ފުޓުބޯޅައަށްދޭ އިސްކަން، ޖިންސީ ކުށްކުށުގެ މައްސަލަތަކުގައި އިންސާފު ހޯދުމަށްވެސް ދޭން ވެއްޖެކަމަށް މޯލްޑިވްސް ރިފޯމް މޫވްމަންޓް (އެމްއާރުއެމް)ގެ ރައީސް ފާރިސް މައުމޫން ވިދާޅުވެއްޖެއެވެ.

ފާރިސް މިހެން ވިދާޅުވީ، ޖިންސީ ގޯނާގެ ދައުވާ އުފުލާފައިވާ ކުރީގެ ޓޫރިޒަމް މިނިސްޓަރ ޢަލީ ވަހީދު ރާއްޖެއިން ބޭރަށް ފުރާވަޑައިގެން ދިއުމުގައި ކޯޓުގައި ޖާމިނުކޮށްފައިވާ ޔޫތު މިނިސްޓްރީގެ ސްޓޭޓް މިނިސްޓަރ އަސްޢަދު ޢަލީ (އަޑުބަރޭ) ޤައުމީ ޓީމްގެ ސްކޮޑްގައި ހިމަނާފައިވުމުން ގިނަ ބައެއްގެ ފާޑުކިޔުން އަމާޒުވެފައިވަނިކޮށެވެ.

ޢަލީ ވަޙީދުގެ މައްޗަށް ކުރާ ޖިންސީ ފުރައްސާރައިގެ މައްސަލާގައި އޭނާގެ ޕާސްޓްޕޯޓް ހިފަހައްތާއިފައި އޮތުމަށްފަހު، އަމުރު މުރާޖައާ ކުރަން ބޭއްވި ޝަރީއަތުގެ އަޑު އެހުމުގައި އަލީ ވަހީދުގެ ފަރާތުން ވަންނީ އޭނާގެ ސިއްހީ ހާލަތު ބަޔާން ކޮށްދިނުމަށް ޑޮކަޓަރަކު ހާޒިރުކޮށްފައެވެ. ޑޮކްޓަރު ވަނީ ޢަލީ ވަޙިދުގެ މައިބަދައިގެ ޑިސްކުތަކެއް ގުޑާފައިވާކަަމަށް ވިދާޅުވެފައެވެ. ޝަރީޢަތުން ވަނީ އެކަމަށް ރިޔާޢަތްކުރައްވާ އޭނާގެ ޕާސްޓްޕޯޓް ހިފެހެއްޓުމަށް ނެރުނު ޢަމުރު ބާޠިލްކޮށްފައެވެ.

ޖާމިނުވާ މީހާ އިގުރާރުވަނީ ބަންދުގައިހުރި މީހާ ބަންދުން ދޫކޮށްލާފައި ހުންނައިރު އޭނާ ކުށެއް ކުރިޔަނުދީ ބަލަހައްޓާނެ ކަމަށާއި އަދި އޭނާއާމެދު ތުހުމަތުކުރެވިފައިވާ ކުށުގެ ތަހުގީގަށްޓަކައި ގާނޫނު ތަންފީޒުކުރާ އިދާރާއިން އަންގާ ތަންތަނަށް އޭނާ ހާޒިރުކުރާނެކަން އަދި ޝަރީއަތުގެ މަރުހަލާގައި ކޯޓަށް ހާޒިރުވާންޖެހޭ ގަޑިއަށް އޭނާ ކޯޓަށް ހާޒިރުކުރާނެ ކަމަށެވެ.

ޢަލީ ވަހީދުގެ މައްސަލާގައި އަޑުބަރޭ ޖާމިނުކޮށްފައިވަނިކޮށް އޭނާ ޤައުމީ ޓީމްގައި ހިމެނުމާއި ގުޅިގެން އަމާޒުވި ފާޑުކިޔުންތަކުގައި ވަނީ، އޭނާ ކުޅުމާއި އެތައް ދުވަހަކު ދުރުގައި ހުރުމަށްފަހު ގަދަ 11ގައި ހިމެނުމަކީ އެހެން ކުޅުންތެރިންނަށް ވެވޭ ބޭއިންސާފެއްކަމަށެވެ. އަދި އެފަދަ ތުހުމަތެއް ކުރެވޭ މީހަކު ޤައުމީ ޓިމްގެ ސްކޮޑްގައި ހިމެނި ރާއްޖެއިން ބޭރަށް ޓްރެއިނިންތަކަށް ނުފުރޭނެކަމަށްވެސް އެފަރާތްތަކުން ބުނެފައިވެއެވެ.

ރާއްޖޭގައި ޖިންސީ ގޯނާގެ މައްސަލަތަކަށް ފަހަކަށް އައިސްވަނީ އިތުރުވެފައެވެ. އެކަމަށް އިޝަރާތްކުރައްވާ ފާރިޝް ވިދާޅުވީ، ފުޓުބޯޅައަށްދޭ އިސްކަން، ޖިންސީ ކުށްކުށުގެ މައްސަލަތަކުގައި އިންސާފު ހޯދުމަށްވެސް ދޭން ވެއްޖެކަމަށެވެ.

އަޅުގަނޑުމެން ފުޓުބޯޅައަށް މިދޭ އިސްކަން، ޖިންސީ ކުށްކުށުގެ މައްސަލަތަކުގައި އިންސާފު ހޯދުމަށްވެސް ދޭން ވެއްޖެ

— faris ?? (@afarismaumoon) October 7, 2021

ޢަލީ ވަޙިދު ފުރުވާލުމުގައި ޖާމިނުވެފައިވާތީ ޔޫތު މިނިސްޓްރީގެ ސްޓޭޓް މިނިސްޓަރ އަސްޢަދު ޢަލީ (އަޑުބަރޭ)ގެ މައްޗަށް އަހަރު ދުވަހުގެ ޖަލު ހުކުމެއް ކަނޑައަޅައިދިނުމަށް ދަޢުލަތުން ވަނީ ކޯޓުގައި އެދިފައެވެ.