އެމެރިކާގެ ކުރީގެ ރައީސް ބިލް ކުލިންޓަން ހޮސްޕިޓަލުގައި އެޑްމިޓް ކޮށްފިއެވެ.
އެމެރިކާގެ ލޯކަލް މީޑިއާތަކުން ކުލިންޓަންގެ ޑޮކްޓަރާއި ހަވާލީދީ ހާމަ ކޮށްފައިވާ ގޮތުގައި ކުލިންޓަން އެޑް ކޮށްފައިވަނީ، ކޯވިޑް19އާއި ގުޅުމެއް ނެތް، އެހެންނަމަވެސް ކުޑަކަމުދާ ނިޒާމުގައި އުފެދުނު އިންފެކްޝަންއެއް ލޭގެ ތެރެއަށް ފެތުރިގެން ގޮސްފައިވާތީ، އެ މައްސަލައަށް ފަރުވާ ހޯދުމަށްޓަކާ، ޔުނިވަރސިޓީ އޮފް ކެލިފޯނިއާ އަޔަރވިން މެޑިކަލް ސެންޓަރގެ އައިސީޔޫގައެވެ.
"އައިސީޔޫގައި ކުލިންޓަން އެޑްމިޓް ކުރެވިފައިވަނީ، އެންޓިބައޮޓިކްސް ދިނުމަށްފަހު، ގާތުން ހާލަތު މޮނިޓަރ ކުރުމަށްޓަކާ. އަދި ކުލިންޓަން، ފަރުވާ ދިނުމަށްޓަކާ އެޑްމިޓް ކޮށްފައިވާ ބާއްވާގޮތަށް ވަނީ ހަމަޖެހިފަ،" ޔުނިވަރސިޓީ އޮފް ކެލިފޯނިއާ އަޔަރވިން މެޑިކަލް ސެންޓަރގެ ޗެއަރ އޮފް މެޑިސިން ޑރ. އަލްޕެޝް އަމިން އާއި ކުލިންޓަންގެ ޕާސަނަލް ޕްރައިމަރީ ފިޒިޝަން ޑރ. ލިސާ ބާރޑަކް ގުޅިގެން ނެރުއްވި ބަޔާނެއްގައި ވިދާޅުވެފައި ވެއެވެ.
މި ބަޔާނުގައި ހާމަ ކޮށްފައިވާ ގޮތުގައި ކުލިންޓަން އައިސީޔޫގައި އެޑްމިޓް ކުރެވިފައިވަނީ، އިންޓެންސިވް ކެއަރ ބޭނުންވާތީ ނޫންކަމަށާއި، އައިސީޔޫގައި އެޑްމިޓް ކުރެވިފައިވަނީ ޕްރައިވެސީއާއި އަދި ރައްކާތެރިކަމުގެ ގޮތުން ކަމުގައެވެ.
ކުލިންޓަންގެ ޑޮކްޓަރާއި އަދި މުވައްޒަފުން މައުލޫމާތު ދީފައިވާ ގޮތުގައި އޭނާ ހޮސްޕިޓަލުގައި އޮންނެވީ ވަރަށް ވަރުގަދަ ރޫހެއްގައި ކަމަށާއި، އަދި އަމިއްލައަށް ހިންގަވާ އުޅުއްވުމުގެ އިތުރުން އާއިލީ ބޭފުޅުންނާ ވާހަކަ ދައްކަވާ ހައްދަވަމުންވެސް ގެންދަވާ ކަމުގައެވެ.
"ދެދުވަހުގެ ފަރުވާއަށްފަހު، ކުލިންޓަންގެ ވައިޓް ބްލަޑް ސެލްތަކުގެ އަދަދު ދަނީ ދަށްވަމުން، އަދި ގެންދަވަނީ އެންޓިބައޮޓިކްގެ އަސަރު ވަރަށް ރަގަޅަށް ކުރަމުން،" ކުލިންޓަންގެ ޑޮކްޓަރު ވިދާޅުވެފައި ވެއެވެ. "އަހަރެން އުއްމީދު ކުރަނީ އޭނާއަށް ވަރަށް އަވަހަށް ގެއަށް ދެވޭނެކަމަށް."
އަމިއްލަ ފައުންޑޭޝަންގެ އިވެންޓެއްގައި ހުންނަވަނިކޮށް ކުލިންޓަންގެ ބޮލަށް އެނބުރުން އަރާފައިވަނީ ފާއިތުވެދިޔަ ހަފްތާގެ އަންގާރަ ދުވަހުއެވެ. އަދި ޓެސްޓުތަކަށްފަހު ޑޮކްޓަރުން ނިންމެވީ އޭނާ ހޮސްޕިޓަލުގައި އެޑްމިޓް ކުރުމަށް ކަމަށް އޭނާގެ އޮފީހުން މައުލޫމާތު ދީފައި ވެއެވެ.
މިހާރު އުމުރުން 75 އަހަރުގެ ބިލް ކުލިންޓަންވަނީ 2004 ވަނަ އަހަރު ބައިޕާސް ހައްދަވާފައެވެ. އަދި 2010ވަނަ އަހަރު ހަށިގަޑު ލޭނާރެއް (އާރޓެރީއެއް) ހުޅުވާފަ ބެހެއްޓުމަށް ވަނީ ދެ ސްޓެންޓެއް ލައްވާފައެވެ.
