ރާއްޖޭގެ ކުރީގެ ރައީސުންގެ އިނާޔަތުގެ ގޮތުގައި ބަޖެޓުގައި 3.3 މިލިއަން ރުފިޔާ ކަނޑައަޅާފިއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓުގައި ކުރީގެ ރައީސުންގެ ތެރެއިން އިނޔާތް ކަނޑައެޅި ބޭފުޅުންގެ ތެރެއިން އެންމެ ބޮޑު ބަޖެޓެއް ދެނީ ކުރީގެ ރައީސް މައުމޫނަށެވެ.
ކުރީގެ ރައީސުންގެ ތެރެއިން މައުމޫން އަބްދުލްގައްޔޫމަށް މާލީ އިނާޔަތުގެ ގޮތުގައި މަހަކު 75،000 ރުފިޔާ އަދި ދިރިއުޅުއްވާ ތަނުގެ ހަރަދަށް 50،000 ރުފިޔާ ހިމަނާފައިވެއެވެ. ކުރީގެ ނަޝީދަށް ކަނޑައަޅާފައި ވަނީ މާލީ އިނާޔަތުގެ ގޮތުގައި، 50،000 ރުފިޔާ އަދި ދިރިއުޅުއްވާ ތަނުގެ ހަރަދަށް 50،000 ރުފިޔާއެވެ. ކުރީގެ ރައީސް މުހައްމަދު ވަހީދު ހަސަން މަނިކަށް ބަޖެޓުގައި ކަނޑައަޅާފައި ވަނީ ދިރިއުޅޭ ތަނުގެ ހަރަދު އެކަންޏެވެ. އެއީ 50،000 ރުފިޔާއެވެ.
ރައީސްކަން ކުރައްވާފައިވާ ބޭފުޅުންނަށް އިނާޔަތް ދިނުމާ ބެހޭ ގާނޫނުގެ ދަށުން އެއް ދައުރު ރައީސް ކުރައްވާފައިވާ ބޭފުޅުންނަށް މަހަކު 50،000ރ. ގެ އިނާޔަތެއް ދޭން ޖެހޭއިރު، އެއް ދައުރަށް ވުރެ ގިނަ ދުވަހުު ރައީސް ކަން ކުރައްވާފައިވާ ބޭފުޅުންނަށް މަހަކު 75،000ރ. ގެ އިނާޔަތެއް ދައުލަތުން ދޭންޖެހެއެވެ. އަދި ދިރިއުޅުއްވާ ތަނުގެ ޚަރަދަށް އިތުރު 50،000ރ. ދިނުމުގެ އިތުރަށް މުޖްތަމައުއަށް ފައިދާހުރި މަސައްކަތެއް ކުރައްވާ ނަމަ، އޮފީސް ހިިންގުމުގެ ޚަރަދަށް ވެސް މަހަކު 175،000ރ. އާ ހަމައަށް ދައުލަތުން ފައިސާ ދޭންޖެހެއެވެ.
މީގެ އިތުރުން، މުޖުތަމައަށް ފައިދާ ހުރި އިޖުތިމާއީ މަސައްކަތެއް ކުރައްވަން އެ ބޭފުޅަކު ބޭނުންފުޅުވެއްޖެ ހިނދެއްގައި އޮފީހާއި މުވައްޒަފުންގެ ހަރަދާއި އެހެނިހެން ކަންކަމަށް 175،000ރ. އާ ހަމައަށް ދައުލަތުން ފައިސާ ދޭންޖެހެއެވެ. ކުރީގެ ރައީސުންގެ ގޮތުގައި މިހާރު ތިއްބެވީ މައުމޫން އަބްދުލްގައްޔޫމާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ޑރ.މުހައްމަދު ވަހީދު ހަސަން މަނިކު އަދި ރައީސް އަބްދުﷲ ޔާމީނެވެ. ރައީސް ޔާމީނަށް ފައިސާ ނުދެނީ އެމަނިކުފަނު ހުކުމެއްގައި ހުރުމުންނެވެ.
ކޮމެންޓު ފޮނުވާ