ފަލަސްތީނުގެ ރައީސް މަހުމޫދު އައްބާސް، ކުރިސްޓިއަނުންގެ އިސް ފާދިރީ ޕޯޕް ފްރާސިސްއާއި ބައްދަލު ކުރައްވައިފިއެވެ. އަދި މީގެ އިތުރުން މަހުމޫދު އައްބާސް ވަނީ، ވެޓިކަންގެ އިސް އޮފިޝަލުންނާވެސް ބައްދަލު ކުރައްވާފައެވެ. މި ބައްދަލު ކުރެއްވުމުންތަކުގައި ވެޓިކަންގެ އިސް އޮފިޝަލުންވަނީ، އިސްރާއީލާއި ފަލަސްތީނާ ދެމެދު ސުލްހައިގެ ވާހަކަ ދެއްކުންތައް އަލުން ފެށުމަށް ގޮވާލައްވާފައެވެ.
މީގެ ކުރިންވެސް އެތައް ފަހަރެއްގެ މަތިން ޕޯޕާއި ބައްދަލު ކުރައްވާފައިވާ މަހުމޫދު އައްބާސްވަނީ، ވެޓިކަންގެ ސެކެޓްރީ އޮފް ސްޓޭޓް ކާރޑިނަލް ޕިއެޓްރޯ ޕެރޯލިންއާއި އަދި ވަގުތީ ގޮތުން ވެޓިކަންގެ ފޮރިންގ މިނިސްޓަރުކަމާ ހަވާލުވެ ހުންނެވި ޕައުލް ގަލްގާރއާއި ވާހަކަދެއްކުންތައް ބާއްވަވާފައެވެ. އަދި އިޓަލީގެ ރޯމަށް ކުރައްވަމުން ގެންދަވާ މިދަތުރުފުޅުގައި މަހުމޫދު އައްބާސްވަނި އިޓަލީގެ ބޮޑުވަޒީރު މާރިއޯ ޑަރްގީއާއިވެސް ބައްދަލު ކުރައްވާފައެވެ.
"މި ބައްދަލު ކުރެއްވުންތަކުގައި، އިސްރާއީލާއި ފަލަސްތީނާ ދެމެދު ހުރި މައްސަލަތަކަށް ހައްލުހޯދާ، ދެގައުމުގެ މައްޗަށް އެކުލެވޭ ސުލްހަ ގެނައުމަށްޓަކާ، ދެގައުމުގެ ދެމެދުގައި ސީދާ ވާހަކަތައް ފެށުމުގެ މުހިންމުކަން ފާހަގަަށް، މި މަޝްވަރާތަކުގެ ބައިނަލް އަގުވާމީ މުޖުތަމައުން މިހާރަށްވުރެ މުހިންމު ދައުރެއް އަދާކުރުމުގެ މުހިންމުކަމާ ގުޅޭގޮތުން މަޝްވަރާ ކުރެވުނު،" އައްބާސްގެ ދަތުރުފުޅާއި ގުޅިގެން ވެޓިކަންއިން ފަހުން ބުނެފައި ވެއެވެ.
"މި ވާހަކަތަކުގައި، ޖެރޫސެލަމްއަކީ، ކުރިމަތިލުން ހިގާ ތަނަކަށް ހެދުމުގެ ބަދަލުގައި، އެއީ އެއްބަޔަކު އަނެއްބަޔަކަށް ބައްދަލުވެ އުޅެވޭ ތަނެއްގެ ގޮތުގައި ބޭއްވުމުގެ މުހިންމުކަމުގެ އިތުރުން، އެތަނުގެ ހައިސިއްޔަތާއި އަދި ތަނުގެ އަސްލު، ބައިނަލް އަގުވާމީގޮތުން ބަލައިގަންނަ، އިބްރާހީމްގެފާނުގެ ދަރިކޮޅުން އައި 3 ދީނަށްވެސް ނިސްބަތްވާ މާތް ބިމެއްގެ ގޮތުގައި އޮތުމުގެ މުހިންމުކަން ފާހަގަ ކުރެވުނު،" ކަމުގައި ވެޓިކަންއިން ބުނެފައި ވެއެވެ.
ވެޓިކަން ނިއުސްއިން ބުނެފައި ވަނީ، މިއީ އައްބާސް ޕޯޕުއާއި ބައްދަލު ކުރެއްވި 6 ވަނަ ފަހަރު ކަމަށާއި، އަދި މި ބައްދަލު ކުރެއްވުމުގައި، އައްބާސް ޕޯޕަށް، މައުދަނުން ހަދާފައިވާ ގްރޮއްޓޯ އޮފް ނޭޓިވިޓީގެ ނަކަލެއް ވެދުމަކަށް އަރުވާފައިވާ ކަމުގައެވެ. ގްރޮއްޓޯ އޮފް ނޭޓިވިޓީއަކީ، ފަލަސްތީނުގެ ބެތްލެހެމްގައި ހުންނަ، އީސާގެ އުފަންވީކަމަށް ބެލެވޭ ބިމުއަޑީގެ ހޮހަޅައެވެ.
ކޮމެންޓު ފޮނުވާ