ރާއްޖޭގައި އޮންނަން ފެނަނަ ނިޒާމެއް ހޮވުމަށް 2008 ވަނަ އަަހަރު ނެގި ވޯޓަކީ ބޮޑު އޮޅުވާލުމެއްކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ވިދާޅުވެއްޖެއެވެ.

ބޮންޑެ މިހެން ވިދާޅުވީ، ބަރުލަމާނީ ނިޒާމް ގެނައުމަށް މަޝްވަރާ ފެށުމަށް ގިނަ ޕާޓީތަކުން އެއްބަސްވާކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު ވިދާޅުވެފައިވީނަމަވެސް، ޕާޓީތަކުން އެކަން ދޮގުކޮށްފައިވާތީއެވެ. ބަރުލަމާނީ ނިޒާމަކުން ވެރިކަން ކުރެއްވުމަކީ ރައީސް ނަޝީދުގެ ވިސްނުންފުޅެއް ކަމަށާއި ވަކި ތާރީހެއްގައި ވޯޓަކަށް ގޮސްގެން ވެރިކަން ފުރޮޅާލުމުގެ އެއްވެސް މަޝްވަރާއެއް އެ މަނިކުފާނާ އެކު ކޮށްފައި ނުވާނެ ކަމަށް ޕާޓީތަކުން މިއަދު ވަނީ ބުނެފައެވެ.

އެކަމާއި ގުޅިގެން ބޮންޑެ ވިދާޅުވީ، އެމެރިކާގެ ފޮޓޯ ގަނޑެއް ދައްކައިގެން ރަށުގައި ވޯޓު ގުނުން މަނާ ކުޑަކާފު ބޮޑުކާފު ވޯޓު ގުނާ ވަގުތު ފުޅިބައްތި ރެޑީ ކުރަންޖެހުނު ޒަމާނުގައިނެގި ނިޒާމީ ވޯޓަކީ ބޮޑު އޮޅުވާލުމެއްކަމަށެވެ. އޭނާ އެ އިޝާރާތްކުރެއްވީ 2008 ވަނަ އަހަރުގެ ނިޒާމީ ވޯޓަށެވެ.

އެމެރިކާގެ ފޮޓޯ ގަނޑެއް ދައްކައިގެން ރަށުގައި ވޯޓު ގުނުން މަނާ ކުޑަކާފު ބޮޑުކާފު ވޯޓު ގުނާ ވަގުތު ފުޅިބައްތި ރެޑީ ކުރަންޖެހުނު ޒަމާނުގައިނެގި ނިޒާމީ ވޯޓަކީ ބޮޑު އޮޅުވާލުމެއް.! ތަމްފީޒުކުރާން ފަސޭހަ ދުވެލި ހަލުވި ވެރިކަމުގެ ނިޒާމީ ބަދަލަކަށް ! ނިޒާމީ ބަދަލަކަށް މުޅި ގައުމު !

– އިބްރާހީމް ރަޝީދު (ބޮންޑެ) ވިދާޅުވިއެވެ.

އެމްޑީޕީ ޤައުމީ މަޖިލީހުގެ ވަޓްސްއަޕް ގްރޫޕަށް ރޭ ރައީސް ނަޝީދު ފޮނުވި މެސެޖެއްގައި ބަރުލަމާނީ ނިޒާމެއް ގެނައުމާމެދު 2022 ވަނަ އަހަރުގެ ނޮވެމްބަރު މަހު ފެންނަ ނުފެންނަ ވޯޓަކަށް ގޮސް، 2023 ވަނަ އަހަރު ނިޒާމް ބަދަލުކުރުމަށް ހުރިހާ ޕާޓީތަކުން އެއްބަސްވާކަމަށްވެސް ވިދާޅުވެފައެވެ. ރައީސް ނަޝީދު ވަނީ އެމްޑީޕީގެ ޤައުމީ މަޖިލީހުގެ މެންބަރުންވެސް އެކަމާ މަޝްވަރާކުރުން މުހިންމުކަމަށް ވިދާޅުވެފައެވެ.

2008ވަނަ އަހަރު ދިވެހިން ބަލައިގަތް ފެހި ޤާނޫނު އަސާސީއަށް އަމަލުކުރަން ފެށުމުގެ ކުރިން ރާއްޖޭގައި އޮންނަން ބޭނުންވާ ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 95،619 މީހުން ވޯޓުދީފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށެވެ.

ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ. މި ވޯޓުގައި 199،841 މީހުން ވޯޓްލުމަށް ރަޖިސްޓްރީ ކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.