ދިވެހިރާއްޖެއާއި އިންޑިއާއާ ދެމެދު ސޮއިކޮށްފައިވާ އުތުރު ތިލަފަޅު އެއްބަސްވުން ސިއްރު ކުރުމަކީ ދައުލަތުގެ އެންމެ މަތީ މަޞްލަޙަތަށް އޮތް ނުރައްކަލެއް ކަމުގައި ކުރީގެ އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީ ވިދާޅުވެއްޖެއެވެ.
އުތުރުތިލަފަޅުގައި ޑޮކްޔާޑަކާއި ބަނދަރެއް ހެދުމަށް އިންޑިއާ ސަރުކާރާއި ދިވެހި ސަރުކާރާއި ދެމެދު ވެވުނު "ޑިވެލޮޕްމަންޓަ، ސަޕޯޓު، އެންޑް ދަ މައިންޓެނޭންސް އޮފް ދަ މޯލްޑިވްސް ނޭޝަނަލް ޑިފެންސް ފޯސް ހާބާ ސިފަވަރު އެޓް އުތުރުތިލަފަޅު" އެއްބަސްވުމާއި ގުޅޭ އެއްވެސް މައުލޫމާތެއް ހާމަކޮށްފިނަމަ ޤައުމީ ސަލާމަތަށް ނުރައްކާވާނެ ކަމަށް ދިވެހިރާއްޖޭގެ ޑިފެންސް މިނިސްޓްރީން ބުނެފައެވެ.
އަސްކަރިއްޔާއިން މިގޮތަށް ވިދާޅުވި ވިދާޅުވުމަށް އިޝާރާތް ކުރައްވައި ޑރ.އަހުމަދު އަބްދުﷲ ދީދީ ވިދާޅުވީ ދިވެހިރާއްޖެއާއި އިންޑިއާއާ ދެމެދު ސޮއިކޮށްފައިވާ އުތުރު ތިލަފަޅު އެއްބަސްވުމަކީ ބައިނަލްއަޤުވާމީ ބައިލެޓެރަލް އަދި ޢަސްކަރީ ޠަބީޢަތުގެ އެއްބަސްވުމެއް ކަމަށެވެ. މިފަދަ އެއްބަސްވުމެއް ސިއްރު ކުރުކުރުމަކީ ރާއްޖޭގެ ދުސްތޫރީ ނިޒާމު ތަންނުދޭ ކަމެއްކަމަށެވެ.
އުތުރުތިލަފަޅު އެއްބަސްވުމަކީ ބައިނަލްއަޤުވާމީ ބައިލެޓެރަލް އަދި ޢަސްކަރީ ޠަބީޢަތުގެ އެއްބަސްވުމެއް. އެފަދަ އެއްބަސްވުމެއް ސިއްރުކުރުމަކީ ދިވެހިރާއްޖޭގެ ދުސްތޫރީ ނިޒާމު ތަންދޭ ކަމެއް ނޫން. އެއީ ދައުލަތުގެ އެންމެ މަތީ މަޞްލަޙަތަށް އޮތް ނުރައްކަލެއް.
– ކުރީގެ އުއްތަމަ ފަނޑިޔާރު ވިދާޅުވިއެވެ.
އިންޑިއާ ސިފައިންނަށް ހަތިޔާރު ވެސް ގެންގުޅެވޭނެގޮތަށް ރާއްޖެއިން އިންޑިއާއާއެކު ހަދާފައިވާ އުތުރު ތިލަފަޅު އެއްބަސްވުން ލީކުކޮށްވެސް ކޮށްލާފައިވެއެވެ. ނަމަވެސް ސަރުކާރުން ބުނެފައިވަނީ އެއީ ޞައްޚަ އެއްބަސްވުމެއް ނޫންކަމަށެވެ. ލީކުވެފައިވާ އެއްބަސްވުމުގައި ވާގޮތުން އިންޑިއާ ސިފައިންނަށް ހަތިޔާރާއިއެކު ރާއްޖޭގައި 60 އަހަރު ތިބެވޭނެ ކަމަށް އެއްބަސްވުމުގައި ބަޔާންކޮށްފައިވެއެވެ.
އެ އެއްބަސްވުމުގައި ބަޔާންކުރާގޮތުން އިންޑިއާ ސިފައިން 30 އަހަރު ވަންދެން ރާއްޖޭގައި ބޭތިއްބުމަށް ޝަރުތުކޮށްފައިވާއިރު، އެއްބަސްވުމުގައި ސޮއި ކުރާ ދުވަހުން ފެށިގެން 30 އަހަރު ވަންދެން އެއްބަސްވުން ދެމިއޮންނާނެކަމަށްވެސް ބުނެފައިވެއެވެ. އަދި އެ އެއްބަސްވުމުގެ މުއްދަތު ހަމަވުމުން އަނެއްކާ އިތުރު 30 އަހަރު އިންޑިއާ ސިފައިންނަށް ރާއްޖޭގައި ތިބެވޭ ގޮތައް އެއްބަސްވުމުގައި ބަޔާންކުރެއެވެ. ނަމަވެސް 30 އަހަރު ފަހުން ދިވެހި ސަރުކާރުން ދެކޮޅު ހަދައިފިނަމަ ނުތިބެވޭނެއެވެ.
މީގެ އިތުރުން މި އެއްބަސްވުމުގެ ދަށުން އުތުރު ތިލަފަޅުގައި ތިބޭ އިންޑިއާ ސިފައިންނަށް ހަތިޔާރު ވެސް ގެންގުޅެވޭނެއެވެ. އަދި އެތަނުގައި ކުރާނެ ކަންކަން ނިންމާނީ އިންޑިއާ ސިފައިނާއި ދިވެހި ސިފައިން އެކުވެފައި އުފައްދާފައި އޮންނަ ޖޮއިންޓް ޕްރޮޖެކްޓް މޮނިޓަރިން ކޮމެޓީއަކުންކަމަށާއި، އެތަނުގައި މަސައްކަތެއްކުރުމަށް ކޮންޓެކްޓަރުން ހަމަޖައްސާނީވެސް އިންޑިއާ ސަރުކާރުން ކަމަށް އެއްބަސްވުމުގައި ބަޔާންކުރެއެވެ.
އެމްއެންޑީއެފްގެ ކޯސްޑްގާޑްގެ ބަނދަރަކާއި ސަރވިސް ޑޮކްޔާޑެއް އުތުރު ތިލަފަޅުގައި ތަރައްޤީކުރުމުގެ އެއްބަސްވުމުގައި އިންޑިއާއާއި އެކު މި ސަރުކާރުން ސޮއިކޮށްފައިވަނީ އިންޑިއާގެ އެކްސްޓަރނަލް އެފެއާރޒް މިނިސްޓަރ ޑރ. ޖައިސަންކަރު ރާއްޖެއަށް ކުރެއްވި ދަތުރުފުޅުގައެވެ. ރާއްޖޭގެ ފަރާތުން އެއްބަސްވުމުގައި ސޮއިކޮށްފައިވަނީ ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީއެވެ.
