ރާއްޖޭގެ ކުދި ރަށްތަކުގައި ކުޑަ އާބާދީތަކާއިއެކު ދިރިއުޅޭ ރައްޔިތުން އެއްރަށުން އަދެއްރަށަށް ބަދަލު ކުރުމަކީ ސަރުކާރުގެ ވިސްނުމެއް ނޫންކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ރައްޔިތުންގެ މަޖިލީހުގައި މިއަދު ވަޒީރާއި ސުވާލު ކުރުމަށް ހުޅުވާލި ފުރުސަތުގައި ރާއްޖޭގެ ކުޑަ އާބާދީތަކުގައި ތިބި ރައްޔިތުން އެހެން ރަށްތަކަށް ބަދަލު ކުރުމުމުގެ ވިސްނުން ގެންގުޅުއްވަންތޯ ކާށިދޫ ދާއިރާގެ މެމްބަރު އަބްދުﷲ ޖާބިރު ކުރެއްވި ސުވާލަށް ޖަވާބު ދެއްވަމުން މިނިސްޓަރ އަސްލަމް ވިދާޅުވީ މިސަރުކާރުން އެއްވެސް ރަށެއްގެ ރައްޔިތުން އެއްރަށުން އަނެއް ރަށަށް ބަދަލު ކުރުމުގެ ވިސްނުމެއް ނުގެން ގުޅޭކަމަށެވެ.
ސަރުކާރުގެ އަމާޒަކީ ކުދި ތަކުގައި ދިރިއުޅޭ ރަށްޔިތުންނަށްވެސް ބޭނުންވާ އަސާސީ ޚިދުމަތްތަކައި ވަސީލަތްތަކާއި، އާމްދަނީ ހޯދޭނެ ގޮތް ފަހި ކުރުންކަމަށެވެ. އަދި މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާގެ ނިޒާމު ޤާއިމް ކުރުމަކީ ސަރުކާރުގެ ވައުދެއްކަމަށެވެ. މީގެ ތެރެއިން މިހާރު މަސައްކަތް ހަވާލު ނުވެ ވަނީ މަދު ރަށެއްކަން މިނިސްޓަރ އަސްލަމް ވިދަޅުވިއެވެ.
ރާއްޖޭގެ ކުޑަ އަބާދީތަކަކީ އެރަށްތަކުގައި ދިރިއުޅޭ ރައްޔިތުންނަށް ރަށުގައި ތިބެގެން ބޮޑެތި މަންފާތަކެއް ލިބޭނެ ވަރުގެ ގުދުތަރީ ވަސީލަތްތަކާއި، ހިތްގައިމު މާހައުލެއް އޮތް ރައްތަކެއްގެ ގޮތުގައި މިނިސްޓަރ ފަހަގަ ކުރެއްވިއެވެ. ވަކިވަކި ރަށްތަކުން މިސާލު ނަންގަވަމުން ވިދާޅުވީ އއ.އުކުޅަހާއި، ކ.މާފުއްޓާއި، އަދި އެނޫންވެސް ރަށްތަކަކީ މީގެ ކުރިން މާބޮޑު ކަމެއް ނެތްރަށްތަކެއްގެ ގޮތުގައި ފާހަގަ ވީނަމަވެސް މިއަދު ފުދުންތެރިކަން އެންމެ ބޮޑު، އަދި އެންމެ ބޮޑު އިޤްތިޞާދެއް އޮތް ރަށްތަކުގެ ގޮތުގައި މިނިސްޓަރ އަސްލަމް ވަނީ ފާހަގަ ކުރައްވާފައެވެ.
ކުރިއަށް އޮތް ތަނުގައިވެސް ސަރުކާރުގެ އަމާޒަކީ ކުދި އާބާދީތަކަށްވެސް ވަސީލަތްތައް ފުރިހަމަކޮށް، އިޤްތިޞާދީ ގޮތުން ފުދުންތެރި ބަޔަކަށް ހެދުމަށް ކަމުގައި މިނިސްޓަރ ވަނީ ވިދާޅުވެފައެވެ.
