ދައުލަތުގެ ޚަރަދަށް ޒިއްމާވުމުގެ ޤާނޫނުގެ މާއްދާތައް ސަސްޕެންޑްކޮށް، 7.7 ބިލިއަން ރުފިޔާ ޗާޕް ނުކުރުމަށް އިދިކޮޅު ޕްރޮގްރެސިވް ކޮންގްރެސް ކޯލިޝަނުން ސަރުކާރަށް ގޮވާލައިފިއެވެ.
އިދިކޮޅުން ސަރުކާރަށް މިހެން ގޮވާލާފައިމިވަނީ، އެމްއެމްއޭގެ ޕަބްލިކް އެކައުންޓުން އޯވަޑްރޯ ކުރުމުގެ ހުއްދަ ނުވަތަ ރުފިޔާ ޗާޕްކުރުމުގެ ހުއްދަ ހޯދުމަށްޓަކައި، ދައުލަތުގެ ޚަރަދަށް ޒިންމާވުމުގެ ގާނޫނުގެ ވަކި މާއްދާތަކަކަށް ޢަމަލުކުރުން ހުއްޓާލަފައި އޮތްއޮތުން އިތުރު އެއް އަހަރުގެ މުއްދަތަކަށް އިތުރުކުރުމުގެ ހުއްދައަށް ފިނޭންސް މިނިސްޓަރ މަޖިލީހުގައި އެދިވަޑައިގަތުމާއި ގުޅިގެންނެވެ.
އިދިކޮޅު ޕްރޮގްރެސިވް ކޮންގްރެސް ކޯލިޝަނުން ނެރުނު ބަޔާނެއްގައި ވަނީ، ކޯވިޑް 19އާއި ގުޅިގެން ދައުލަތުގެ ޚަރަދަށް ޒިއްމާވުމުގެ ޤާނޫނުގެ ބައެއް މާއްދާތަކަށް ޢަމަލުކުރުމުގައި ރައްޔިތުންގެ މަޖިލީހުން ދީފައިވާ ހުއްދަ 2023 ވަނަ އަހަރަށް ދަންމާލާ ފައިސާ ޗާޕުކުރުމަށްޓަކައި ސަރުކާރުން ރައްޔިތުންގެ މަޖިލީހަށް ހުށައަޅާފައިވާއިރު، ސަރުކާރުން ނިންމާފައިވަނީ މިމާއްދާތައް ސަސްޕެންޑް ކުރުމަށްފަހު 7.7 ބިލިއަން ރުފިޔާ ޗާޕްކުރުމަށްކަމަށެވެ. މިކަމަކީ އެކޯލިޝަނުން ވަރަށް ބޮޑަށް ކަންބޮޑުވާ ކަމެއްކަމަށާއި، މިގޮތަށް ގައުމުގެ އިގްތިސާދަށް ގެއްލުންދެނިވި ގޮތަކަށް އަދި ރައްޔިތުންނަށް އެކަމުގެ އެއްވެސް މަންފާއެއް ނެތް ގޮތަކަށް މިހާ ގިނަ ޢަދަދެއްގެ ފައިސާ ޗާޕުނުކުރުމަށް އެކޯލިޝަނުން ސަރުކާރަށް ގޮވާލާކަމަށް ބުންފައިވެއެވެ.
ދައުލަތުގެ ޚަރަދަށް ޒިއްމާވުމުގެ ޤާނޫނުގައި ބަޖެޓުގެ އިތުރަށް ޚަރަދަދު ކުރެވޭނީ ދައުލަތުގެ 3 އަހަރުގެ އާމްދަނީގެ އެކެއް އިންސައްތަ ކަމަށްވިޔަސް މިމާއްދާތައް ސަސްޕެންޑް ކޮށްގެން މިހާތަނަށް 4 ބިލިއަން ރުފިޔާ ނަގާފައިވެއެވެ. މި ހިނގާ 2021 ވަނަ އަހަރު ނިމޭއިރުވެސް މިފައިސާ ނުދެއްކި ދަރަނީގެ ގޮތުގައި އަދިވެސް އެބައޮތެވެ. ނަމަވެސް ޤާނޫނުގައި ވަނީ މަރުކަޒީ ބޭންކުން ނަގާ ފައިސާ 91 ދުވަހުގެ ތެރޭގައި ދައްކާ ނިންމަންޖެހޭ ކަމަށެވެ.
– ޕްރޮގްރެސިވް ކޮންގްރެސް ކޯލިޝަން
އިދިކޮޅުގެ ބަޔާނުގައި އެމްޑީޕީގެ މެޖޯރިޓީ މަޖިލިސްއެއް އޮވެ ފައިސާ ޗާޕުކުރަން ހުއްދަ ދިންއިރުގައި، ފައިސާ ދައްކާނެ ގޮތުގެ ޕްލޭންއާއި އެފައިސާ ޗާޕުކޮށްފައި އެ ބޭނުންކުރާނެ ގޮތުގެ ތަފްސީލް ހާމަކުރުމަކީ މިނިސްޓަރ އޮފް ފިނޭންސްގެ މައްޗަށް ލާޒިމްކަމެއް ކަމަށް ކަނޑައަޅާފައިވީ ނަމަވެސް މިހާ ގިނަ ފައިސާ ބޭނުންކޮށްފައިވަނީ ކޮންކަމަކަށްކަން ރައްޔިތުންނަށް އެނގޭކަށްވެނެތްކަމަށް ބުނެފައިވެއެވެ.
އަންނަ އަހަރު ދައުލަތުގެ ދަރަނި 100 ބިލިއަނަށްވުރެ މައްޗަށް އަރައިގެންދާއިރު ގަވަރނަރގެ ހުއްދަ ނެތި މަރުކަޒީ ބޭންކަށް ނުފޫޒު ފޯރުވައިގެން މިހާ ގިނަ ޢަދަދެއްގެ ފައިސާ އަނެއްކާވެސް ޗާޕުކުރުމަކީ އޭގެ ސަބަބުން މިހާރު އުފުލުފައިވާ ތަކެތީގެ އަގު އަނެއްކާވެސް މައްޗަށް އުފުލި، ޑޮލަރުގެ އަގު ބޮޑުވެ ކަޅު ބާޒާރުގައި ޑޮލަރުގެ ރޭޓު މިހާރު ހުރިވަރަށްވުރެވެސް މައްޗަށް އަތްނުފޯރާފަށަށްގޮސް ރައްޔިތުންގެ ދިރިއުޅުމުގެ ޙާލަތަށް މިކަމުގެ ސަބަބުން ނޭދެވޭ އަސަރު ކުރާނެ ކަމެއްކަމަށްވެސް ބަޔާންކޮށްފައިވެއެވެ. އަދި ކޯވިޑް 19އާއި ގުޅިގެން ވިޔަފާރިތަކަށް ކަނޑައަޅާފައިވާ މޮރެޓޯރިއަމްގެ މުއްދަތު ނިމި އިންކަމް ސަޕޯޓު ދިނުން ހުއްޓާލާފައިވާއިރު މިހާ ގިނަ އަދަދެއްގެ ފައިސާ ޗާޕުކުރުމަކީ ވިޔަފާރިތައް ބަނގުރޫޓުވެ ކުދި ވިޔަފާރިތައް އެއްކޮށް ހަލާކުވެގެން ހިނގައިދާނެ ކަމެއްކަމަށްވެސް ބުނެފައިވެއެވެ. މިކަންކަން މަޖިލީހުގެ ތެރެއިން ކޮށްފައިވަނީ އިދިކޮޅު ސިޔާސީ ޕާޓީގެ އަޑު ކަނޑުވާލުމަށްފަހު ކަމުގައި ހިތާމައާއެކު ފާހަގަކުރާކަމށްވެސް ޕްރޮގްރެސިވް ކޮންގްރެސް ކޯލިޝަންގެ ބަޔާނުގައިވެއެވެ. އަދި މިކަން ކޮށްފައިވަނީ މާލީ ބޮޑެތި ކަންކަމާއި ބަޖެޓާއި ގުޅުންހުރި ކަންކަން ކުރިއަށްދާއިރު މަޖިލިސްގައި މިފަދަ މުހިއްމު ބަހުސްތަކުގައި އަމަލުކުރާ އުސޫލުތަކާއި މުޅިން ޚިލާފަށްކަމަށްވެސް ބުންޏެވެ.
ރައްޔިތުންނަށް އޮޅުވާލައިގެން ދައުލަތުގެ ޚަރަދަށް ޒިއްމާވާންޖެހޭ ގާނޫނުގެ މާއްދާތައް ސަސްޕެންޑް ކުރުމަށްފަހު ހިތުހުރި ވަރަކަށް ފައިސާ ޗާޕްކުރުމުގެ ހުއްދަހޯދުމަށް ރައްޔިތުންގެ މަޖިލީހަށް އަނެއްކާވެސް ހުށައަޅާފައިވާއިރު ބަޖެޓް މެނޭޖް ކުރުމަށްޓަކައި ދައުލަތުގެ ރިކަރަންޓް ހަރަދު ކުޑަކޮށް މަޖިލީހުގެ މެންބަރުންނާ ސަރުކާރުގެ ސިޔާސީ އިސް މަގާމުތަކުގައި ތިބި މީހުންގެ މުސާރަ ކުޑަ ކުރުމަށާއި ސިޔާސީ މަގާމްތައް މަދުކުރުމަށާއި ދައުލަތުގެ އިސްރާފު ކުޑަކުރުމަށް މިކޯލިޝަނުން ތަކުރާރުކޮށް ގޮވާލަމެވެ.
– ޕްރޮގްރެސިވް ކޮންގްރެސް ކޯލިޝަން
އިދިކޮޅުގެ ބަޔާނުގައި ދަރީންގެ ދަރީންގެ ބޮލުގައި ބޮޑެތި ޢަދަދުތަކުން ދަރަނި އެޅޭފަދަ ގޮތަކަށް، ސަރުކާރުގެ ވެރިންނާއި އެމީހުންގެ ރައްޓެހިންނަށް ބަދަލުގެ ގޮތުގައި ދިނުމަށާއި އަދި ކޮރަޕްޝަން ހިންގުމަށް ފައިސާ ޗާޕުނުކުރުމަށް ސަރުކާރަށް ގޮވާލާކަމަށްވެސް ބުނެފައިވެއެވެ.
އިދިކޮޅުން މިހެން ބުނެފައިވާއިރު ފިނޭންސް މިނިސްޓަރ އިބްރާހީމް އަމީރު މަޖިލީހަށް ފޮނުވި ސިޓީގައި ވިދާޅުވީ ވޭތުވެދިޔަ 18 މަހެއްހާ ދުވަހުގެ ތެރޭގައި މި އިސްތިސްނާގެ ސަބަބުން ދައުލަތުގެ ޚަރަދުތައް ހަމަޖައްސައި، ޚިދުމަތްތަކަށް ބުރޫ އެރިޔަނުދީ، ދައުލަތް ހިންގުމުގެ ފުރުސަތު ލިބިގެން ދިޔައެވެ. މީގެ އިތުރުން، އިޤްތިސާދީގޮތުން ފުން ވަޅުގަނޑަކަށް ރާއްޖެ ވެއްޓުނު ވަގުތު، ވިޔަފާރިތަކަށާއި އާއްމު ފަރުދުންނަށް އެހީތެރިކަން ފޯރުކޮށްދިނުމަށާއި، ކޯވިޑް-19 އާ ގުޅިގެން ކުރަން ޖެހުނު ސިއްޙީ ހޭދަތަކާއި ރައްކާތެރިކަމަށް ކުރަން ޖެހުނު ޚަރަދުތައް ހަމަޖެއްސުމުގެ ފުރުސަތު ލިބިގެން ދިޔަ ކަމަށެވެ.
