ދައުލަތުން ކުޑަކުދިން ބެލެހެއްޓުމަށް ހުޅުމާލޭގައި ޤާއިމުކޮށްފައިވާ "ފިޔަވަތި" ގައި ހިނގަމުންދިޔަ ކަންކަން ސަރުކާރުގެ ސަމާލުކަމަށް ގެނެސް ދައުލަތުގެ ކަމާބެހޭ މުއައްސަސާތައް ހޭލައްވާލީ ހުުމާލެ ދާއިރާގެ ކައުންސިލަރު އިބްރާހީމް ޝުޖާޢު ކަމަށް އިދިކޮޅު ކޯލިޝަނުން ބުނެފިއެވެ.
އިދިކޮޅު ކޯލިޝަނުން ނެރުނު ބަޔާނެއްގައި ބުނެފައިވަނީ ދައުލަތުން ކުޑަކުދިން ބެލެހެއްޓުމަށް ހުޅުމާލޭގައި ޤާއިމުކޮށްފައިވާ "ފިޔަވަތި" އިމާރާތުގެ އެތެރޭގެ ހާލަތު ގޯސްވެ އެތަނުގެ ތެރޭގައި ހިނގައި ދިޔަ ހަމަނުޖެހުން ކޮންޓްރޯލު ނުވެ އިމާރާތުގައި އަލިފާން ރޯވާ ހިސާބަށް ދިޔައިރުވެސް، އެ ކުދިން ބެލެހެއްޓުމުގެ ޒިންމާ އާއި ޙަވާލުވެ ތިއްބެވި ސިޔާސީ ވެރިން ފިޔަވަޅު ނާޅާ ހާލަތު ގޯހުން ގޯހަށް ދިއުމަށް ދޫކޮށްލައިގެން ތިއްބާ އަވަސް ފިޔަވަލުތަކަކާއެކު، އެކަން ޙައްލު ކުރައްވާ މުޅި ތަން ކޮންޓްރޯލު ކުރުމުގައި އިސް ދައުރެއް އަދާ ކުރައްވާފައިވަނީ މާލޭ ސިޓީގެ ހުޅުމާލެ އަށް ނިސްބަތްވެވަޑައިގަންނަވާ ކައުންސިލަރު، ޕީ.އެން.ސީ ގެ ނާއިބު ރައީސް އިބްރާޙިމް ޝުޖާޢު ކަމަށެވެ.
ފިޔަވަތީގެ މައްސަލަތައް ޙައްލު ކުރެއްވުމުގައި އިސްކޮށް މަސައްކަތް ކުރައްވާ އެކަމުގައި ދައުލަތުގެ ކަމާބެހޭ މުއައްސަސާތައް ހޭލައްވާލި އިބްރާހީމް ޝުޖާޢު އަކީ ހުޅުމާލޭގެ ރައްޔިތުންގެ ވޯޓުން އެ ދާއިރާގެ ރައްޔިތުން ތަމްސީލު ކުރެއްވުމަށް މާލޭ ސިޓީ ކައުންސިލަށް އެރައްޔިތުން އިންތިޚާބު ކުރައްވާފައިވާ ކައުންސިލަރު ކަން މަޖިލީހުގެ ކަމާބެހޭ ކޮމިޓީއަށް އެނގިވަޑައިނުގަތުމަކީ ހިތާމަ ހުރި ކަމެއް. އަދި އެމަނިކުފާނުގެ ދާއިރާއަށް ދިމާވަމުންދާ އެންމެހާ އިޖުތިމާޢީ މައްސަލަތައް ޙައްލުކުރެވުމުގައި އިބްރާހީމް ޝުޖާޢު ނަމޫނާ ދައްކަވާ، ކުރައްވަމުން ގެންދަވާ މަސައްކަތްޕުޅުތަކަށް މިކޯލިޝަން ފަޙުރުވެރިވަން.
– އިދިކޮޅު ކޯލިޝަނުން ބުނެފައިވެއެވެ.
އަދި ފިޔަވަތީގައި ރޯވެފައިވާ އަލިފާންގަނޑު ނިއްވާލުމުގައި ވެސް ދިވެހި ސިފައިންނާއި އެކު ޝުޖާވަނީ ޙަރަކާތްތެރި ވެވަޑައިގެންފައިކަމަށެވެ. އެވަގުތު އެފަދަ އަވަސް ފިޔަވަޅުތަކެއް ޝުޖާޢު އަޅުއްވާ އެ ތަނުގެ ތެރޭގައި ހިނގި ހަމަނުޖެހުންތައް ކޮންޓްރޯލު ކުރައްވާ ނަމޫނާ ދެއްކެވުމުގެ ސަބަބުން ދިވެހި ރައްޔިތުންގެ ނުރުހުން ސަރުކާރަށް އަމާޒުވެ، ފިޔަވަތީގައި ކުޑަކުދިން ބެލެހެއްޓުމުގެ ޒިންމާއާއި ޙަވާލުވެ ތިބި ސިޔާސީ ފަރާތްތަކަށް ފާޑުކިއުންތައް ގިނަވެ، ޝުޖާޢު އަށް ރައްޔިތުން ތަޢުރީފް ކުރުން ހަޖަމު ނުވެގެން ރައްޔިތުންގެ މަޖިލީހުގެ ކޮމިޓީއަކުން ފިޔަވަޅު އެޅުމަށް ނިންމާ ޝުޖާގެ މައްސަލަ އެލްޖީއޭ އަށް ހުށަހަޅުއްވަން ނިންމެވި ނަމަވެސް ޝުޖާޢުގެ ރައްޔިތުންނަށް ޚިދުމަތް ކުރުމުގައި ފަހަތަށް ނުޖެއްސޭނެކަމަށް އިދިކޮޅު ކޯލިޝަނުން ވަނީ ބުނެފައެވެ.
