ބޮޑު އަޣުލަބިއްޔަތަކުން ފޮރިން މިނިސްޓަރ ޢަބްދުﷲ ޝާހިދު އދގެ އާއްމު މަޖިލީހުގެ ރިޔާސަތަށް ހޮވިވަޑައިގަތުމަކީ ބައިނަލްއަޤްވާމީ މުޖްތަމައުން އެމަނިކުފާނާއި، ދިވެހިރާއްޖެއާއި މެދު ދެކޭ ގޮތުގެ ނަމޫނާއެއްކަމަށް ބޮޓްސްވާނާގެ ރައީސް ވިދާޅުވެއްޖެއެވެ.
އދގެ އާއްމު މަޖިލީހުގައި ތަޤްރީރުކުރައްވަމުން ބޮޓްސްވާނާގެ ރައީސް މޮކްގްވިސްތީ މަސީސީ ވިދާޅުވީ މިނިސްޓަރ ޝާހިދު އދގެ ޢާއްމު މަޖިލީހުގެ ރިޔާސަތަށް އިންތިޚާބުވެވަޑައިގަތުމަކީ ހައިރާންވާން ޖެހޭކަމެއް ނޫންކަމަށާއި، އެމަނިކުފާނު ރިޔާސަތަށް ވަޑައިގަތީ ތަޖުރިބާއާ ޤާބިލްކަމާއެކުގައި ކަމަށެވެ. އަދި މިނިސްޓަރ ޝާހިދުގެ ޑީޕްލޮމެޓިކް ތަޖުރިބާއާއި، ޤާނޫނު ހަދާ މަޖިލީހުގެ ތަޖުރިބާގެ އިތުރުން ސަރުކާރުގެ ތަޖުރިބާގެ އަލީގައި މިއަހަރުގެ އާއްމު މަޖިލީހުގެ މަސައްކަތަށް އިތުރު ބާރެއް ލިބިގެންދާނެކަމަށް ޔަޤީންކުރައްވާކަމަށްވެސް ބޮޓްސްވާނާގެ ރައީސް ވިދާޅުވިއެވެ.
އަދި މީގެ އިތުރުން މިނިސްޓަރ ޝާހިދުގެ މިޝަން ސްޓޭޓްމަންޓްގައި ހިމެނޭ "އުއްމީދުގެ 5 ދޯދި" (ފައިވް ރޭސް އޮފް ހޯޕް) އަކީ މިވަގުތު އިންސާނިއްޔަތަށް ދިމާވެފައިވާ މައްސަލަތަކަށް އޮތް އުއްމީދެއްކަމަށްވެސް އެމަނިކުފާނު ވިދާޅުވިއެވެ. އަދި އެ އުއްމީދުތައް ހާސިލްކުރުމަށް އެމަނިކުފާނާ ގުޅިގެން، އެމަނިކުފާނުގެ ތަސައްވުރާ އެއްގޮތަށް ބޮޓްސްވާނާއިން މަސައްކަތްކުރާނެކަމުގެ ޔަޤީންކަންވެސް ބޮޓްސްވާނާގެ ރައީސް ވަނީ މިނިސްޓަރ ޝާހިދަށް ދެއްވާފައެވެ.
ޢާއްމު މަޖިލީހުގައި ވާހަކަފުޅު ދައްކަވަމުން ފެޑެރޭޓެޑް ސްޓޭޓްސް އޮފް މައިކްރޯނީޝިއާގެ ރައީސް ޑޭވިޑް ޕަނުއެއްލޯ ވެސް ވަނީ މިނިސްޓަރ ޝާހިދަށާއި ދިވެހިރާއްޖެއަށް ތައުރީފުކުރައްވާފައެވެ. އަދި މި ހައްސާސް ދަނޑިވަޅުގައި އދގެ ޢާއްމު މަޖިލީހުގެ ރިޔާސާތާ، ތަރައްޤީވަމުން އަންނަ ކުޑަ ޖަޒީރާ ޤައުމެއްގެ ބޭފުޅަކު ހަވާލުވުމަކީ ފާހަގަކުރަން ޖެހޭކަމެއްކަމަށް ވިދާޅުވިއެވެ.
މޫސުމީ ބަދަލުތަކާ ތިމާވެށީގެ މައްސަލަތަކުގައި ބައިނަލްއަޤްވާމީ މުޖްތަމައުގައި އަޑުއުފުލާ އަދި ޤައުމުތަށް ލީޑްކުރާ ޤައުމެއްގެ ގޮތުގައި ދިވެހިރާއްޖެ ފާހަގަކުރައްވައި، ދެޤައުމު އަދި ޖަޒީރާ ޤައުމުތައް ގުޅިގެން ކުރަމުންދާ މަސައްކަތްތަކަށް މައިކްރޯނީޝިއާގެ ރައީސް އަލިއަޅުއްވާލެއްވިއެވެ.
އދގެ އާއްމު މަޖިލީހުގެ 76 ވަނަ ސެޝަންގައި ޤައުމުތަކުގެ އެންމެ އިސްވެރިން ތަޤްރީރުކުރެއްވުން ކުރިއަށްދާއިރު، ސެޝަންގެ ހަވާސާގައި މިނިސްޓަރ ޝާހިދު ގެންދަވަނީ އާއްމު މަޖިލީހުގެ ރައީސްގެ ހައިސިއްޔަތުން ޤައުމުތަކުގެ ވެރިންނާއެކު ބައްދަލުކުރައްވަމުންނެވެ. އަދި ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙްވެސް ގެންދަވަނީ ސެޝަންގެ ހަވާސާގައި ބައެއް ޤައުމުތަކުގެ ވެރިންނާއި ބައްދަލުކުރައްވައި، ސެޝަންގެ ހަވާސާގައި ކުރިއަށްދާ ތަފާތު އެކި އިވެންޓްތަކާއި ބައްދަލުވުންތަކުގައި ބައިވެރިވެވަޑައިގަންނަވަމުންނެވެ.
