އެއްވެސް ގައުމެއްގެ މިލިޓަރީ ބަޔަކު ރާއްޖޭގައި ތިބުމަކީ އެއްވެސް އިރަކު ތާއީދު ކުރައްވާ ކަމެއް ނޫން ކަމަށާއި، އެހެންނަމަވެސް، އިންޑިއާ ސިފައިން ރާއާޖޭގަ ތިބިތަނެއް ފެނިވަޑައިގެންފައި ނުވާކަމަށް، ޖުމުހޫރީ ޕާޓީގެ ލީޑަރު، މާމިގިލީ ދާއިރާގެ މެމްބަރު ގާސިމް އިބުރާހިމް ވިދާޅުވެއްޖެއެވެ.
އެމަނިކްފާނު މިހެން ވިދާޅުވީ، ޖުމުހޫރީޕާޓީގެ ސިޔާސީ ހަރަކާތްތަކާ ގުޅޭގޮތުން މިއަދު ކުނޫޒުގައި ބޭއްވި ނޫސްވެރިންގެ ބައްދަލު ކުރެއްވުމެއްގައި ވާހަކަ ދައްކަވަމުންނެވެ.
މި ނޫސް ކޮންފަރެންސްގައި، އިންޑިއާ ސިފައިން ރާއްޖޭގެ ތިބުމާއި ގުޅޭގޮތުން ގާސިމްގެ ޚިޔާލުފުޅަކީ ކޮބައިތޯ ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ގާސިމް ވިދާޅުވީ، ރައީސް ޔާމިނުގެ ވެރިކަމުގައިވެސް، އިންޑިއާއޭ ޗައިނާއޭކިޔައިގެން އަޑުއަރުވައިގެން އުޅުނު ކަމަށާއި، މިހާރުވެސް އިންޑިއާއޭ ކިޔައިގެން ބަޔަކު މީހުން ވާހަކަ ދައްކާ ކަމަށާއި، ބަޔަކު މަގުމަޗަށް ނިކުމެ، މީހުން ލައްވާހާ ހަޅޭކަކީ ނުވަތަ ދައްކާވާހަކައަކީ އަދި ތެދެއް ނޫންކަމުގައެވެ. އަދި އެއީ ދޮގެކޭވެސް ނުދަންނަވާނެ ކަމަށާއި އެހެންނަމަވެސް އިންޑިއާސިފައިން ރާއްޖޭގަ ތިބިތަނެއް ލޮލުން ދެކެވަޑައިގެންފައި ނުވާ ކަމަށްވެ.
އަޅުގަޑުގެ ލޮލުން ދެކެފަކައެއް ނެތް އަދި، އަޅުގަޑު އައްޑުއަކަށްވެސް ނުދަން، އަޅުގަޑި ތިވިދާޅުވާ ލާމު އަތޮޅަކަށްވެސް ނުދަން އެމީހުން ތިބިތަން ބަލާކަށް، އަދި އަޅުގަޑު ނުދަން ހަނިމާދޫއަކަށްވެސް، އެހެންވީމަ އަޅުގަޑަށް ނުފެންނާތީ ނުފެންނަ ވާހަކަ މި ދެންނެވީ.
– ގާސިމް ވިދާޅުވިއެވެ.
ގާސިމް ވިދާޅުވި ގޮތުގައި، އެހެން އެއްވެސް ގައުމެއްގެ މިލިޓަރީ ބަޔަލު ރާއްޖެ އަރާ ފައިބައިގެން ބަނޑަހަ ޖަހައިގެން ތިބޭކަށް އެމަނިކްފާނު ރުހިވަޑައި ނުގަންނަވާނޭ ކަމުގައެވެ.
ގާސިމްގެ ވިދާޅުވި ގޮތުގައި، ރާއްޖޭގައި އެއްވެސް މިލިޓަރީ ބަޔަކު ތިބެގެން ރާއްޖޭގަ އޮތް އަމާންކަމާއި އިސްތިގުލާލާއި މިނިވަންކަން ގެއްލިގެންދާނެ ކުޑަވެސް، ކަމެއް އެއްވެސް ވެރިޔަކު ކުރާކަށް އެމަނިކްފާނު ޖާގަ ނުދެއްވާނެ ކަަށެވެ.
އަދި ގާސިމް ވިދާޅުވި ގޮތުގައި، ރައްޔިތުންގެ މަޖިލިހުގެ މެޖޯރިޓީ ވެރިކަން ކުރާ ޕާޓީއަކަށް ލިބިގެން ހިގައްޖެނަމަ ހަދާނީ ހަދާނެ ގޮތެއްކަން އޭރުވެސް ރައްޔިތުންގެ ގާތުގައި ވިދާޅުވީ އެސަބަބަށްޓަކާ ކަމަށެވެ.
މި ނޫސްވެރިންގެ ބައްދަލުވުމުގައި ގާސިމްވަނީ، އެޕާޓީން ވަކިވެ ވަޑައިގެން، އެމްއެންޕީ ހެއްދެވުމުގައި އިސްކޮށް ހަރަކާތްތެރި ވެވަޑައިގަންނަވަމުން ގެންދަވާ، ދަގެތީ ދާއިރާގެ މެމްބަރު ކާނަލް ނާޒިމްއަށާއި، ތިމަރަފުށީ ދާއިރާގެ މެމްބަރު އަބުދުﷲ ރިޔާޒަށް ވަރަށް ބޮޑަށް ފާޑު ވިދާޅުވެފައެވެ.
