2022 ވަނަ އަހަރަށް ލަފާކުރާ 37 ބިލިއަން ރުފިޔާގެ ބަޖެޓް މަޖިލިހަށް ހުށަހަޅުއްވައިފި

2022 ވަނަ އަހަރަށް ލަފާކުރާ 37 ބިލިއަން ރުފިޔާގެ ބަޖެޓް މަޖިލިހަށް ހުށަހަޅުއްވައިފި

2022 ވަނަ އަހަރަށް ލަފާކުރާ. 37 ބިލިއަން ރުފިޔާގެ ބެޖެޓް ސަރުކާރުން ރައްޔިތުންގެ މަޖިލީހަށް ހުށަހަޅުއްވައިފިއެވެ.

ފިނޭންސް މިނިސްޓަރ މަޖިލީހަށް ބަޖެޓް ހުށަހަޅުއްވަމުން ވިދާޅުވެފައިވަނީ، ޖުމުލަ އާމްދަނީ އާއި ހިލޭ އެހީގެ ގޮތުގައި 2022ވަނަ އަހަރު ދައުލަތަށް ލިބޭނެ ކަމަށް އަންދާޒާ ކުރެވެނީ 24.3 ބިލިއަން ރުފިޔާ ކަމުގައެވެ.

މިއީ 2021 ވަނަ އަހަރަށްވުރެ 23 އިންސައްތަ އިތުރު އަދަދެއްކަން ފާހަގަ ކުރައްވަމުން، މީގެތެރޭގައި ހިމެނެނީ، ޓެކުހުގެ ގޮތުގައި ލިބޭނެކަމަށް ލަފާކުރާ 15.4 ބިލިއަން ރުފިޔާ އާއި، ޓެކްސް ނޫން އެހެން ގޮތްގޮތުން 6 ބިލިއަން ރުފިޔާގެ އިތުރުން ހިލޭ އެހީގެ ގޮތުގައި ލިބޭނެކަމަށް ލަފާކުރާ 2.9 ބިލިއަން ރުފިޔާއެވެ. 

2022 ވަނަ އަހަރަށް ލަފާކޮށް ސަރުކާރުން 36.9 ބިލިއަން ރުފިޔާގެ ބަޖެޓެއް މަޖިލީހަށް ހުށަހަޅުއްވާފައި ވާއިރު، މި ޖަލްސާގައި ބަޖެޓް ހުށަހަޅުއްވަމުން ފިނޭންސް މިނިސްޓރު ވިދާޅުވެފައިވަނީ، މި ބެޖެޓަކީ 9.7 ބިލިއަން ރުފިޔާއިން ޑެފިސިޓް ބަޖެޓެއް ކަމުގައެވެ.

އަދި ބެޖެޓްގެ ޑެފިސިޓް ފައިނޭންސް ކުރުމަށް ޖުމްލަ 13.4 ބިލިއަން ރުފިޔާ ހޯދަންޖެހޭއިރު، މީގެ ތެރެއިން އެންމެ ބޮޑު އަދެއްގެ ގޮތުގައި ހިމެނެނީ ބެޖެޓްގެ ދަރަނި ފޫބެއްދުމަށް ހޯދަންޖެހޭ 9.7 ބިލިއަން ރުފިޔާއެވެ.

މިގޮތުން ބެޖެޓްގެ ޑެފިސިޓަކީ، ގައުމީ އުފެއްދުންތެރިކަމުގެ ނިސްބަތުން 11.1 އިންސައްތައެވެ.

2022 ވަނަ އަހަރަށް ލަފާކުރާ ދައުލަތުގެ ބަޖެޓް މަޖިލީހަށް ހުށަހަޅުއްވަމުން، ފިނޭންސް މިނިސްޓަރު ވިދާޅުވެފައިވަނީ، މި އަހަރު ނިމޭއިރު ދައުލަތުން ދީފައިވާ ގެރެންޓީ ހިމަނައިގެން ދައުލަތުގެ ދަރަނި 94 ބިލިއަށް އަރާނެ ކަމުގައެވެ.

މިއީ ޖީ.ޑީ.ޕީގެ ނިސްބަތުން 122 އިންސައްތައެވެ.

އެހެންނަމަވެސް، ދައުލަތުގެ ދަރަނި 2022 ވަނަ އަހަރު ނިމޭއިރު، 104 އިންސައްތައަށް ތިރިކުރެވޭނެ ކަމަށް ލަފާކުރައްވާކަމަށް ވިދާޅުވަމުން ފިނޭންސް މިނިސްޓަރު ވިދާޅުވެފައިވަނީ، ސަރުކާރުގެ އަމާޒަކީ 2023 ވަނަ އަހަރު ނިމޭ އިރު 101 އިންސައްތައަށް ޖީޑީޕީގެ ނިސްބަތުން ދަރަނި ދަށް ކުރުން ކަމުގައެވެ.

2022 ވަނަ އަހަރަށް ލަފާކޮށް ސަރުކާރުން މިއަދު މަޖިލީހަށް ހުށަހެޅުއްވި ބަޖެޓުގައި އާމްދަނީ އިތުރުކުރުމަށް ހުށަހަޅާފައިވާ ގިނަ ކަންކަމަކީ، ފާއިތުވެދިޔަ އަހަރުގެ ބަޖެޓުގައިވެސް އާމްދަނީ އިތުރުކުރުމަށް ހިމަނުއްވާފައިވާ، އެހެންނަމަވެސް ތަންފީޒު ނުކުރެވިވާ ކަންކަން ކަންވެސް ފާހަގަ ކޮށްލެވެއެވެ.

މިގޮތުން ހުށަހަޅުއްވާފައިވާ ކަންކަމަކީ:

  1. ޕްލާސްޓިކް ބޭގް ޓެކްސްއެއް ތައާރަފުކުރުން
  2. ރިޒޯޓްތައް ހެދުމަށް އާ ރަށްތައް ދޫކުރުން
  3. ރިއަލް އެސްޓޭޓް ޓޫރިޒަމް އިތުރަށް ފުޅާކުރުން
  4. ދިވެހިރާއްޖޭގެ ރަށްތަކުގައި ހިއްކޭ ބިމުގެ ވަކި އިންސައްތައެއް އާންމުންނަށް ވިއްކުމުގެ ސިޔާސަތު ތަންފީޒުކުރުން

މަޖިލީހަށް ބަޖެޓް ހުށަހަޅުއްވަމުން، ފިނޭންސް މިނިސްޓަރު އަމީރު ވިދާޅުވެފައިވަނީ، ރާއްޖޭގެ އިގްތިސާދު ކުރިއަތަމުން މިއަންނަނީ،  ދުނިޔޭގެ އިޤުތިސާދީ ދުވެއްޔަށްވުރެ އެތައް ގުނައެއް ބާރަށް ކަމުގައެވެ. އަދި ވިދާޅު ވެފައިވަނީ، މި އަހަރު ދުނިޔޭގެ އެންމެ ބާރަށް ކުރިއަރަމުންދާ 5 އިގުތިސާދުގެ ތެރޭގައި ކަމުގައެވެ.

ހިޔާލުފާޅު ކުރައްވާ!

Leave a Reply

Your email address will not be published. Required fields are marked *