ނަޝީދުއަކީ ވަރަށް ގާތް ބޭފުޅެއް ކަމަށާއި އެހެންނަމަވެސް، ނަޝީދުއާއި ޚިޔާލުތަފާތުވާ ކަންތައްތަކެއް ހުރި ކަމުގައި، ޖުމުހުރީ ޕާޓީގެ ލީޑަރު ގާސިމް އިބުރާހިމް ވިދާޅު ވެއްޖެއެވެ.

އިއްޔެ ހަވީރު ކުނޫޒުގައި، ޖުމުހޫރީ ޕާޓީގެ ސިޔާސީ ހަރަކާތްތަކާ ގުޅޭގޮތުން ބޭއްވި ނޫސް ކޮންފަރެންސްގައި، ނަޝިދުއާއި ގާސިމްއާއި ދެބޭފުޅުން ގުޅުމާއި ގުޅޭގޮތުން ނޫސްވެރިޔަކު ކުރި ސުވާލަކަށް ޖަވާބު ދެއްވަމުން، ޖުމުހޫރީ ޕާޓީގެ ލީޑަރު އަދި ރައްޔިތުންގެ މާމިގިލީ ދާއިރާގެ މެމްބަރު ގާސިމް އިބުރާހިމް ވިދާޅުވީ، ރައީސް ނަޝީދާ ދޭތެރޭ އޮތިއްޔާ އޮތީ ޒާތީ ވިސްނުމުގައި ހުރި މައްސަލައެއް ކަމަށާއި، އެއީ ދެބޭފުޅުންނަށް ލިބިފަ ހުރި ތަޖުރިބާއާއި، ދުނިޔެވީ ކަންތައްތަކުގެ ވިސްނާގޮތާ ގުޅޭގޮތުން ހުރި ފަތާތެއް ކަމުގައެވެ.

ރައީސް ނަޝީދަކީ އެމަނިކްފާނު ގަބޫލު ނުކުރާ ބައެއް ކަންކަމަށް ވަރަށް ތާއީދު ކުރައްވާ ބޭއްފުޅެއްކަމުގައި ވިދާޅުވަމުން، އޭގެ އެއް މިސާލެއްގެ ގޮތުން ގާސިމް ފާހަގަ ކުރެއްވީ، ރައީސް ނަޝީދު ވާހަކަފުޅު ދައްކަވަން ފައްޓަވާއިރު، ހަމްދުސަނާ ކިޔުއްވުމާއި ދުރު ބޭފުޅެއްގެ ގޮތުގައެވެ. އަދި އެއީ ވަރަށް ކުރައްވާ ކަމެއް ނޫންކަމަށާއި، ކުރީގަ އެކަން އެއްގޮތަކަށްވެސް ނުކުރައްވާ ކަމުގައި ގާސިމް ވިދާޅުވިއެވެ.

އޭގެ މިސާލެއްގެ ގޮތުން އަޅުގަޑު ދަންނަވާލަފާނަން އެއް ވާހަކައެއް. ވާހަކަފުޅު ދައްކަވަން ފައްޓަވާއިރުވެސް ހަމްދު ސަނާ ކިޔުއްވުން އެއީ.. ވަރަށް ކުރުވާހަކައެއް.. ކުރީގަ އެމަނިކްފާނު ނުކުރައްވާނެ އެއްގޮތަކަށްވެސް. ފައްޓަވާނެ ބިސްމިއްލާހި ކިޔުއްވާފަ… އަޅުގަޑުމެން ދުވަހަކުވެސް ހަމްދު ސަނާއިން ނޫން ގޮތަކަށް ނުވަތަ ސަލަވާތުން ނޫން ގޮތަކަށް އަޅުގަޑު ނުފަށަން… އެއަކު ނުހިފަހައްޓަވާ އެމަނިކްފާނެއް… އަޅުގަޑު ނުދަންނަވަން އެއްގޮތަކަށްވެސް ނުކުރައްވާ ވާހަކައެއް…އެއީ އަޅުގަޑަށް ވަރަށް ބޮޑުކަމެއް އިގޭތޯ.

– ގާސިމް ވިދާޅުވިއެވެ.

މި ނޫސް ކޮންފަރެންސްގައި އިތުރަށް ވާހަކަ ދައްކަވަމުން ގާސިމް ވިދާޅުވީ ނަޝީދުއާއި އެމަނިކްފާނާ ދެބޭފުޅުންނަކީ ވަރަށް ގާތް ދެބޭފުޅުން ކަމަށާއި، ވަރަށް އެކުވެރި ދެބޭފުޅުން ކަމަށާއި، ސިޔާސީ ކަންކަންވެސް ބަދަލުވެގެން މިއައީ އެމަނިކްފާނާ ނަޝީދުއާއި ދެބޭފުޅުން ހަމަހަމާގައި ތިބެގެން ކަމުގައެވެ.

ގާސިމް ވިދާޅުވީ ބަދަލުވެގެން އައި ސިޔާސީ ކަންކަމުގައި އެންމެ ބޮޑު ރިސްކެއް ނެގީ ތިމަން މަނިކްފާނު ކަމަށް ނަޝީދު ވިދާޅުވާ ކަމަށާއި، އެހެންނަމަވެސް، ގާސިމް ވިދާޅުވީ ޖާނާއިމާލުން ގުރުބާންވެގެން އެމަނިކްފާނު ކުރެއްވި ކަމެއް ކުރެއްވީ ދިވެހި ބިމުގައި ހުންނަވައިގެން ކަމުގައެވެ. ނަޝީދު ކުރެއްވި ކަމެއް ކުރައްވާފައިވާނީ ގައުމުން ބޭރުގައި ހުންނަވައިގެން ކަމުގައެވެ. އަަދި ނަޝީދަށްވެސް އޭރުވެސް މާލީގޮތުން ދެވުނު އެހީތެރިކަމެއް ދެމުން އައި ކަމަށާއި، ޑީއާރުޕީގެ ނާއިބު ޒައީމަކަށް ހުންނަވައިގެންވެސް އެމްޑީޕީ ހިންގަން އޭރުވެސް ވަޑައިގެންނެވީ މަހަކު 50،000 ރުފިޔާ އެޕާޓީއަށް ދެއްވަމުން ކަމަށާއި، އަދި އޭގެ އިތުރަށް އެމްޑީޕީން ބޭއްވި ފުރަތަމަ ގައުމީ ޖަލްސާ ބޭއްވުމަށްވެސް 300،000 ރުފިޔާ ދެއްވި ކަމުގައިވެސް ގާސިމް ވިދާޅުވިއެވެ.