އެމެރިކާއިން ފަލަސްތީނުގެ ޖެރޫސެލަމްގައި އެގައުމުގެ ކޮންސިއުލޭޓެއް ހުޅުވުމާ ދެކޮޅު ހަދަމުންދާނެކަމުގައި އިސްރާއީލުން ހާމަކޮށްފިއެވެ. ފަލަސްތީނުގެ ޖެރޫސެލަމްގައި އެމެރިކާއިން ގާއިމްކޮށްފައި ހުންނަ ކޮންސިއުލޭޓަކީ އާންމު ގޮތެއްގައި ފަލަސްތީނާއި އެކީ އެމެރިކާއިން ބާއްވާ ޑިޕްލޮމެޓިކް ގުޅުންތައް ދެމެހެއްޓުމަށް އެގައުމުން ބޭނުންކުރާ ހަމައެކަނި ވަސީލަތެވެ.
އެހެންނަމަވެސް، އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގައި، 2018ވަނަ އަހަރު އިސްރާއީލުގައި ހުންނަ އެމެރިކާގެ އެމްބަސީ ޖެރޫސެލަމްއަށް ބަދަލު ކުރުމަށްފަހު، ފަލަސްތީނާއެކީ އެމެރިކާއިން ކުރިޔަށް ގެންދާ ޑިޕްލޮމެޓިކް ގުޅުންތައް މީގެކުރިން ބާއްވަމުން އައި ކޮންސިއުލޭޓްގެ ބަދަލުގައި ވަނީ، ޖެރޫސެލަމްއަށް ބަދަލުކުރި އެމްބަސީއަށް ބަދަލު ކޮށްފައެވެ. އަދި އެމެރިކާއިން އޭރު ގެނައި މިބަދަލަށް އިސްރާއީލުން މަރުހަބާ ކިޔާފައިވާއިރު، ފަލަސްތީނުންވަނީ ޓަރަމްޕްގެ ސަރުކާރުން އެޅި މި ފިޔަވަޅަށް ފާޑު ކިޔާފައެވެ.
މުސްތަގްބަލްގެ ފަލަސްތީނުގެ ވެރިރަށެއްގެ ގޮތުގައި ޖެރޫސެލަމްގެ ބައެއްގެ ގޮތުގައާއި އަދި ހުޅަގު އައްސޭރީގެ އިތުރުން ގާޒާ ސްޓްރިޕްޓް ހިމެނޭގޮތުން، އަމިއްލަ ވެރިކަމެއް ގާއިމް ކުރަން ބޭނުންވާ ފަލަސްތީން އޮތޯރިޓީއާއެކީ ރަގަޅު ގުޅުމެއް ގާއިމް ކުރުމަށްޓަކާ، އެމެރިކާގެ މިހާރުގެ ރައީސް ޖޯ ބައިޑްން ބޭނުންފުޅުވެ ވަޑައިގަންނަވަނީ، ޖެރޫސެލަމްގައި ފަލަސްތީނާއެކީ މުޢާމަލާތު ކުރާނެ ކޮންސިއުލޭން އަލުން ހުޅުވުމަށެވެ.
"އެކަމެއް ނުވާނެ، އެކަމެއް ނުވާނެ،" ޖެރޫސެލަމް ޕޯސްޓް ނިއުސްޕޭޕަރގެ ފަރާތުން ބޭއްވި ކޮންފަރެންސެއްގައި، ޖެރޫސެލަމްގައި އަލުން އެމެރިކާގެ ކޮންސިއުލޭޓް ހުޅުވިދާނެތޯ، އިސްރާއީލުގެ ޖަސްޓިސް މިނިސްޓަރާއި ސުވާލުކުރުމުން އޭނާ ވިދާޅުވެފައި ވެއެވެ.
"އެކަމަށް އިސްރާއީލުގެ ހުއްދަ ބޭނުންވާނެ،" އޭނާ ވިދާޅުވެފައި ވެއެވެ. "ދުވަހަކުވެސް އަހަރެމެން އެކަމަށް އެއްބަހެއް ނުވާނަން."
އިސްރާއީލުގެ ޖަސްޓިސް މިނިސްޓަރުގެ ވާހަކަތަކާއި ގުޅިގެން އެމެރިކާ އެމްބަސީން އެއްވެސް ކޮމެންޓެއް ކޮށްފައެއް ނުވެއެވެ.
