ދިވެހިރާއްޖެއާއި އިންޑިއާއާ ދެމެދު ސޮއިކޮށްފައިވާ އުތުރު ތިލަފަޅު އެއްބަސްވުމާއި ގުޅޭގޮތުން ރައްޔިތުންގެ ގިނަ ކަންބޮޑުވުންތަކެއް އޮތްއިރު، މިއެއްބަސްވުމުގެ އަސްލު ހޯދުމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް އެދިވަޑައިގެންފިއެވެ.
މަޖިލިސް ރައީސް މުހައްމަދު ނަޝީދަށް އެޑްރެސްކޮށް، އާދަމް ޝަރީފް ފޮނުވި ސިޓީގައި ބުނެފައިބަނީ، ދިވެހި ސަރުކާރުން އިންޑިއާ ސަރުކާރާއެކު ހަދަމުންދާ ބައެއް އެއްބަސްވުންތަކުގެ ސަބަބުން ދިވެހިރާއްޖޭގެ ޤައުމީ ސަލާމަތަށް ނުރައްކާވެ، ސިޔާދަތު ގެއްލެމުންދާކަމަށް ރާއްޖޭގެ ގިނަ ބަޔަކު އަންނަނީ ތުހުމަތު މިކަމާގުޅިގެން އުތުރުތިލަފަޅު ތަރައްޤީކުރުމާބެހޭ އެއްބަސްވުމުގެ އަސްލު، 241 ކޮމިޓީއަށް ލިބޭނެގޮތް ހައްދަވައިދެއްވުންއެދި، 15 މާރޗް 2011 ގައި އަޅުގަނޑު ވާނީ މަޖިލީހަށް ސިޓީއެއް ފޮނުވާފައިވާނެ ކަމަށެވެ.
ދިވެހިރާއްޖެއާއި އިންޑިއާއަކީ ވަރަށް ރަޙުމަތްތެރި ދެޤައުމަށްވާއިރު، ދެޤައުމުގެ މެދުގައި އޭ އޮންނަންޖެހޭ އިތުބާރާއި ދެޤައުމުގެ ރައްޔިތުންގެ މެދުގައި ޒަމާނުއްސުރެ އުފެދިފައިވާ އެކުވެރިކަމަށް ބުރޫއަރާފަދަ ކަންކަން ވުމަކީ ދެ ޤައުމުގެ ރައްޔިތުންނާއި އިންޑިއާ ކަނޑުގެ ސަލާމަތާއި ރައްކާތެރިކަން ވެސް ގެއްލި، ދުނިޔޭގެ އެހެން ނުފޫޒުތަކުން އިންޑިއާ ކަނޑުގެ ސަލާމަތާއި ރައްކާތެރިކަމުގެތެރެއަށް ވަނުމުގެ ފުރުޞަތު ބޮޑުވާނެ ކަމެއްކަމަށް ވަނީ ބުނެފައެވެ.
އެހެންކަމުން ދިވެހި ސަރުކާރާއި އިންޑިޔާ ސަރުކާރުން ސޮއިކޮށްފައިވާ އެއްބަސްވުމުގައި ޤައުމީ ސަލާމަތާއި ޤައުމުގެ މިނިވަންކަމާއި ސިޔާދަތަށް ނުރައްކާވާފަދަ ކަމެއް ނެތްކަން ކަށަވަރު ކުރުމަށްޓަކައި، އުތުރުތިލަފަޅު ތަރައްޤީކުރުމާބެހޭ އެއްބަސްވުމާއި، ހައިޑްރޮގްރަފީއާބެހޭ އެއްބަސްވުމާއި އަދި ޑޯނިއޮރ މަތިންދާ ބޯޓާބެހޭ އެއްބަސްވުމުގެ އަސްލު ހޯއްދަވައި، ރައްޔިތުންގެ މަޖިލީހުގެ 241 ކޮމިޓީން ދިރާސާ ކުރައްވައި ޤައުމީ ސަލާމަތާއި ޤައުމުގެ މިނިވަންކަމާއި ސިޔާދަތަށް ނުރައްކާވާފަދަ ކަންކަން ހުރިތޯ ބައްލަވައިދެއްވުމަށް އޭނާ ވަނީ އެދިފައެވެ.
