ފުރިހަމަ ހިމާޔަތާއި ރައްކާތެރިކަން ލިބިގެންވާ އިސްރާއީލުގެ ދައުލަތެއް މެދުއިރުމަތީގައި އޮތުމަށްޓަކާ، ފަލަސްތީނުގެ މިނިވަން ޑިމޮކްރަޓިކް ދައުލަތަކެއް އޮންނަން ޖެހޭކަމަށް ގަބޫލު ކުރައްވާ ކަމުގައި އެމެރިކާގެ ރައީސް ޖޯ ބައިޑްން ވިދާޅުވެއްޖެއެވެ.
ޖޯ ބައިޑް މިހެން ވިދާޅުވެފައިވަނީ، ޔޫއެން ޖެނެރަލް އެސެމްބްލީގެ 76ވަނަ ޖަލްސާގައި ތަގުރީރު ކުރައްވަމުންނެވެ.
"އަހަރެން އަދިވެސް ގަބޫލުކުރަނީ، ފުރިހަމަ ހިމާޔަތާއި ރައްކާތެރިކަން ލިބިގެންވާ، ޑިމޮކްރަޓިކް ޔަހޫދީ ދައުލަތެއް ގާއިމް ކުރުމަށްޓަކާ އޮތް އެންމެ ރަގަޅު ހައްލަކީ، މިނިވަން ޑިމޮކްރަޓިކް، އަދި އިތިބާރު ކުރެވޭ، ފަލަސްތީނުގެ ދައުތެއް އިސްރާއީލާ އިންވެގެން އޮތުން،" ފަލަސްތީނުގެ މިނިވަން ދައުލަތެއް އޮންނަން ޖެހޭކަމަށް ގަބޫލުކުރައްވާކަމަށް ވިދާޅުވަމުން ބައިޑްން ވިދާޅުވިއެވެ.
އެހެންނަމަވެސް، ބައިޑްން ވިދާޅުވީ، މިނިވަން ޑިމޮކްރަޓިކް ފަލަސްތީނުގެ ދައުލަތެއް ވުޖޫދުވެގެން އައުން އަދިވެސް އޮތީ ވަރަށް ދުރުގައި ކަމުގައެވެ.
ފަަލަސްތީނުގެ މިނިވަން ދައުލަތެއް އުފެދިގެން އައުން އަދިވެސް އޮތީ ވަރަށް ދުރުގައިކަމަށް ބައިޑްން ވިދާޅުވެފައިވާއިރު، އޭނާ ޖެހިވަޑައިގެންފައިވަނީ، އިސްރާއީލުގެ އަޔަން ޑޯމް (އިސްރާއީލަށް ދެވޭ ރޮކެޓް ހަމަލާތަކުން އެގައުމު ދިފާޢުކުރުމަށް ގާއިން ކޮށްފައި ހުންނަ ޑިފެންސް ސިސްޓަމް)އަށް 1 ބިލިއަން އެމެރިކާ ޑޮލަރުގެ އެހީ ހިމަނައިގެން ބައިޑްންގެ ސަރުކާރުން ފާސްކުރުމަށް މަސައްކަތް ކުރަމުންދާ ބިލާއިދެކޮޅަށް ހައްދަވަމުން ގެންދަވާ ކޮންގްރެސްގެ ގިނަ މެމްބަރުން ފާޑުކިޔުންތަކާ ކުރިމަތިލައްވަން ޖެހިވަޑައިގެންފައެވެ.
ބައިޑްންގެވެސް ގާތް ޑިމޮކްރަޓިކް މެމްބަރުން ވިދާޅުވަމުން ގެންދަވަނީ، މިފައިސާ ހިމަނައިގެން މިބިލް ފާސްކުރުމަށް އެބޭފުޅުން ތާއީދު ނުކުރައްވާނެ ކަމުގައެވެ. އަދި މި ދެކޮޅު ހެދުންތަކުން ހާމަވެގެން ގޮސްފައިވަނީ، އެތައް ޒަމާނެއް ވަންދެން، އެމެރިކާއިން އެއްވެސް ޝަރުތަކާ ނުލާ އިސްރާއީލަށް ކުރަމުން އަންނަ ތާއީދާމެދު، ކޮންގްރެސްގައި ތިއްބެވި އިސްލާހަށް ލޯބިކުރާ މެމްނަރުންގެ މެދުގައި އުފެދިފައިވާ އުދާސްތައް ކަމުގައި މަސްރަހު ދިރާސާ ކުރާ ފާރްތަކުން ވިދާޅުވެއެވެ.
"އިސްރާއީލުގެ ސަލާމަތަށް އަހަރެމެން ވެފައިވާ ޖާމިނު ވުމަކީ، އެއްވެސް ސުވާލެއް އޮތް ކަމެއް ނޫން. އަދި މިނިވަން ޔާހޫދީ ދައުލަތަށް އަހަރަމެން ވަމުންދާ އެހީތެރިކަމަކީ އެއްވެސް ބަހުސެއް އޮތް ކަމެއް ނޫން،" ޔޫއެން ޖެނެރަލް އެސެމްބްލީގައި ވާހަކަ ދައްކަވަމުން ބައިޑްން ވިދާޅުވެފައި ވެއެވެ.
"މެދުއިރުމަތީގެ ހުރިހާ ރައްޔިތުންނަށްވެސް، އުފާފާގަތި މުސްތަގުބަލެއް ހޯދާ ދިނިމަށް އަހަރެމެން އެންމެންވެސް މަސައްކަތް ކުރަންވާނެ،" ޔޫއެންގައި ވާހަކަ ދައްކަވަމުން ބައިޑްން ވިދާޅުވެފައި ވެއެވެ.
