މިސަރުކާރުގެ ތަރައްޤީގެ މަސައްކަތްތަކުގައި ސްޕީޑު ހުރީ 99.99 ޕަސެންޓުގައިކަަމށް ރައްޔިތުންގެ މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާ ވިދާޅުވެއްޖެއެވެ.
ރައްޔިތުންގެ މަޖިލީޙުގެ މިއަދު ޖަލްސާއަށް ހުށަހެޅުނު ފުލިދޫ ރަށްގިރުމުގެ ޤަރާރަށް ބަހުސް ކުރައްވަމުން ރިޒާ ވިދާޅުވީ މިސަރުކާރުން ފުލިދޫ ގިރުމުގެ މައްސަލަ ހައްލުކޮށްދެއްވާނެކަމަށެވެ. ފާއިތުވެދިޔަ ދެ އަހަރުގައި ކޯވިޑާއި ގުޅިގެން މުޅި ދުނިޔެ ބަންދު ވެފައި އޮތްނަމަވެސް ސަރުކާރުން ރައްޔިތުންނަށް ވެފައިވާ ވައުދުތައް ފުއްދުމުގައި، އެއްވެސް ވަރަކަށް ފަސް ޖެހިފައި ނުވާކަމަށެވެ.
ކޯވިޑާއި ގުޅިގެން ރާއްޖޭގެ އިޤްތިޞާދު އެއްކޮށް ހުއްޓުމަކަށް އައުމުން ތަރައްޤީގެ ކަންކަމަށް ކޮންމެވެސް ވަރެއްގެ މަޑު ޖެހުމެއް އައިނަމަވެސް މިހާރު އަނެއްކާވެސް އެކަންކަން ފެށި ތަރައްޤީގެ މަސައްކަތް ބާރަށް ކުރިއަށްދާނެކަމަށެވެ. އޭނާ ވިދާޅުވީ މިސަރުކާރުން ރައްޔިތުންނަށް ވެފައިވާ ވައުދު ފުއްދުމުގައި އިހުމާލެއް ނުވާނެކަމަށެވެ. ރައީސް ޞާލިހަށް ލިބިފައިވާ ފަސް އަހަރުގެ ދައުރުގައި ވެފައިވާ ހުރިހާ ވައުދެއް ރަނުން ރަނަށް ފުއްދަވާނެ ކަމަށާއި، މިސަރުކާރުގެ ސްޕީޑު ހުރީ 99.99 ޕަސެންޓުގައިކަމަށެވެ.
2018ގެ ކުރީގައިވެސް ދިވެހި ރާއްޖޭގައި މީހުން ދިރިއުޅޭ ރަށްތަކުގައި ހަމަ މީހުން ދިރިއުޅުނު. އެންމެ ރަށެއްވެސް އަދި އިތުރުވީކީވެސް ނޫން. އޭގެ ކުރީ އަހަރުވެސް 5 އަހަރުގެ ވެރިކަމެއްދިޔަ އޭގެ ކުރިން 2 އަހަރުގެ ވެރިކަމެއް ދިޔަ އަދި އޭގެ ކުރިން 30 އަހަރުގެ ވެރިކަމެއްވެސް ނިމިގެންދިޔަ. ހަމައެކަނި 2018 ވަނަ އަހަރަށްފަހަކު ނޫން ދިވެހި ރާއްޖޭގެ ރަށްތަކުގައި މީހުން ދިރިއުޅެން ފެށީކީ. މިއަދު ދިވެހި ރައްޔިތުން ގަބޫލުކުރޭ މިސަރުކާރަކީ، ވީވައުދު ބަރަބަރަށް ފުއްދާނެ ސަރުކާރެއްކަން. މިސަރުކާރުގެ ސްޕީޑު ހުރީ 99.99 ޕަސެންޓުގައިކަން.
– ރިޒާ ވިދާޅުވިއެވެ.
ރިޒާ ވިދާޅުވީ 2018 ވަނަ އަހަރު ރައްޔިތުންނަށް ރައީސް ޞާލިހު ހުށަހަޅާގައިވާ ވައުދު ދަނީ ރަނުން ރަނަށް ފުއްދަމުން ކަމަށެވެ. އަދި އެޖެންޑާ19ގައިވާ ހުރިހާ ވައުދެއް މިސަރުކާރުން ފުއްދަވާނެ ކަމުގައެވެ. އޭނާ ވިދާޅުވީ މިހާރުވެސް ވަރަށް ގިނަ ރަށްތަކެއްގެ މަގު ހެދުމާއި، ބަނދަރު ހެދުމާއި، މަގު ބައްތި ޖެހުންފަދަ ކަންކަން ހުރިއިރު އެކަންކަން ބާރަށް ކުރިއަށްދާކަމަށެވެ.
