ކައުންސިލްތައް ހިންގުމަށް މިސަރުކާރުން އެއްބާރުލުން ނުދޭކަމަށްބުނެ ކައުންސިލްތަކުގެ ޕީޕީއެމަށް ނިސްބަތްވާ ރައީސުން ކަންބޮޑުވުން ފާޅުކޮށްފިއެވެ.
ކައުންސިލްތަކުގެ ބައެއް ރައީސުން އެ ކަންބޮޑުވުން ފާޅުކޮށްފައިވަނީ، ކައުންސިލްތަކުގެ ރައީސުންގެ ތެރެއިން މިހާރު މާލޭގައި ތިއްބެވި ޕްރޮގްރެސިވް ޕާޓީ އޮފް މޯލްޑިވްސްއަށް ނިސްބަތްވާ ރައީސުންނާއި ބައެއް ކައުންސިލަރުންނާ މިއަދު ޕްރޮގްރެސިވް ކޮންގްރެސް ކޯލިޝަންގެ ލީޑަރޝިޕުން ބޭއްވި ބައްދަލުކުރެއްވުމުގައެވެ.
މިއަދު ޕީޕީއެމް އޮފީހުގައި ބޭއްވި މިބައްދަލުވުމުގައި ކައުންސިލްތަކުން ވަނީ ރައީސް ޢަބްދުﷲ ޔާމީން ޢަބްދުލްޤައްޔޫމަށް ނުޙައްގުން މިސަރުކާރުން ދެމުންގެންދާ އަނިޔާ ކުށްވެރި ކުރައްވާފައެވެ. އަދި ރައީސް ޔާމީން މިނިވަން ކުރުމަށްޓަކައި އެބޭފުޅުންނަށް ކުރެއްވެން ހުރި ހުރިހާ މަސައްކަތެއް ކުރައްވާނެ ކަމުގެ ޔަގީންކަން ދެއްވާފައެވެ. މީގެ އިތުރުން "މިނިވަންކަމުގެ ދިފާއުގައި ދިވެހިން" މި ކެމްޕެއިން އަތޮޅުތަކުގައި ވަރަށް ފޯރިއާއެކު ކުރިއަށްދާ ކަމަށާއި ޕެޓިޝަންގައި ސޮއިކުރުމުގެ ޙަރަކާތްތައްވެސް ވަރަށް ފޯރީގައި ކުރިއަށް ގެންދަވާނެ ކަމަށް ވިދާޅުވިއެވެ. އަދި މިހާރު ރަށްރަށާއި ކައުންސިލްތަކާ އަދި ޕާޓީއާއެކީ ވަރަށް ރަނގަޅު ގުޅުމެއް އުފެދިފައިވާ ކަން ފާހަގަކޮށް ޕާޓީގެ ހަރަކާތްތައް ރަށްރަށުގައި އިތުރަށް ފުޅާކުރުމާ ގުޅޭގޮތުން ލީޑަރޝިޕާއި މަޝްވަރާ ކުރެއްވިއެވެ.
ކައުންސިލްތަކުގެ ރައީސުންވަނީ ކައުންސިލްތައް ހިންގުމަށް މިސަރުކާރުން އެއްބާރުލުން ނުދޭތީ އެކަމާ ކަންބޮޑުވުން ފާޅުކުރައްވާފައެވެ. އެގޮތުން ކައުންސިލްތަކަށް ޤާނޫނީ ބާރު ދީފައިވީ ކަމުގައިވިޔަސް ކައުސިލްތަކުން ބޭނުންވާ ބަޖެޓު ސަރުކާރުން ސަރުކާރުން ހަމަޖައްސައިނުދޭތީއާއި، ޤާނޫނުން ކުރުމަށް ލާޒިމުކުރާ ކަންކަން ކުރުމަށްވެސް ބަޖެޓު ނުލިބޭކަމުގެ ކަންބޮޑުވުން ފާޅުކުރައްވާފައެވެ. އަދި ކައުންސިލްތަކުން ސަރުކާރުގެ އިދާރާތަކަށް ފޮނުވާ ސިޓީތަކަށާއި ކުރެވޭ މުޢާމަލާތްތަކަށް އިޖާބަނުދޭކަންވެސް ފާހަގަކުރެއްވިއެވެ. އަދި ކައުންސިލްތައް ހިންގުމަށާއި ރައްޔިތުންނަށް ޚިދުމަތް ކުރުމަށް ހުރި ދަތިތައް ޕީޕީއެމް ޕީއެންސީގެ ލީޑަރޝިޕާއި ހިއްސާކުރެއްވިއެވެ.
ޕްރޮގްރެސިވް ކޮންގްރެސް ކޯލިޝަންގެ ލީޑަރޝިޕުންވަނީ ކައުންސިލްތަކަށް ދިމާވާ ދަތިތައް ހައްލުކުރުމަށް އިދިކޮޅު ސިޔާސީ ކޯލިޝަންގެ ގޮތުގައި ކުރަންޖެހޭ ހުރިހާކަމެއް ކުރަމުންދާނެ ކަމުގެ ފުރިހަމަ ޔަގީންކަން އަރުވާފައެވެ. އަދި ޕާޓީގެ ސިޔާސީ ޙަރަކާތްތައް ރަށްރަށުގައި ފުޅާކުރުމާއި، މެމްބަރުން އިތުރުކުރުމާއި، އަދި މިހާރު ރަށްރަށުގައި އެކުލަވާލެވިފައިވާ ސްޓިއަރިންގ ކޮމިޓީތަކުގެ މަސައްކަތްތަކާ ބެހޭގޮތުން އެބޭފުޅުންނާއި ލީޑަރޝިޕުން މަޝްވަރާ ކުރެއްވިއެވެ. އަދި ޕްރޮގްރެސިވް ކޮންގްރެސް ކޯލިޝަނުން އަތޮޅުތަކާއެކު އޮންނަ ގުޅުން އިތުރަށް ފުޅާކުރުމާ ގުޅޭގޮތުންވެސް މަޝްވަރާ ކުރެއްވިއެވެ.
މިއަހަރުގެ އޭޕްރީލް މަހު ބޭއްވި ކައުންސިލްތަކުގެ އިންތިޚާބުގައި އިދިކޮޅު ޕީޕީއެމް އިންވެސް ވަނީ ގިނަ ގޮނޑިތަކެއް ކާމިޔާބުކޮށްފައެވެ.
