝާހުގެ ކެރިއަރަށް ވެސް މިކަމުގެ ނޭދެވޭ އަސަރު ކުރިއެވެ.
އެ ހިތާމަ ތަކުން އަރައި ގަތުމަށްފަހު މިހާރު ޝާހު އަންނަނީ އޭނާގެ ކުރިއަށް ހުރި ފިލްމް ތަކުގެ ޝޫޓިން އަލުން ފެށުމަށް ތައްޔާރުވަމުންނެވެ. ނަމަވެސް ޝޫޓިންތައް ފެށުމުގެ ކުރިން އޭނާ ޑައިރެކްޓަރުންގެ ކިބައިން ހާއްސަ ކަމަކަށް އެދިފައި ވާކަމަށް ރިޕޯޓްތައް ބުނެއެވެ.
ޝާހްރުކް އެދުނީ އިންޑިއާއިން ބޭރުގައި ފިލްމުތަކުގެ ޝޫޓިންތައް ކުރިއަށް ގެންދަން ރާވާއިރު، އެހާ ދިގު މުއްދަތަކަށް އަދި މާ ގިނަ ބަޔަކު ބައިވެރިކުރާ ގޮތަށް ޝެޑިއުލްތައް ނުރޭވުމަށެވެ.
އޭނާ ބޭނުންވަނީ ވީހާވެސް ގާތުން އާރިޔާން އުޅޭ ނޫޅޭ ގޮތް ބެލުމަށް ކަމަށް ހަބަރުތައް ބުނެއެވެ. އަދި އާއިލާއާ ދުރުގައި ގިނަ ދުވަހު ދެން މުމްބާއީން ބޭރުގައި ހުންނަން ބޭނުން ނުވުންވެސް މި ސަބަބުތަކުގެ ތެރޭގައި ހިމެނެއެވެ.
ޑްރަގްގެ މައްސަލާގައި އާރިޔާން ހައްޔަރުކުރި އިރު ޝާހު އައީ ދެ ފިލްމެއްގެ މަސައްކަތް ކުރަމުންނެވެ. އެގޮތުން އޭނާ ގެންދިޔައީ ބޮޑު ކާސްޓެއް ހިމެނޭ "ޕަތަން"ގެ ޝޫޓިން އާއި "ލަޔަން"ގެ މަސައްކަތް ކުރަމުންނެވެ.
