ސަރުކާރުގެ ބޯހިޔާވަހިކަމުގެ މަޝްރޫއުގެ ތެރެއިން މިހާރުވެސް 6،000 ހައުސިން ޔުނިޓްގެ މަސައްކަތް ކުރިއަށްދާ ކަމުގައި މިނިސްޓަރ އޮފް ޕްލޭނިން, ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ދުބާއީގައި ކުރިއަށްދާ އެކްސްޕޯ 2020ގައި ބޭއްވި ރާއްޖޭގެ އިންވެސްޓްމަންޓް ފޯރަމަށްފަހު ދައުލަތުގެ މިޑިއާއާއި، ވާހަކަ ދައްކަވަމުން މިނިސްޓަރ އަސްލަމް ވިދާޅުވީ، ހުޅުމާލޭގައި ފަސް ހާސް ހައުސިން ޔުނިޓުގެ ތިން މަޝްރޫޢެއް މިހާރުވެސް ކުރިއަށްދާކަމަށެވެ. އަދި އިތުރު ބައެއް ކުދި މަޝްރޫޢުތަކުގެ 1000 ހައުސިން ޔުނިޓުގެ މަސައްކަތާއެކު ޖުމްލަ 6000 ހައުސިން ޔުނިޓުގެ މަސައްކަތް މިވަގުތު ކުރިއަށްދާކަމަށެވެ.
އެ 6000 ހައުސިންއަކީ ކޮންޓެކްޓްގައި ސޮއިކުރެވި ފައިސާވެސް ހަމަޖެހި ކުރިއަށްދާ މަޝްރޫޢުތަކެއްކަމަށާއި، މަސައްކަތްކުރައްވަނީ 2023އާ ހަމައަށް އެ ޔުނިޓުތަކުގައި މީހުން ދިރިއުޅެވޭވަރު ކުރަން ކަމަށްވެސް މިނިސްޓަރ ވިދާޅުވިއެވެ. އަދި ސަރުކާރުން ކަނޑައަޅުއްވާފައިވާ ގޮތަށް 2023ގެ ނިޔަލަށް 10،000 ހައުސިން ޔުނިޓުގެ މަސައްކަތް ފެށޭނެކަމަށް އުއްމީދުކުރައްވާކަމަށްވެސް މިނިސްޓަރ އަސްލަމް ވިދާޅުވިއެވެ.
މާލޭގައި ބޯހިޔާވަހިކަން ބޭނުންވެފައިވާ މީހުންނަށް ޚާއްސަކޮށްގެން އިތުރު 4000 ހައުސިން ޔުނިޓް ހަދަން ބޭނުންވާ ފައިސާ ހަމަޖެހިފައިވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިޢުލާންކުރައްވާފައިވަނީ މި އަހަރުގެ ޖޫން މަހުގެ ތެރޭގައެވެ.
