އިދިކޮޅު ޕީޕީއެމްއަށް 10 އަހަރު މިއަދު ފުރޭއިރު، އެޕާޓީން ވަނީ ނިމިދިޔަ 10 އަހަރުގައި ވަރަށް ގިނަ ތަޖުރިބާތަކެއްކޮށްފައެވެ.
2011 ވަނަ އަހަރު އޮކްޓޯބަރު މަހުގެ 27 ވަނަ ދުވަހު އުފެއްދި މި ޕާޓީއަކީ ޑީއާރުޕީ ތެރެއިން ހަށި ފޮޅާލައި ނިކުތް މީހުންގެ ބުރަ މަސައްކަތުން މިހިސާބަށް ގެނެވިފައިވާ ޕާޓީއެކެވެ. ޕީޕީއެމް އުފެއްދުމުގައި މިހާރުގެ ޕާޓީގެ ލީޑަރު ރައީސް އަބްދުﷲ ޔާމީނާއި، މިހާރުގެ އެމްއާރުއެމްގެ ރައީސް މައުމޫން އަބްދުލް ޤައްޔޫމްގެ ދައުރުވެސް ބޮޑެވެ.
ޕީޕީއެމް އުފެއްދިތާ އެންމެ ދެ އަހަރުގެ ތެރޭގައި ވަނީ ރާއްޖޭގެ ވެރިކަމާއި ހަމައަށް އައިސްފައެވެ. މިއީ އަލަށް އުފެއްދި ޕާޓީއަކުން ވެރިކަމާއި ހަމައަށް އެހާ އަވަށް އާދެވުނު ފުރަތަމަ ފަހަރުވެސް މެއެވެ. ވެރިކަމުގެ ފަސް އަހަރުގެ ތެރޭގައި ޕީޕީއެމް ފެނިގެން ގޮސްފައިވަނީ ޚިޔާލު ތަފާތުވުން ބޮޑު، ސިޔާސީ ގޮތުން ބޮޑު ހަގުރަމާއެއް ކުރި ޕާޓީއެއްގެ ގޮތުގައެވެ. ނަމަވެސް އެ ވާދަވެރިކަމުގައިވެސް ވެރިކަމުގެ ފަސް އަހަރު ރައްޔިތުންނަށް ވަނީ މިއިން ޒަމާނަކު ނުފެންނަ ވަރުގެ ބޮޑެތި ތަރައްޤީ ގެނެސްދީފައެވެ.
ސިޔާސީ ގޮތުން އުފެދުނު ޚިޔާލަތު ތަފާތުންތަކުގައި ރައީސް މައުމޫނާއި ރައީސް ޔާމީންގެ ސިޔާސީ މަސައްކަތްތައް އަބަށް ވަނީ ނިމުމަކާއި ހަމައަށް އައިސްފައެވެ. މިވާދަވެރިކަމުގައި ރައީސް ޔާމީންގެ ވެރިކަމާއި ދިމާލަށް އަމާޒުވި ހުރިހާ ހަމަލާތަކަށް ހުށިޔާރުވެ ކުރިމަތިވި ގޮންޖެހުންތަކާއިއެކު މަލްޓިޕަޓީ ވެރިކަމުގެ ނިޒާމުގެ ތެރެއިން ފަސް އަހަރުގެ ދައުރެއް ނިންމާލި ފުރަތަމަ ރައީސަކީވެސް ޕީޕީއެމްގެ ރައީސް ޔާމީނެވެ.
ޕީޕީއެމްއިން ރާއްޖެއަށް ގެނެސްދިން ތަރައްޤީއަކީ އަދުގެ ސަރުކާރަށްވެސް އޮތް އެންމެ ބޮޑު ގޮންޖެހުމެވެ. ބްރިޖާއި، ފްލެޓްތަކާއި، 25 ބުރީގެ ހޮސްޕިޓަލާއި، ފެނާއި، ނަރުދަމައާއި، މަގު ހެދުމައި، ބަނދަރު ހެދުމާއި، ސްކޫލު ހެދުމާއި، ކުޅިވަރު ވަސީލަތްތައް ބިނާކުރުމާއި، އެތައް ހާސް ވަޒީފާއެއް އުފެއްދިކަމީ ރައްޔިތުންނަށް ލިބިގެންދިޔަ އެންމެ ބޮޑު ހިންހަމަ ޖެހުމެއެވެ.
ޕީޕީއެމްގެ ފަސް އަހަރުގެ ވެރިކަމުގައި ދިވެހިން ފަހުގެ ތަރީހެއްގައި ނުދެކޭފަދަ އެތައް ތަރައްޤީއެއް ގެނައި ނަމަވެސް ޕީޕީއެމްއާއި އިދިކޮޅު މިހާރުގެ ސަރުކާރާއި، ސަރުކާރަށް ތާއީދު ކުރާ ފަރާތްތަކުން ކުރާ ތުހުމަތުތަކަކީ ކޮރަޕްޝަންގެ ތުހުމަތުތަކެވެ. އެތުހުމަތުތަކުގެ ތެރެއިން އެމްއެމްޕީއާރުސީގެ ކޮރަޕްޝަންގެ މައްސަލައެއްގައި ޕީޕީއެމްގެ ރައީސް ޔާމީންގެ މައްޗަށް ކުށް ސާބިތުވެ މިހާރުވެސް ހުންނެވީ ޖަލު ހުކުމެއްގައެވެ. އިދިކޮޅު ފަރާތްތްތަކުން (ޕީޕީއެމް) އިން ބުނަމުންދަނީ މިއީ ސިޔާސީ ހުކުމެއްކަމަށެވެ.
ޕީޕީއެމްއަށް 10 އަހަރު ފުރިގެންދާއިރު އެޕާޓީން މިއަދު ކުރަމުންދާ އެންމެ ބޮޑު މަސައްކަތަކީ ޔާމީން މިނިވަން ކުރުމުގެ މަސައްކަތެވެ. އެއާއި، ޤައުމުގެ މިނިވަންކަމާއި ސިޔާސަދަތައި އިސްތިގުލާލަށް ނުރައްކާވާގޮތަށް އަދުގެ ސަރުކާރުން ކުރަމުންދާ ކަންތައްތަކާއި ދެކޮޅަށް އެޕާޓީން ދަނީ ވަރުގަދަ މަސައްކަތްތަކެއް ކުރަމުންނެވެ. މިމަސައްކަތުގައި މުޒާހަރާތަކާއި، އެއްވުންތަކައި، ޖަލްސާތައްވެސް ދަނީ ބާއްވަމުންނެވެ.
ޕީޕީއެމްގެ އަހަރީ ދުވަސް ފާހަހގަ ކުރާއިރު، މިއަދު ޚާއްސަ ހަރަކާތްތަކެއްވެސް ބޭއްވުމަށް އެޕާޓީން ވަނީ ނިންމާފައެވެ. މިގޮތުން މިރޭ ދިދަ ނެގުމުގެ ޚާއްސަ ރައްމިޔާތެއްވެސް ބޭއްވުމަށް ވަނީ ހަމަޖެހިފައެވެ. އެޕާޓީގެ އިސްވެރިންދަނީ ޕާޓީގެ އާންމު މެމްބަރުންނަށް ދުވަހުގެ ތަހުނިޔާ ފޮނުވަމުންނެވެ.
