މާލެ ތަރައްޤީ ވެފައިވަނީ ރަށްރަށުން މީހުން މާލެއައިސްގެން ކަމަށާއި، މާލޭގެ ރައްޔިތުންނަށްވެސް ރަށްރަށް ގޮސް ރަށްރަށްވެސް ތަރައްޤީވުމުގެ ފުރުސަތު ލިބެންޖެހޭކަމަށް ޕްލޭނިން މިނިސްޓަރު މުޙައްމަދު އަސްލަމު ވިދާޅުވެއްޖެއެވެ.
ރައްޔިތުންގެ މަޖިލީހުގެ ތުލުސްދޫ ދާއިރާގެ މެންބަރު ކުރެއްވި ސުވާލަކަށް ޖަވާބުދެއްވުމަށް މަޖިލީހަށް ވަޑައިގެން އިތުރު ސުވާލުގެ ވަގުތުގައި ރައްޔިތުންގެ މަޖިލީހުގެ މެޖޯރިޓީ ލީޑަރު އަލީ އާޒިމް ކުރެއްވި ސުވާލަށް ޖަވާބު ދެއްވަމުން އަސްލަމް ވިދާޅުވީ، މާލެ ތަރައްޤީވެ ކުރިއަރާފައިވަނީ އަތޮޅު ތެރޭގެ ރައްޔިތުން މާލެ އައިސް މާލެ ތަރައްޤީ ކުރުމަށް ކުރި މަސައްކަތުން ކަމަށެވެ.
ނަމަވެސް މާލޭގެ ރައްޔިތުންނަށް އަތޮޅު ތެރޭގެ ރަށްތަކުގައި ވަޒަންވެރިވެ، ބިން ލިބޭނެ ގޮތެއް ނެތުމަކީ ކަންބޮޑުވުމެއްކަމަށް ވަޒީރު ވިދާޅުވިއެވެ. މިއީ 21 ވަނަ ގަރުނަށްވާއިރު ރާއްޖޭގެ އެއްވެސް ރައްޔިތަކަށް އެމީހަކު ބޭނުން ތަނެއްގައި ވަޒަންވެރި ވުމުގެ ފުރުސަތު މަނާވެގެން ނުވާނެކަމަށާއި، އެއީ ވަރަށް ބޯދާ ވިސްނުމެއްކަމަށް މަޖިލިސް ރައީސް ވިދާޅުވިއެވެ.
މާލެއިން ލިބިފައިވާ ބިން ދޫކޮށްލުމުން ފުލެޓެއް ނުވަތަ ގޯއްޗެއް ދިނުމަށް މި ސަރުކާރުން ވެފައިވާ ވައުދު ފުއްދުމުގެ ގޮތުން ހިންގާ ޕްރޮގުރާމުގެ ދަށުން ދޫކުރާނީ 1،200 ގޯތިކަމަށް މިއަދުގެ ޖަލްސާގައި މިނިސްޓަރ އަސްލަމް ވަނީ ވިދާޅުވެފައެވެ. އަސްލަމް ވިދާޅުވީ ރައީސް މުޙައްމަދު ނަޝީދުގެ ވެރިކަމުގައި ހިންގެވި ވެށިފަހި މާލެ ޕްރޮގުރާމުގެ ދަށުން ގޯތި ދޫކޮށްލި ބައެއް ފަރާތްތަކަށް ގޯތި ދޫނުކުރެވި އެބަހުރި ކަމަށެވެ.
މިނިސްޓަރު އިތުރަށް ވިދާޅުވީ އެ މަސައްކަތަކީ އޭނާ ކުރައްވަން ބޭނުންފުޅުވާ މަސައްކަތެއް ކަމަށެވެ. އަދި އެ ފަރާތްތަކަށް ގޯތި ދޫކުރުމަކީ ކުރައްވަން އެދިވަޑައިގަންނަވާ ކަމެއް ކަމުގައިވީ ނަމަވެސް އޭނާގެ އަތްޕުޅުވަނީ ބަނދެވިފައި ކަމަށާއި، އޭނާއަށްވެސް މަސައްކަތްކުރެވޭނީ ޤާނޫނީ އިދާރާތަކުން ކަނޑައަޅާ އިންތަކުގެ ތެރެއިން ކަމަށެވެ.
ރައީސް ނަޝީދުގެ ވެރިކަމުގައި ހިންގެވި ވެށިފެހި ޕްރޮގުރާމުގެ ދަށުން ގޯތި ދޫކޮށްލުމުން ގޯތި ލިބިފައި ނެތް ފަރާތްތަކަށް ގޯތި ދިނުމުގެ އިތުރަށް މާލެއިން ގޯތި ދޫކުރާ ފަރާތްތަކަށް ގޯތި ދިނުމަށް މި ސަރުކާރުން ހިންގަން ރާވާފައިވާ ހަމައެކަނި މަޝްރޫޢަކީ ގުޅިފަޅުގައި ހިއްކާ ސަރަހައްދުން ގޯތި ދޫކުރުމަށް ހިންގާ މަޝްރޫޢު ކަމަށާއި، އެ މަޝްރޫޢުގެ ދަށުން ދޫކުރާނީ 1،200 ގޯތި ކަމަށްވެސް މިނިސްޓަރު އަސްލަމް ވިދާޅުވިއެވެ.
ނަމަވެސް ނިމުނު ލޯކަލް ކައުންސިލު އިންތިޚާބުގެ ތެރޭގައި ރައީސް އިބްރާހީމް މުޙައްމަދު ޞާލިޙުވަނީ މާލެ ސަރަހައްދުން މާލޭ ރައްޔިތުންނަށް ގޯތިގެދޮރު ފޯރުކޮށްދިނުމަށް ޚާއްޞަކުރައްވައިގެން ފަޅެއް ހިއްކަވައި އެތަނުގައި ބޯހިޔާވަހިކަމުގެ މަޝްރޫޢު ހިންގަވާނެކަން އިއުލާނުކުރައްވާފައެވެ. މިއަދު މަޖިލީހުގައި އަސްލަމް އެ ފަޅުގެ ވާހަކަނުދައްކަވައެވެ.
