ލީބިޔާގެ އިރުމަތީގައި ބާރުގަދަ ހަގުރާމަވެރި ލީޑަރެއް ކަމުގައިވާ ޚަލީފާ ހަފްތަރު އޭނާ ކުރިޔަށް ގެންދަމުންދާ އަސްކަރީ ހުރިހާ ހަރާކާތެއް މަޑުޖައްސާލަން ނިންމާފައިވާކަން ބުދަ ދުވަހު އިއުލާން ކޮށްފިއެވެ.
އޭނާ އެޅުއްވި މި ފިޔަވަޅަކީ، މިއަހަރު ފަހުކޮޅު ބޭއްވުމަށް ހަމަޖެހިފައިވާ ލިބިޔާގެ ރިޔާސީ އިންތިޚާބުގައި އޭނާ ވާދަކުރުމުގެ ފުރުސަތު ހޯއްދެވުމުގެ ގޮތުން އޭނާ އެޅުއްވި ފިޔަވަޅެކެވެ.
ޚާލީފާ ހަފްތަރު އާންމު ކުރެއްވި ބަޔާނެއްގައި އޭނާ ވިދާޅުވެފައިވަނީ، ލީބިޔަން ނޭޝަނަލް އާރމީގެ ގޮތުގައި އަމިއްލައަށް ނަންދީފައިވާ އޭނާގެ އާރމީގެ އާއިސްވެރިޔަކު އަންނަ ޑިސެމްބަރު މަހުގެ 24ވަނަ ދުވަހާ ހަމައަށް މިހާރު ހަމަޖައްސާފައިވާ ކަމުގައެވެ. ޑިސެމްބަރުމަހުގެ 24 ވަނަ ދުވަހަކީ ލީބިޔާގައި މަޖިލިސް އިންތިޚާބުގެ އިތުރުން ރިޔާސީ އިންތިޚާބުގައިވެސް ވޯޓުލުމަށް ހަމަޖެހިފައިވާ ދުވަހެވެ.
ލީބިޔާގެ ލޯކަލް މީޑިއާތަކުން ބުނާ ގޮތުގައި އޭނާ ހިންގަމުން ދިޔަ އަސްކަރީ ހަރަކާތްތަކަށް މިގެނައި ކުއްލި ބަދަލަކީ އެގައުމުގައި ކުރިޔަށް އޮތް ރިޔާސީ އިންތިޚާބުގައި ވާދަ ކުރުމުގެ ފުރުސަތު މިހާރު ފާސްކޮށްފައިވާ، ޚިޔާލުތަފާތުވުން ބޮޑު ގާނޫނުގެ ތެރެއިން ހޯދުމަށްޓަކާ އޭނާ އެޅުއްވި ފިޔަވަޅެކެވެ.
ލީބިޔާގެ ގާނޫނު ހަދާ މަޖިލިހުގެ ރައީސް އަގުއިލާ ސާލިހުވަނީ މިމަހުގެ ކުރީކޮޅު ލީބިޔާގައި ބޭއްވުމަށް ހަމަޖެހިފައިވާ ރިޔާސީ އިންތިޚާބާބެހޭ ބިލް ތަސްދީގު ކުރައްވާފައެވެ. އެހެންނަމަވެސް، ފާޑު ވިދާޅުވާ ފަރާތްތަކުން ބުނެފައިވަނީ، މި ގާނޫނު ފާސް ކޮށްފައިވަނީ އުސޫލުތަކުގެ ތެރެއިން ނޫން ކަމުގައެވެ. އަދި މި ގާނޫނު ފާސްކޮށްފައިވަނި ހަފްތަރަށް ރިޔާސީ އިންތިޚާބުގައި ވާދަކުރުމުގެ ފުރުސަތު ފަހިކޮށްދިނުމުގެ ގޮތުންވެސް ފާޑުވިދާޅުވާ ފަރާތްތަކުން ބުނެފައި ވެއެވެ.
މިގާނޫނުގެ މާއްދާއެއްގައި ވާގޮތުން ލީބިޔާގެ އަސްކަރީ އޮފިޝަލުންނަށްވެސް، އެފަރާތްތަކުން، އިންތިޚާބުގެ 3 މަސްކުރިން އަސްކަރީ ހަރަކާތްތަކާ ދުރަށް ވަޑައިގަންނަވައިފި ނަމަ، އިންތިޚާބުގައި ވާދަކުރުމުގެ ފުރުސަތު ލިބޭނެއެވެ.
ލީބިޔާގައި އަލަށް ތަސަދީގު ކުރެވުނު މި ގާނުގެ މިމާއްދާގެ ދަށުން، އެގައުމުގެ އިރުމަތީގެ ބޮޑު ސަރަހައްދެއް އޭނާގެ ބާރުގެ ދަށުގައި އޮތް ހަފްތަރަށް ރިޔާސީ އިންތިޚާބުގައި ވާދަކުރުމުގެ ފިރިސަތު ލިބިގެންދާނެއެވެ. ލީބިޔާގެ ގާނޫނުހަދާ މަޖިލިސްވެސް ހުންނަނީ ލީބިޔާގެ އިރުމަތީ ސަރަހައްދުގައެވެ. ހަފްތަރުގެ ބާރުތަކުން ލީބިޔާގެ ދެކުނުގެ ބައެއް ސަރަހައްދުތައްވެސް ކޮންޓްރޯލް ކުރެއެވެ.
ފާއިތުވެދިޔަ އަހަރު އޮކްޓޯބަރުގައި، ލީބިޔާގެ ހުޅަގުގެ ސަރަަހައްދު ކޮންޓްރޯލް ކުރަމުންދާ އޭނާއާއި އިދިކޮޅު ފަރާތްތަކާ އެކީމ ސުލްހައިގެ އެއްބަސްވުމެއް ވުމުގެ ކުރިން ހަފްތަރުވަނީ، ލީބިޔާގެ ވެރިރަށް ޓްރިޕޮލީ ހިފުމަށްޓަކާ އެއްއަހަރު ވަންދެން ވަރުގަދަ ހަގުރާމައެއް ކޮށްފައެވެ. މިހަގުރާމާގައި އެތައްސަތޭކަ ބަޔަކު ވަނީ މަރުވެފައެވެ.
މިއަހަރު ކުރީކޮޅު، ލީބިޔާގައި ގައުމީ އެއްބައިވަންތަ ކަމުގެ ސަރުކާރެއް އެކުލަވާލެވުނު ފަހުން، ލީބިޔާގައި ހިގަމުންއައި ހަމަނުޖެހުންތައް ވަނީ ވަރަށް ބޮޑަށް މަދުވެފައެވެ. މިހާރުއޮތް އެއްބައިވަންތަ ކަމުގެ ސަރުކާރު ދެމިއޮންނާނީ، އަންނަ ޑިސެމްބަރުމަހު ބޭއްވުމަށް ހަމަޖެހިފައިވާ އިންތިޚާބުތަކާ ހަމައަށެވެ.
އެހެންނަމަވެސް، ފާއިތުވެދިޔަ ހަފްތާގެ އަންގާރަދުވަހު ލީބިޔާގެ ގާނުނުހަދާ މަޖިލިހުންވަނީ މިހާރު އޮތް ގައުމީ އެއްބައިވަންތަކަމުގެ ސަރުކާރުގެ އިތުބާރު ނެތްކަމަށް ފާސްކޮށްފައެވެ. ނަތީޖާއެއްގެ ގޮތުން އަންނަ ޑިސެމްބަރ މަހު ބޭއްވުމަށް ހަމަޖެހިފައިވާ އިންތިޚާބު ބޭއްވިދާނެކަމާމެދު ވަނީ ސުވާލު އުފެދިފައެވެ.
