ޗެލްސީ އާއި އާސެނަލް ލީގު ކަޕްގެ ހަތަރު ވަނަ ބުރަށް

އިނގިރޭސި ލީގު ކަޕްގައި ރޭ ޗެލްސީ އާއި އާސެނަލް ހަތަރު ވަނަ ބުރުން ޖާގަ ހޯދިއިރު، މެންޗެސްޓަރ ޔުނައިޓެޑް މުބާރާތުން ކަޓައިފިއެވެ.

ލީގު ކަޕްގައި ރޭ ޗެލްސީ ނުކުތީ އެސްޓަން ވިލާ އާއި ދެކޮޅަށެވެ. މި މެޗު ޗެލްސީ ކާމިޔާބުކުރީ ޕެނަލްޓީ ޖަހައިގެން 3-4 ގެ ނަތީޖާ އަކުންނެވެ. އާސެނަލްއަނެއް ބުރަށް ދަތުުރުކުރީ ވިމްބަލްޑަންގެ މައްޗަށް 0-3 ގެ ނަތީޖާއަކުން ކުރި ހޯދައިގެންނެވެ. އަދި ޔުނައިޓެޑް މުބާރާތުން ކެޓީ ވެސްޓް ހޭމް ޔުނައިޓެޑްއަތުން 0-1 އިން ބަލިވުމުންނެވެ.

ޗެލްސީ އާއި އެސްޓަން ވިލާ ބައްދަލުކުރި މެޗުގައި ފުރަތަމަ ލަނޑު ޖަހާ ލީޑު ނެގީ ޗެލްސީންނެވެ. މި ލަނޑު މެޗުގެ 54 ވަނަ މިނެޓުގައި އެޓީމަށްކާމިޔާބުކޮށްދިނީ ޓިމޯ ވާނާއެވެ. ނަމަވެސް ޗެލްސީން ލަނޑު ޖަހާ ލީޑު ނެގިތާ 10 މިނެޓު ފަހުން އެސްޓަން ވިލާއިން ވަނީ ނަތީޖާ ހަމަހަމަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ކެމަރަން އާޗާއެވެ. މެޗުގެ ފުރިހަމަ ވަގުތު ހަމަވިއިރު 1-1 އިން އެއްވަރުވެފައި އޮތުމުން ނަތީޖާ ނެރުނީ ޕެނަލްޓީޖަހައިގެންނެވެ. އެގޮތުން ޕެނަލްޓީގައި އެސްޓަން ވިލާގެ މައްޗަށް ޗެލްސީ ކުރިހޯދީ 3-4 ގެ ނަތީޖާ އަކުންނެވެ.

ލީގު ކަޕްގައި އާސެނަލް އާއި ވިމްބަލްޑަން ބައްދަލުކުރި މެޗު ފަށައިގެން 11 ވަނަ މިނެޓުގައި ލިބުނު ޕެނަލްޓީއަކުން އާސެނަލަށް ލީޑު ނަގައިދިނީ އަލެކްސަންޑަލަކަޒޭޓްއެވެ. އަދި އާސެނަލުން މި މެޗުގައި ޖެހި ތިންވަނަ ލަނޑާއި ހަތަރު ވަނަ ލަނޑު އެޓީމަށް ކާމިޔާބުކޮށްދިނީ އެމީލް ސްމިތު ރޯވް އަދި އެޑީ އެންކެޓިއޭއެވެ.

ލީގު ކަޕްގައި ރޭ މެންޗެސްޓަރ ޔުނައިޓެޑް އަތުން ވެސްޓް ހޭމް މޮޅުވީ މެޗުގެ ނުވަވަނަ މިނެޓުގައި މެނުއަލް ލަންޒީނީ ކާމިޔާބުކޮށްދިން ލަނޑުންނެވެ. މިމެޗުގައި ޔުނައިޓެޑުން ވަނީ ލަނޑެއް ކާމިޔާބުކުރުމަށް ވެސްޓް ހޭމްގެ ގޯލާއި އަމާޒުކޮށް ގިނަ ހަމަލާތަކެއް ފޮނުވާލާަފައެވެ. ޔުނައިޓެޑުން ވަނީ ޕްރިމިއާ ލީގުގައި އެންމެ ފަހުން ކުޅުނު މެޗުގައި ވެސްޓް ހޭމްގެ ދަނޑުގައި 1-2 އިން އެޓީމު ބަލިކޮށްފައެވެ.

މީގެ އިތުރުން ލީގު ކަޕުގައި ރޭ ކުޅުނު އެހެން މެޗުތަކަށް ބަލާލާއިރު، ލެސްޓާ ސިޓީ ވަނީ މިލްވޯލްގެ މައްޗަށް 0-2 އިން ކުރިހޯދާ ލީގު ކަޕްގެ އަނެއް ބުރުންޖާގައެއް ކަށަވަރުކޮށްފައެވެ. އަދި ޓޮޓެންހަމް ވަނީ ޕެނަލްޓީ ޖަހައިގެން ވުލްވްސް ބަލިކޮށް ހަތަރު ވަނަ ބުރަށް ދަތުރުކޮށްފައެވެ.