އެމެރިކާގެ ކުރީގެ ރައީސް ބިލް ކުލިންޓަން، ކުޑަކަމުދާ ނިޒާމުގެ އާލާސްކަންފުޅަކަށް ފަރުވާ ހޯއްދެވުމަށް ހޮސްޕިޓަލުގައި އެޑްމިޓް ކޮށްފައި އޮންނެވުމަށް ފަހު ހޮސްޕިޓަލުން ދޫކޮށްލައިފިއެވެ.
އެމެރިކާގެ ލޯކަލް މީޑިއާތަކުން ކުލިންޓަންގެ ޑޮކްޓަރާއި ހަވާލީދީ މީގެ ކުރިން ހާމަ ކޮށްފައިވާ ގޮތުގައި ކުލިންޓަން އެޑް ކޮށްފައިވަނީ، ކޯވިޑް19އާއި ގުޅުމެއް ނެތް، އެހެންނަމަވެސް ކުޑަކަމުދާ ނިޒާމުގައި އުފެދުނު އިންފެކްޝަންއެއް ލޭގެ ތެރެއަށް ފެތުރިގެން ގޮސްފައިވާތީ، އެ މައްސަލައަށް ފަރުވާ ހޯދުމަށްޓަކާ، ޔުނިވަރސިޓީ އޮފް ކެލިފޯނިއާ އަޔަރވިން މެޑިކަލް ސެންޓަރގެ އައިސީޔޫގައެވެ.
"އައިސީޔޫގައި ކުލިންޓަން އެޑްމިޓް ކުރެވިފައިވަނީ، އެންޓިބައޮޓިކްސް ދިނުމަށްފަހު، ގާތުން ހާލަތު މޮނިޓަރ ކުރުމަށްޓަކާ. އަދި ކުލިންޓަން، ފަރުވާ ދިނުމަށްޓަކާ އެޑްމިޓް ކޮށްފައިވާ ބާއްވާގޮތަށް ވަނީ ހަމަޖެހިފަ،" ޔުނިވަރސިޓީ އޮފް ކެލިފޯނިއާ އަޔަރވިން މެޑިކަލް ސެންޓަރގެ ޗެއަރ އޮފް މެޑިސިން ޑރ. އަލްޕެޝް އަމިން އާއި ކުލިންޓަންގެ ޕާސަނަލް ޕްރައިމަރީ ފިޒިޝަން ޑރ. ލިސާ ބާރޑަކް، ކުލިންޓަން އެޑްމިޓް ކުރުމާއެކު، ގުޅިގެން ނެރުއްވި ބަޔާނެއްގައި ވިދާޅުވެފައި ވެއެވެ.
މި ބަޔާނުގައި ހާމަ ކޮށްފައިވާ ގޮތުގައި ކުލިންޓަން އައިސީޔޫގައި އެޑްމިޓް ކުރެވިފައިވަނީ، އިންޓެންސިވް ކެއަރ ބޭނުންވާތީ ނޫންކަމަށާއި، އައިސީޔޫގައި އެޑްމިޓް ކުރެވިފައިވަނީ ޕްރައިވެސީއާއި އަދި ރައްކާތެރިކަމުގެ ގޮތުން ކަމުގައެވެ.
ކުލިންޓަން ޔުނިވަރސިޓީ އޮފް ކެލިފޯނިއާ އަޔަރވިން މެޑިކަލް ސެންޓަރގެ އައިސީޔޫއިން ނިކުންނަވާފައިވަނީ، އޭނާގެ އަނބިކަބަލުން ހިލަރީ ކުލިންޓަންގެ ކޮނޑުގައި ހިންޕަވައިގެން، ހިލަރީ ކުލިންޓަންގެ އެހީތެރިކަމުގައި ހިންގަވާފައެވެ. އަދި ހިންގަވާފަ ވަޑައިގެންނެވި އިރު ކުލިންޓަންވަނީ، ހޮސްޕިޓަކުގައި އޭނާއަށް ފަރުވާ ދިން މެޑިކަލް ޓީމުގެ މީހުންނާ ސަލާމްކޮށް އެމީހުންނާއެކީ ފޮޓޯ ނަންގަވާ ހައްދަވާފައެވެ.
ކުލިންޓަންގެ ޑޮކްޓަރ އަލްޕެޝް އަމިން އާންމި ކުރައްވާފައިވާ ބަޔާނެއްގައި ބުނެފައިވަނީ، އެންޓި ބައޮޓިކްސް ފުރިހަމަ ކުރުމަށްޓަކާ އޭނާ ވަޑައިގަންނަވާނީ ނިއުޔޯކުގައި ހުންނަ އޭނާގެ ގެއަށެވެ. އަދި މި ބަޔާނުގައި ބުނެފައިވަނީ، ކުލިންޓަންގެ ހުމާއި އަދި ވައިޓް ބްލަޑް ސެލްތަކުގެ އަދަދުވެސް ހަމަޔަކަށް އެޅިފައިވާ ކަމުގައެވެ.
އަމިއްލަ ފައުންޑޭޝަންގެ އިވެންޓެއްގައި ހުންނަވަނިކޮށް ކުލިންޓަންގެ ބޮލަށް އެނބުރުން އަރާފައިވަނީ ފާއިތުވެދިޔަ ހަފްތާގެ އަންގާރަ ދުވަހުއެވެ. އަދި ޓެސްޓުތަކަށްފަހު ޑޮކްޓަރުން ނިންމެވީ އޭނާ ހޮސްޕިޓަލުގައި އެޑްމިޓް ކުރުމަށް ކަމަށް އޭނާގެ އޮފީހުން މައުލޫމާތު ދީފައި ވެއެވެ.
މިހާރު އުމުރުން 75 އަހަރުގެ ބިލް ކުލިންޓަންވަނީ 2004 ވަނަ އަހަރު ބައިޕާސް ހައްދަވާފައެވެ. އަދި 2010ވަނަ އަހަރު ހަށިގަޑު ލޭނާރެއް (އާރޓެރީއެއް) ހުޅުވާފަ ބެހެއްޓުމަށް ވަނީ ދެ ސްޓެންޓެއް ލައްވާފައެވެ.
