ވޯލްޑް ޓްރެވަލްސް އެވޯޑްސް 2021 ގައި ރާއްޖެއަށް އިންޑިއަން އޯޝަން ކެޓަގަރީން ހަތަރު އެވޯޑެއް ލިބިއްޖެއެވެ.
އިންޑިއަން އޯޝަން ކެޓަގަރީން ރާއްޖެއަށް ލިބިފައިވާ އެވޯޑްތަކަކީ، އިންޑިއަން އޯޝަން ލީޑިންގ ޑެސްޓިނޭޝަން އެވޯޑް 2021، އިންޑިއަން އޯޝަން ލީޑިންގ ބީޗް ޑެސްޓިނޭޝަން އެވޯޑް 2021، އިންޑިއަން އޯޝަން ލީޑިންގ ޑައިވް ޑެސްޓިނޭޝަން 2021 އަދި އިންޑިއަން އޯޝަން ލީޑިން ޓުއަރިސްޓް ބޯޑް އެވޯޑެވެ. 1993 ވަނަ އަހަރު ދޭން ފެށި، މި ޝަރަފުވެރި އެވޯޑަކީ ދުނިޔޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުގެ އަގު ވަޒަންކުރުމުގައި ފާހަގަކޮށްލެވޭ މުހިންމު އެވޯޑެކެވެ.
އިންޑިއަން އޯޝަން ލީޑިންގ ޓުއަރިސްޓް ބޯޑްގެ އެވޯޑް ލިބިފައިވަނީ މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަނަށެވެ.
މި އެވޯޑްތައް ރާއްޖެއަށް ލިބުމާއެކު އެމްއެމްޕީއާރުސީގެ މެނޭޖިންގ ޑިރެކްޓަރު ތޮއްޔިބު މުހައްމަދު ވިދާޅުވީ ވޯލްޑް ޓްރެވަލްސް އެވޯޑް ހަފްލާގައި ރާއްޖެއިން މިއަހަރު ވެސް ފަޚުރުވެރި ކާމިޔާބީއެއް ހާސިލްކޮށްފައިވާ ކަމަށާއި، ހާއްސަކޮށް އިންޑިއަން އޯޝަން ލީޑިންގ ޑެސްޓިނޭޝަން އެވޯޑް ހާސިލްކުރުމަކީ ފަޚުރުވެރި ކާމިޔާބީއެއް ކަމަށެވެ. ތޮއްޔިބު ވަނީ މި ކާމިޔާބީ ހާސިލްކުރެވުނީ ފަތުރުވެރި ކަމުގެ ސިނާޢަތުގައި މަސައްކަތްކުރާ ފަރާތްތަކުގެ ބުރަ މަސައްކަތުންކަން ފާހަގަ ކުރައްވައި އެ ފަރާތްތަކަށް ޝުކުރުއަދާ ކުރައްވާފައެވެ.
ކޯވިޑާއި ގުޅިގެން ރާއްޖޭގެ ބޯޑަރުތައް 110 ދުވަހަށް ބަންދު ކުރުމަށް ފަހު އަލުން ހުޅުވީ މިދިޔަ އަހަރުގެ ޖުލައި 15 ވަނަ ދުވަހުއެވެ. މިދިޔަ އަހަރު ނިމުނުއިރު ރާއްޖެއަށް އައިސްފައިވަނީ 555,494 ފަތުރުވެރިންނެވެ. މި އަހަރު މިހާތަނަށް 923,146 ފަތުރުވެރިން ރާއްޖެއަށް ޒިޔާރާތްކޮށްފައިވެއެވެ. މި އަހަރު އެއް މިލިޔަނަށް ވުރެށް ގިނަ ފަތުރުވެރިން ދިވެހިރާއްޖެ ޒިޔާރާތްކުރާނެ ކަމަށް ޓޫރިޒަމް މިނިސްޓްރީން ލަފާކުރެއެވެ.
ފާއިތުވެދިޔަ 17 އަހަރު ތެރޭގައި 13 ފަހަރެއްގެ މަތިން ދިވެހިރާއްޖެ ވަނީ އިންޑިއަން އޯޝަންގެ އެންމެ މަޤުބޫލު މަންޒިލްގެ މަގާމު ހާސިލް ކޮށްފައެވެ. މިއަހަރުގެ ވަރލްޑް ޓްރެވަލް އެވޯޑްސްއަށް ރެކޯޑު އަދަދަކަށް ވޯޓު ލިބިފައިވެއެވެ. މިކަމުން ދައްކައިދެނީ މިފަދަ ދަނޑިވަޅެއްގައިވެސް ދަތުރު ފަތުރުކުރުން އަލުން ފަށައިގަންނަ އިރު، ފަތުރުވެރިން ދަތުރު ކުރުމަށް ޝައުގުވެރިވާ މިންވަރުކަމަށް އެމްއެމްޕީއާރުސީން ހާމަކުރެއެވެ.
