މޯލްޑިވްސް އެއަރޕޯޓްސް ކޮމްޕެނީ ލިމިޓެޑްގެ ސީއީއޯ އަދި މެނޭޖިންގް ޑިރެކްޓަރ ގޯޑަން އެންޑްރިއު ސްޓްވާޓް މަޤާމުން ވަކިކުރީ އެެއަރޕޯޓްގައި ހިންގާ މަޝްރޫޢުތައް ހަލުވިކޮށް، އެއަރޕޯޓްގެ ހިންގުން ހަރުދަނާކުރުމަށްކަމަށް ޕްރައިވެޓައިޒޭޝަން ކޯޕަރަޓައިޒޭޝަން ބޯޑު (ޕީސީބީ) އިން ބުނެފިއެވެ.
ޕީސީބީގެ ލަފައާއި އެއްގޮތަށް ގޯޑަން އެންޑްރިއު ސްޓްވާޓް މަޤާމުން ވަކިކުރީ ރޭގެ ވަގުތެއްގައެވެ. އިނގިރޭސި ވިލާތަށް ނިސްބަތްވާ ގޯޑަން މަޤާމާއި ހަވާލުވެފައިވަނީ މިދިޔަ އަހަރުގެ ޖުލައި މަހުގެ ތެރޭގައެވެ. އޭނާ އަކީ 30 އަހަރަށް ވުރެ ގިނަ ދުވަހު އޭވިއޭޝަން ދާއިރާގައި ހަރަކާތްތެރިވެފައިވާ ތަޖުރިބާ ހުރި ބޭފުޅެއް ކަމަށް އެމްއޭސީއެލްއިން ކުރިން ބުނެފައިވެއެވެ.
އޭނާގެ މަޤާމުން ވަކިކޮށް، އެކުންފުނީގެ ޗީފް އޮޕަރޭޓިން އޮފިސަރގެ މަޤާމަށް، އިނގިރޭސި ވިލާތަށް ނިސްބަތްވާ ޑެރަން ވިލިއަމްސް ނަމަކަށް ކިޔާ ބޭފުޅަކު އައްޔަން ކޮށްފައިވާކަމަށްވެސް އެމްއޭސީއެލްއިން ބުނެފައިވެއެވެ.
މައި އެއަރޕޯޓް ހިންގާ އެމްއޭސީއެލްގެ އިސް މަޤާމުތަކަށް ބިދޭސީން އައްޔަންކުރާތީ ސަރުކާރަށް ވަނީ ބޮޑެތި ފާޑުކިޔުންތަކެއްވެސް އަމާޒުވެފައެވެ.
