ދިވެހި ފުުލުހުންގެ ޚިދުމަތުގެ ވަޒީފާއަށް ޝައުގުވެރިވާ ފަރާތްތަކަށް އުފުރުސަތު ހުޅުވާލައިފިއެވެ.
ފުލުސް ރެކުރޫޓުންގެ ވަޒީފާއަށް ހުޅުވާލާފައިވާ ފުރުސަތުގައި މި މަޤާމަށް އެދި ހުށަހަޅާ ފަރާތްތަކުން ދިވެހި ފުލުހުންގެ ޚިދުމަތުން ދޫކުރާ ވަޒީފާއަށް އެދި ހުށަހަޅާ ފޯމާއި ވަޒީފާއަށް އެދޭ ފަރާތްތަކުގެ ކުށުގެ ރެކޯޑް ބަލާ ފޯމް ފުރިހަމަކުރުމަށްފަހު ހުށަހަޅަންޖެހޭ ލިޔުންތަކާއެކު ނޮވެންބަރު 16 ވަނަ ދުވަހުގެ 16:00 ގެ ކުރިން ޝަހީދު ޙުސައިން އާދަމް ބިލްޑިންގގެ ރިސެޕްޝަން ނުވަތަ އަތޮޅުތަކުގައި ޤާއިމްކުރެވިފައިވާ ޕޮލިސް ސްޓޭޝަންތަކުގެ ރިސެޕްޝަނަށް ހުށަހެޅުމަށް ވަނީ ދަންނަވާފައެވެ. މި މަޤާމަށް އެދި ހުށަހަޅާ ފޯމްތައް ބަލައިގަންނާނީ ރަސްމީ ބަންދު ނޫން ކޮންމެ ދުވަހެއްގެ މެންދުރުފަހު 14:00 އިން 16:00 އަށް ވަނީ ބުނެފައެވެ.
އަސާސީ މުސާރައޮގެ ގޮތުގައި -/4,650 ރުފިޔާއާއި، ސަރވިސް އެލަވަންސް: -/5,000 ރުފިޔާއާއި، ނޮން-ޕްރެކްޓިސް އެލަވަންސް: އަސާސީ މުސާރައިގެ %40 (-/1,860 ރުފިޔާ)ގެ އިތުރުން ޔުނީފޯމް އެލަވަންސް: -/300 ރުފިޔާ އާއިއެކު 11،000 ރުފިޔާގެ މުސާރައެއް ވަނީ މިވަޒީފާއަށް ކަނޑައަޅާފައެވެ. އަދި ވަޒީފާއަށް ރެކްރޫޓްކުރެވޭ ތާރީޚުން ފެށިގެން 03 މަސް ދުވަސް ހަމަވުމުން، ސަރވިސް އެލަވަންސް، ނޮން-ޕްރެކްޓިސް އެލަވަންސް، ޕްރޮފެޝަނަލް އެލަވަންސް (ޑިޕްލޮމާ – އަސާސީ މުސާރައިގެ ދިހަ އިންސައްތަ)، (ބެޗްލަރސް ޑިގްރީ – އަސާސީ މުސާރައިގެ ފަނަރަ އިންސައްތަ)، (މާސްޓަރސް – އަސާސީ މުސާރައިގެ ވިހި އިންސައްތަ) އަދި ފުލުހުންގެ ވަޒީފާއާބެހޭ ޤަވާޢިދުގައިވާ ގޮތުގެ މަތިން އެހެނިހެން އިނާޔަތްތަކާއި، އެލަވަންސްތައް ލިބޭނެ ކަމަށް ފުލުހުން ވަނީ ބުނެފައެވެ.
ވަޒީފާއަށް ކުރިމަތިލެވޭ ޝަރުތު ތަކަކީ ސާނަވީ ތަޢުލީމުގެ ޖީ.ސީ.އީ އޯ ލެވެލް އިމްތިޚާނު އަދި ސެކަންޑަރީ ސްކޫލް ސެޓްފިކެޓް އިމްތިޙާނު ހިމެނޭހެން 03 މާއްދާއިން ދަށްވެގެން "ސީ" ފާސް ލިބިފައިވުން، ނުވަތަ ޖީ.ސީ.އީ އޯ ލެވެލް އިމްތިޙާނު ނުވަތަ ސެކަންޑަރީ ސްކޫލް ސެޓްފިކެޓް އިމްތިޙާނު ހިމެނޭހެން 02 މާއްދާއިން ދަށްވެގެން "ސީ" ފާސް ލިބިފައިވުމާއެކު މޯލްޑިވްސް ކޮލިފިކޭޝަން އޮތޯރިޓީން ޤަބޫލުކުރާ ލެވެލް 3 ގެ ކޯހެއް ފުރިހަމަކޮށްފައިވުން ނުވަތަ އެއަށްވުރެ މަތީ ސަނަދެއް ހާޞިލްކޮށްފައިވާ ފަރާތަކަށްވުމެވެ.
ނުވަތަ ކެމްބްރިޖް އޯލެވެލް އިމްތިޚާނުގެ 4 މާއްދާއިން ދަށްވެގެން "ސީ" ފާސް ހާޞިލްކޮށްފައިވުން ނުވަތަ އެޗް.އެސް.ސީ އިމްތިޚާނުގެ ދިވެހި އަދި އިސްލާމް ނުހިމެނޭ ގޮތަށް އޭލެވެލްގެ 2 މާއްދާއިން ދަށްވެގެން "ސީ" ފާސް ހާޞިލްކޮށްފައިވާ ފަރާތެއްކަމުގައިވުމާއި، ސާނަވީ ތައުލީމު ފުރިހަމަކުރުމާއިއެކު، މިޚިދުމަތަށް އަލަށް މީހުން ރެކްރޫޓްކުރުމުގައި ބަލާ ފިޒިކަލް އެސެސްމަންޓުން ފާސްވުމަށް ކަނޑައެޅިފައިވާ މިންގަނޑުން "ސިލްވަރ" ލެވެލްގައި ފާސްވާ ފަރާތްތަކަށް ވުމެވެ.
މިއީ ކޯވިޑް-19ގެ ފަހުން ފުލުހުންގެ ވަޒީފާއަށް ހުޅުވާލި ފުރަތަމަ ފަހަރެވެ.
