މިހަފްތާގެ ހުކުރު ދުވަހުވެސް މިނިވަންކަމުގެ ދިފާއުގައި ދިވެހިން ނަމުގައި ހިނގާލުމެއް ބޭއްވުމަށް އިދިކޮޅު ކޯލިޝަނުން ނިންމައިފިއެވެ.
އެކޯލިޝަނުން މިއަދު ބޭއްވި ޕްރެސް ކޮންފަރެންސްގައި ހިނގާލުން އިންތިޒާމު ކުރުމުގައި އިސްކޮށް ހަރަކާތްތެރިވާ ކުރީގެ ހޯރަފުށީ ދާއިރާގެ މެމްބަރު މުހައްމަދު އިސްމާއިލް ވިދާޅުވީ މި ހިނގާލުމަކީ ސުލްހަވެރި ކަމާއިއެކު ބޭއްްވޭ ހިނގާލުމެއްކަމަށެވެ. މިދިޔަ ހަފްތާގެ ހުކުރު ދުވަހުވެސް ބޭއްވި ގޮތަށް މިފެށޭ ހަފްތާގެ ހުކުރު ދުވަހުވެސް ބާއްވާ ހިނގާލުމުގައި ރާއްޖޭގައި ތިބި ބޭރުގެ ސިފައިން ބޭލުމަށާއި، މިނިވަންކަމާއި ދެކޮޅަށް ހަދާފައިވާ އެއްބަސްވުންތައް ބާތިލް ކުރުމަށް ގޮވާލާނެކަމަށް ވަނީ ބުނެފައެވެ.
ރާއްޖޭގެ މިނިވަންކަމާއި ސިޔާދަތާއި އިސްލާމް ދީނަށް ލޯބިކުރާ ހުރިހާ ރައްޔިތުން އަންނަ ހުކުރު ދުވަހުގެ ހަވީރު 4:00 އަށް ޕީޕީއެމް އޮފީސް ކައިރިއަށް އެއްވުމަށް އެ ޕާޓީން ވަނީ އެދިފައެވެ. އެ ހިނގާލުން ފަށާނީ ޕީޕީއެމް އޮފީސް ދޮރުމަތިންނެވެ.
މިނިވަންކަމުގެ ދިފާއުގައި ކަމަށް ބުނެ ޕީޕީއެމް އިން އަންނަނީ ސިލްސިލާކޮށް ގިނަ ހަރަކާތްތަކެއް ހިންގަމުންނެވެ.
