އައްޑޫގައި އަންހެން ކުއްޖަކަށް ޖިންސީ ގޯނާކުރިކަމަށް ބުނާ ފުލުސް މީހާ ފުލުހުންގެ ވަޒީފާއިން ސަސްޕެންޑްކޮށްފިއެވެ.
ފުލުހުން ބުނީ އޭނާ ސަސްޕެންޑްކޮށްފައިވަނީ ކްރައިމް އެގެއިންސްޓް ޗިއުރެން ޑިޕާޓްމަންޓުން ބަލަމުންދާ މައްސަލައަކާއި ގުޅިގެން ސެޕްތެމްބަރު 16 ވަނަ ދުވަހުން ފެށިގެންކަމަށެވެ. އަދި އޭނާ ސަސްޕެންޑް ކޮށްފައިވަނީ މުސާރަ ނުލިބޭގޮތަށެވެ. ސަބް އިންނިސްޕެކްޓަރގެ މަޤާމުގައި ހުރި އެ ފުލުސް މީހާ ފުލުހުން ހައްޔަރުކޮށްފައިވަނީ، ކުޑަ ކުއްޖަކަށް ޖިންސީ ގޯނާކުރި މައްސަލާގައި އޭނާއަށް ފިޔަވަޅު އަޅާފައިނުވާތި އައްޑޫގެ ގިނަ ޢަދަދެއްގެ ރައްޔިތުން ނިކުމެ މުޒާހަރާ ކުރަން ފެށުމުންނެވެ. މި މުޒަހަރާތަކުގައި ފުލުހުން ބާރުގެ ބޭނުންކޮށްފައިވާކަމަށް ގިނަ ބަޔަކު ތުހުމަތުކުރެއެވެ. އަދި މިކަމުގެ ސަބަބުން ޢާންމުންގެ ގިނަ ބަޔަކަށް އަނިޔާވެސް ވެފައިވެއެވެ.
ފުލުސް މީހާ އުމުރުން 14 އަހަރުގެ އަންހެން ކުއްޖެއް، އެކުއްޖާގެ އުމުރުން 16 އަހަރާއި ހަމައަށް ޖިންސީ ގޯނާކޮށްފައިވާ ކަމުގެ ތުހުމަތުތަކެއް ވަނީ ކުރެވިފައެވެ. އަދި އެ ފުލުސް މީހާ އެގޭގެ ފާހަނާއިގައި ކެމެރާ ހަރުކޮށްގެން އެކުއްޖާގެ ވީޑިއޯކޮށް ބްލެކްމެއިލްވެސް ކޮށްފައިވާ ކަމަށް ވަނީ ތުހުމަތު ކުރެވިފައެވެ. މައުލޫމާތު ލިބިފައިވާ ގޮތުގައި އެ ފުލުސް މީހާ އަކީ ފޮރެންސިކް ޑިޕާޓްމެންޓުގައި މަސައްކަތް ކުރަމުންދާ ފަރާތެކެވެ.
