ތައުލީމީ ރޮގުން ހޯދި ޢިލްމާއި ހުނަރު އެންމެ ފުޅާ ދާއިރާއެއްގައި ޤައުމަށް ފޯރުކޮށްދެއްވުމަށް އެޑިއުކޭޝަން މިނިސްޓަރ ޑރ. އައިޝަތު ޢަލީ ގޮވާލައްވައިފިއެވެ.
ގްރޭޑް 12 ނިންމާ އިމްތިޙާނުތަކުން ޚާއްޞަ ވަނަތައް ހޯދި ދަރިވަރުންގެ ކާމިޔާބީ ފާހަގަކުރުމަށް މިރޭ ބޭއްވި ހަފްލާގައި ވާހަކަ ދައްކަވަމުން މިނިސްޓަރ ވިދާޅުވީ އެންމެ ކާމިޔާބު ކުދީންކަމަށް ވެފައިވަނީ، އެ ކުދީން ހޯދި ޢިލްމާއި ހުނަރު އެންމެ ފުޅާ ދާއިރާއެއްގައި ޤައުމަށް ފޯރުކޮށްދީ، އެންމެ ގިނަ ބަޔަކަށް އެކުދީންގެ ހެޔޮ އަސަރުތައް ލިއްބައިދިން ކުދީންކަމަށެވެ. އެއީ ލިބޭ މުސާރައަށް ވުރެ، އިޖްތިމާޢީ މަންފާއަށް ޚިދުމަތުގެ އަތުކުރި އޮޅާލި ކުދީންކަމަށާއި، ޖެހުނު ކޮންމެ ކަމެއް ކުރަން ފަސް ނުޖެހި ކެރުނު ކުދީންކަމަށެވެ.
މައްސަލަތައް ހައްލުކުރުމަށް އިސްނަގައި، ވޮލަންޓިއަރ ކުރި ކުދީންކަން. އެތައް ބައެއްގެ ނަޒަރުގައި ދިރިއުޅުމުގެ ކާމިޔާބުގެ އެންމެ ބޮޑު ސިއްރަކީ، ވަކި އަމާޒަކަށް ދަތުރުކުރުމުގައި، ސާބިތުވެހުރުން. ދިމާވާ ހާދިސާތަކާއި ދަތިތަކުން ފަހަތަށް ނުޖެހި، ބޭސާބިތުކަމަށް ޖާގަނުދީ، ހިތްވަރާއެކު މަސައްކަތް ކުރުން.
– މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މަތީ ޘާނަވީ އިމްތިހާނު ނިންމާލުމަށްފަހު މިހާރު ތިޔަކުދިން ތިޔަތިބީ މަސައްކަތުގެ މުސްތަޤްބަލްގެ ދޮރޯށީގެ ކުރިމަތީގައިކަމަށެވެ. މައިންބަފައިންގެ ލޯތްބާއިއެކު ތިޔަކުދިން ބޮޑުވި ހާލިން ނުކުމެ އަމިއްލަ ފިޔަމަތީ އުދުހިގަންނަން ތައްޔާރުވެފައި ކަމަށާއި، އެތައްގިނަ ގުނަ ފަހި ފުރުސަތުތަކެއްގެ ކުރިމަތީގައި ވާކަމަށެވެ. އަދި އެ ދޮރޯށިން ނުކުމެ އުދުހެން ފަށާއިރު ވިސްނުމުގައި ބަހައްޓަންޖެހޭ ކަންތައްތަކެއްވާކަމަށް މިނިސްޓަރ ވަނީ ހަނދާކޮށްދެއްވާފައެވެ
އެއީ ތިމާ ދިރިއުޅުމުގައި ކާމިޔާބު މީހަކަށްވަނީ ހަމައެކަނި އުނގެނޭ ތަކެތިން ނޫންކަން. ތިމާ ކާމިޔާބު މީހަކަށްވުމަށްޓަކައި އެހެނިހެން ސިފަތަކާއި ހުނަރުތަކެއް ބޭނުންވާކަން. ވޭތިވެދިޔަ 30 ވަރަކަށް އަހަރުގެ ތެރޭގައި މި ސްޓޭޖްގެ މަތީން ތިޔަ ފަދަ އެތައް ހާސް ކުދީންނެއް، މިރޭ ތިޔަ ޙާޞިލްކުރާ ފަދަ ވަނަތަކާއި ސަނަދުތައް ހިފައިގެން ގޮސްފައިވޭ. އެ ކުދީންގެ ޙަޔާތުގެ ނަތީޖާތަކަށް ނަޒަރު ހިންގާލުމުން ފާހަގަ ކޮށްލެވޭ އެންމެ މުހިއްމު ކަމަކީ، އެންމެ ބޮޑު އަސަރެއް މުޖުތަމަޢުއަށް ގެނެސްފައިވަނީ ހަމައެކަނި ތަޢުލީމީގޮތުން މޮޅު ކުދީން ނޫންކަން.
– މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިރޭ މަހެފިލުން އަޅުގަނޑުމެންނަށް މި ފެންނަނީ ކިޔެވުމުގެ ރޮގުގައި ވިދާ ބަބުޅާ އަލިގަދަ ތަރިތަކެއްކަމަށެވެ. ސްކޫލުތަކުގައި އެކި ރޮނގުރޮނގުން ވިދާ ބަބުޅާ އެތައް ތަރިތަކެއް މިރޭ ފެނިގެންދާއިރު، ކިޔެވުމުގެ ރޮނގުން އަރުތަވެރިން ފާހަގަކުރާ ބީދައިން އެފަދަ ދަރިވަރުންގެ ހުނަރުތަކާއި ޤާބިލިއްޔަތުވެސް ފާހަގަ ކުރަންޖެހޭކަމަށެވެ. އަދި ކޮންމެ ކުއްޖެއްގެ ޝައުގު ދެނެގަނެ އެ ދާއިރާއަކުން އެކުދިން ކުރިއަށް ގެންދިއުމަށް މަސައްކަތް ކުރަންޖެހޭ ކަމަށް މިނިސްޓަރ ވިދާޅުވިއެވެ.
ޢިލްމު އުނގެނުމަށް އޮންނަ އެންމެ ބޮޑު ހުރަހަކީ ތިމާއަށް މާ ގިނަ ތަކެތި އެނގޭކަމަށް ހީވުން ކަމަށާއި، މާ މޮޅުކަމަށް އަމިއްލައަށް ދުށުން ކަމަށް މިނިސްޓަރ ވިދާޅުވިއެވެ. އަދި މިއީ ވަރަށް ބޮޑު މައްސަލައެއް ކަމަށާއި، ކާމިޔާބުގެ ވަގުތުގައި ތިޔަ ކުދީން ހިތްތިރިކޮށް ތަވާޟުޢުވެރިކަން އިސްކުރުމަށް މިނިސްޓަރ ވަނީ ގޮވާލާފައެވެ.
