އިނގިރޭސި ގާނޫނުހަދާ މަޖިލިހުގެ މެމްބަރެއް ކަމުގައުވާ ޑޭވިޑް އަމަސްއަށް ވަޅި ހަމަލާދީ އަވަހާރަ ކޮށްލާފައިވަނީ ޓެރަރިސް ހަމަލާއެއްގައި ކަމުގައި އިނގިރޭސި ފުލުހުންގެ ފަރާތުން ހާމަ ކޮށްފިއެވެ.
އިނގިރޭސި ގާނޫނު ހަދާ މަޖިލިހުގެ މެމްބަރެއްގެ ގޮތުގައި ދިގު މުއްދަތެއް ވަންދެން ހުންވަމުން އައި މެމްބަރެއް ކަމުގައިވާ ޑޭވިޑް އަމެސް، އަވަހާރަ ކޮށްލާފައިވަނީ، އޭނާގެ ދާއިރާގައި، ލަންޑަނުގެ އިރުމަތީ އަވަށެއްގައި ބައްދަލުވުމެއްގައި އިންނަވަނިކޮށެވެ.
ފުލުހުންގެ ފަރާތުން މައުލޫމާތު ދީފައިވާގޮތުގައި، ޑޭވިޑަށް ހަމަލާ ދިނުމުގެ ތުހުމަތުގައި 25 އަހަރުގެ މީހަކު ވަނީ މިހާރު ހައްޔަރު ކުރެވިފައެވެ. ޑޭވިޑަށް ވަޅިން ހަމަލާ ދީފައިވަނީ، އޭނާ ޗާޗެއްގައި ދާއިރާގެ މީހުންނާ ބައްދަލު ކުރަމުން ދަނިކޮށެވެ.
މިހަމަލާ ތަހުގީގު ކުރަމުންދާ މެޓްރޯޕޮލިޓަން ޕޮލިހުންގެ ފަރާތުން މައުލޫމާތު ދީފައިވާ ގޮތުގައި ޑޭވިޑް އަވަހާރަ ކޮށްލުމާއި އިސްލާމިކް އެކްޓްރީމިޒަމް (ދީނީގޮތުން ހައްދު ފަހަނަ އަޅާ ދިއުން)އާއި ގުޅުން އޮތްކަމަށް މިހާތަނަށް ކުރެވިފައިވާ ތަހުގީގަށް ވަނީ ފާހަގަ ކުރެވިފައެވެ.
އަދި މި ހަމަލާ ދިނުމުގެ ތުހުމަތުގައި 25 އަހަރުގެ މީހަކު މިހާރު ހައްޔަރު ކުރެވިފައި ވާއިރު، ހަމަލާއާއި ގުޅިގެން އިތުރު މީހަކު ހައްޔަރު ކުރުމަށް މިހާރު މަސައްކަތް ކުރެވެމުން ނުދާކަމުގައިވެސް މެޓް ޕޮލިހުންގެ ފަރާތުން މައުލޫމާތު ދީފައި ވެއެވެ. މިހާދިސާ ތަގުގީގު ކުރަމުންދާ ޓީމުން މިހާރުވަނީ، ލަންޑަނުގެ ދެ ގެއެއް ބަލާ ފާސް ކޮށްފައެވެ.
މިގޮތުން ކުރިޔަށްދާ ތަހުގީގުގައި، މިހަމަލާ ދީފައިވަނީ އެންމެ މީހަކުކަމަށް މިހާތަނަށް ބެލެވިފައިވި ނަމަވެސް، ހަމަލާއާއި ގުޅުހުރި ހުރިހާ ކަމެއްގެ މައްޗަށް މިހާރުވެސް ތަހުގީގު ކުރިޔަށް ދާކަމަށް ފުލުހުންގެ ފަރާތުން ވަނީ ބުނެފައެވެ.
ބީބީސީއިން ހާމަ ކޮށްފައިވާ ގޮތުގައި، ޑޭވިޑްއަށް ވަޅިން ހަމަލާދީ އޭނާ އަވަހާރަ ކޮށްލި ކަމުގެ ތުހުމަތުގައި ހައްޔަރު ކުރެވިފައިވަނީ، ސޯމާލިއާގެ ދަރިފަސްކޮޅަކާއި ގުޅުންހުރި، އިނގިރޭސި ރައްޔިތެކެވެ.
އިނިގިރޭސިވިލާތުގެ ގާނޫނުހަދާ މަޖިލީހުގެ އެންމެ ތަޖުރިބާކާރު އެއް މެމްބަރު ކަމަގައިވާ، އުމުރުން 69 އަހަރުގެ ސަރ ޑޭވިޑްއަކީ 1983 ވަނަ އަހަރުން ފެށިގެން ގާނޫނު ހަދާ މަޖިލިހުގެ މެމްބަރުކަން ކުރައްވަމުން ގެންދަވާ ބޭފުޅުކެވެ. އޭނާގެ އަންބަކާ 5 ކުދިން އެބަތިއްބެވެ.
ޑޭވިޑަށް މީހަކު ވަޅިން ހަމަލާ ދިންއިރު، އޭނާ ގެންދެވީ އޭނާގެ ދާއިރާގެ މީހުންނާއި، ބެލްފެއާސް މެތޮޑިސްޓް ޗާޗްގައި ބައްދަލު ކުރައްވަމުންނެވެ.
އިނގިރޭސިވިލާތުގެ އެސެކްސް ފުލުހުންގެ ފަރާތުން ބުނެފައިވަނީ، އިނގިރޭސިވިލާތުގެ ހުކުރުދުވަހުގެ މެދުރު ގަޑިން 12:05ގައި މީހެއްގެ ގަޔަށް ވަޅި ހަރައިގެން އުޅޭކަމުގެ މައުލޫމާތު ލިބިގެން ފުލުހުން މިހާދިސާ ހިގި ސަރަހައްދަަށް ދިޔައިރު، ވަޅިން ހަމަލާދީ މީހަކު ޒަޚަމް ކޮށްލާފައިވާ ކަމަށެވެ.
އަދި އެމަޖެންސީ ސާވިސްއިން ވަގުތުން އޭނާއަށް ފަރުވާ ދީފައިވާ ކަމަށާއި އެހެންނަމަވެސް، ހަމަލާ ދިން ތަނުގައި ޑޭވިޑް މަރުވެފައިވާ ކަމަށެވެ.
ސާރ ޑޭވިޑް އަމެސްއަކީ، ފާއިތުވި 40 އަހަރު އިނގިރޭސިވިލާތުގެ ގާނޫނުހަދާ މަޖިލިހުގައި އިންނަވާފައިވާ ބޭފުޅެކެވެ. އޭނާ އެންމެ ފުރަތަމަ ގާނޫނުހަދާ މަޖިލިހަށް އިންތިޚާބު ވެވަޑައިގަތީ 1983 ވަނަ އަހަރު ބަސިލްޑަންގެ މެމްބަރެއްގެ ގޮތުގައެވެ.
