ސަރުކާރު ކޯލިޝަންގައި ހިމެނޭ އަދާލަތު ޕާޓީގެ މަޤްސަދަކީ، ލާދީނިއްޔަތުގެ މޫނުމަތީ ފުށް ޖެހުންކަމަށް ޖަމްއިއްޔަތުއް ސަލަފްގެ އިސް ބޭފުޅެއް ކަމަށްވާ އަލީ ރަމީޒު ވިދާޅުވެއްޖެއެވެ.
ޢަލީ ރަމީޒު އަދާލަތު ޕާޓީއަށް ފާޑުކިޔާފައި ވަނީ ސަލަފް ޖަމިއްޔާގެ ރައީސް އައްޝައިހް އަބްދުﷲ ބިން މުހައްމަދު އިބްރާހިމް ކުރެއްވި ޓުވީޓަކާއި ގުޅިގެންނެވެ. އިބްރާހިމް ކުރި ޓުވީޓުގައި ވިދާޅުވީ އިސްލާމީ ޝަރީޢަތުގެ ދާރިސުން ސަރުކާރުގެ މަޤާމުތަކުން ފޭކޮށް، އެއްކިބާކުރުމަކީ ދިވެހިރާއްޖެ ލާދީނީކުރުމުގެ އެމްޑީއެންގެ ޕްލޭންގެ ދަށުން، އެމްޑީޕީ ސަރުކާރުން ކުރަމުންދާ ކަމެއްކަމަށެވެ. އިސްލާމި ތަނބުތައް މުގުރުމުގައި މިޔަދު އަދާލަތުވެސް ހިއްސާވާކަމީ ހިތި ޙަޤީޤަތެއްކަމަށް އޭނާ ވަނީ ބުނެފައެވެ.
އިބްރާހިމްގެ ޓުވީޓާއި ގުޅިގެން އަލީ ރަމީޒު ވިދާޅުވީ އަދާލަތު ޕާޓީން ވިއްކަނީ ހިއްސާ އެކަންޏެއް ނޫންކަމަށެވެ. އަދާލަތު ޕާޓީއަކީ ލާދީނިއްޔަތުގެ މޫނުމަތީގައި ފުށް ޖަހައި ދިނުމަށް މަސައްކަތް ކުރާ ބަޔަކު ކަމަށް ވަނީ ވިދާޅުވިއެވެ.
ހިއްސާ އެކަންޏެއްނޫން ވިއްކަނީ. ލާދީނިއްޔަތުގެ މޫނުމަތީ ފުށް ޖަހައިދިނުން އެއީ އެބައިމީހުންގެ މައިގަނޑު މަސައްކަތް.
– އަލީ ރަމީޒު ކުރި ޓުވީޓެއްގައި ވިދާޅުވިއެވެ.
Hissaa ekanyeh noon vaneekee. Laadheeniyyathuge moonumathee fuh jahaidhinun eyee ebaimeehunge maigandu masaikkaiy. https://t.co/nBXPnS1f8Y
— Ali Rameez (@aliramyz) October 27, 2021
އަދާލަތު ޕާޓީއަށް މިފާޑުކިޔުން އަމާޒުވީ އައްޑޫ މީދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް މުހައްމަދު ތައްޔިބާ ދެކޮޅަށް ސުލޫކީ ފިޔަވަޅު އެޅުމަށް ޖުޑިޝަލް ސާވިސް ކޮމިޝަން (ޖޭއެސްސީ) އިން ނިންމުމާއި ގުޅިގެންނެވެ. ޖޭއެސްސީ ބަލާފައިވަނީ މީދޫ މެޖިސްޓްރޭޓް ކޯޓަށް ހުށަހެޅުނު މައްސަލައެއްގައި ތުހުމަތު ކުރެވޭ މީހާގެ ބަންދުގެ މުއްދަތު އިތުރުކުރުމަށް ކޯޓަށް ހާޒިރުކުރުމުން މައްސަލައިގައި ގޮތެއް ނިންމިއިރު ތައްޔިބް އަމަލުކުރެއްވީ ގާނޫނާ ހިލާފަށް ކަމަށް ބުނާ މައްސަލަ އެކެވެ.
މައްސަލަ ބެލުމަށްފަހު ޖޭއެސްސީން ބުނީ މައްސަލަ ރައްދުވާ ފަރާތް ގޭގައި ބަންދުކޮށްފައި ބެހެއްޓުމަށް ތައްޔިބް ނެރުއްވާފައިވާ އަމުރަކީ، އިޖުރާއަތާ ޚިލާފަށް ނެރުއްވާފައިވާ އަމުރެއްކަން ތަހުގީގު ކޮމިޓީއަށް ސާބިތުވެފައިވާ ކަމަށެވެ. ތައްޔިބްގެ މައްސަލަ ސާބިތުވާތީ އޭނާ އަށް ނަސޭހަތް ދިނުމާއެކު ކޮމިޝަނުން ކަނޑައަޅާ ތަމްރީން ޕްރޮގްރާމެއް ފުރިހަމަ ކުރުމަށް އެންގުމަށް ޖޭއެސްސީން ނިންމާފައިވެއެވެ.
