ދެ ރަށެއްގެ ގޮނޑުދޮށް ހިމާޔަތްކުރުމަށް އެމްޓީސީސީއާއި ހަވާލުކޮށްފިއެވެ. އެގޮތުން ޅ.ކުރެންދުއާއި ށ.މިލަންދޫގެ ގޮނޑުދޮށް ހިމާޔަތްކުރުމުގެ މަޝްރޫޢު އެމްޓީސީސީއާއި ހަވާލުކުރުމަށް ބޭއްވި ރަސްމިއްޔާތުގައި އި ޕްލޭނިން މިނިސްޓްރީގެފަރާތުން ސޮއިކުރެއްވީ ޒިންމާދާރު ވެރިޔާ ޒީނިޔާ އަޙްމަދު ހަމީދެވެ. އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމެވެ.
މި އެއްބަސްވުމުގެ ދަށުން، ޅ.ކުރެންދޫ އިރުއުތުރުން 525 މީޓަރުގެ ބޮޑުހިލައިގެ ރިވެޓްމަންޓަކާއި ދެކުނު ފަރާތުގައި 155 މީޓަރުގެ ބޮޑު ހިލައިގެ ރިވެޓްމަންޓެއް ޤާއިމްކުރުމަށް ވަނީ ހަމަޖެހިފައެވެ. މީގެ އިތުރުން ރަށުގެ އިރުދެކުނު ފަރާތުގައި 183 މީޓަރުގެ ބްރޭކްވޯޓަރއަކާއި ހުޅަނގުދެކުނު ފަރާތުގައި 108 މީޓަރުގެ ބްރޭކްވޯޓަރއަކާއި 35 މީޓަރުގެ 2 ބްރޭކްވޯޓަރ ޤައިމްކުރުމަށް ހަމަޖެހިފައިވެއެވެ. މިއީ ސާޅީސް ހަތަރު މިލިޔަން ނުވަސަތޭކަ ސައުވީސް ހާސް އެއް ސަތޭކަ ސޯޅަ ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢުއެކެވެ.
ޅ. ކުރެންދޫ ގޮނޑުދޮށް ހިމާޔަތް ކުރުމުގެ މަޝްރޫޢު މިއަދު އެމްޓީސީސީއާއި ހަވާލުކޮށްފި
ްޕްރެސް ރިލީޒް:https://t.co/7O2u6vsRmm pic.twitter.com/dwQyrUWcI2— MTCC Plc (@MTCCPlc) November 8, 2021
މީގެ އިތުރުން 200 ދުވަހުގެ ތެރޭގައި ށ.މިލަންދޫ ގޮނޑު ދޮށް ޙިމާޔަތް ކުރުމަށް އެމްޓީސީސީއާ ޙަވާލުކޮށްފައިވަނީ ތިރީސް ހަ މިލިޔަން ހަސަތޭކަ ނުވަދިހަ ފަސް ހާސް ފަސް ސަތޭކަ ތޭވީސް ރުފިޔާއަށެވެ. މިމަޝްރޫޢޫގެ ދަށުން އެރަށުގެ އިރުމަތީ ފަރާތު ގޮނޑު ދޮށުން 954.43 މީޓަރުގެ ސަރަޙައްދެއްގައި ބޮޑުހިލައިގެ ރިވެޓްމަންޓް ޤާއިމްކޮށް ރިވެޓްމަންޓްގެ ދެ ކޮޅުގައި 44.77 މީޓަރުގެ ބޮޑުހިލައިގެ ދެ ފައިކަށި ޤާއިމްކުރަން ވަނީ ހަމަޖެހިފައެވެ.
ށ. މިލަންދޫ ގޮނޑުދޮށް ހިމާޔަތް ކުރުމުގެ މަޝްރޫޢު މިއަދު އެމްޓީސީސީއާއި ހަވާލުކޮށްފި
ޕްރެސް ރިލީޒް:https://t.co/jSMAu3QWCt pic.twitter.com/4qlrpnEHYd— MTCC Plc (@MTCCPlc) November 8, 2021
މި މަޝްރޫޢުތައް ހަވާލުކުރުމަށް ބޭއްވި ރަސްމިއްޔާތުގައި އެދާއިރާތަކުގެ މެންބަރުންވެސް ބައިވެރިވެވަޑައިގެންނެވިއެވެ.
