ދިރިނޫޅެވޭ ވަރުގެ ކުދި ބިންކޮޅުކޮޅުގައާއި، ކުދިކުދި ފްލެޓްތަކުގައި ދިރިއުޅޭ ފަރާތްތަކަށް އެމީހުން އިޚްތިޔާރުކުރާ އެހެންތަނަކުން އެކަށީގެންވާ ވަރުގެ ގޯއްޗެއް ފޯރުވައިދޭނެކަމަށް ސަރުކާރުން ރައްޔިތުންނަށް ވެފައިވާ ވަޢުދު ފުއްދުމަށް، ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު މައްސަލައެއް ހުށަހަޅުއްވައިފިއެވެ.
ބޮންޑޭ ހުށަހެޅުއްވި މައްސަލައަކީ ދިރިނޫޅެވޭ ވަރުގެ ކުދި ބިންކޮޅުކޮޅުގައާއި، ކުދިކުދި ފްލެޓްތަކުގައި ދިރިއުޅޭ ފަރާތްތަކަށް އެމީހުން އިޚްތިޔާރުކުރާ އެހެންތަނަކުން އެކަށީގެންވާ ވަރުގެ ގޯއްޗެއް ފޯރުވައިދޭނެކަމަށް ސަރުކާރުން ރައްޔިތުންނަށް ވައުދުވެ ވައުދު ނުފުއްދާ މައްސަލަ އާއި މާލޭ ގެ އާބާދީ ތޮއްޖެހުމުގެ މައްސަލަތަކަށް ދާއިމީ ހައްލެއް ހޯދާދެއްވާނެ ކަމަށް ރައީސުލް ޖުމްހޫރިއްޔާ ވެފައިވާ ވައުދު ލަސްނުކޮށް ފުއްދާދިނުމަށް އެދި ގޮވާލައި ހުށަހެޅުއްވި މައްސަލައެވެ.
2018ގެ އެމްޑީޕީ މެނިފެސްޓޯގައި އަދި ސަރުކާރުގެ އެސް.އޭ.ޕީގައި ހިމެނޭ ސިޔާސަތުތަކުގައި ގޯތިގެދޮރުގެ ދަތިކަމާއި ބޯހިޔާވަހިކަމުގެ މައްސަލައަށް ހައްލު ހޯދައިދިނުމުގެ ގޮތުން، އާއިލާތަކަށް ދިރިނޫޅެވޭ ވަރުގެ ކުދި ބިންކޮޅުކޮޅުގައާއި، ކުދިކުދި ފްލެޓްތަކުގައި ދިރިއުޅޭ ފަރާތްތަކަށް އެމީހުން އިޚްތިޔާރުކުރާ އެހެންތަނަކުން އެކަށީގެންވާ ވަރުގެ ގޯއްޗެއް ފޯރުވައިދޭނެކަމަށް ބުނެފައިވާކަމަށް ބޮންޑޭގެ މައްސަލާގައި ބުނެފައިވެއެވެ.
މާލޭގައި އެކަށީގެންވާ ވަރުގެ ބިމެއް އޮވެ، ޢިމާރާތްކުރާނެ ތަނަވަސްކަން ނެތިފައިވާ ޢާއިލާތައް ދެނެގަނެ، އެފަރާތްތަކަށް ލުއިފަސޭހަކޮށް ގެ ޢިމާރާތްކުރެވޭނެ މަގު ހޯދައިދިނުން. ލުއިފަސޭހަކޮށް ގެ އިމާރާތްކުރެވޭނެ މަގު ހޯދައިދިނުމުގައި އެކަނިވެރި މައިންނަށް އިސްކަންދިނުމަށް ވެފައިވާ ވަޢުދު ފުއްދުމަށް އޭނާ ވަނީ ގޮވާލާފައެވެ.
މައްސަލަ ހުށަހެޅުއްވުމަށްފަހު ވާހަކަ ދައްކަވަމުން ބޮންޑޭ ވިދާޅުވީ މިމައްސަލަ މަޖިލީހަށް ބަލައި ގަތުމަށް ތާއީދު ކުރެއްވީވެސް މަދު މެމްބަރުންތަކެއްކަމަށެވެ. މިކަމުން ސަރުކާރުން ވެފައިވާ ވައުދުތައް ފުއްދަން ބޭނުންވާ ވަރު ހާމަވާކަމަށެވެ. އޭނާ ވިދާޅުވީ މާލޭގެރައްޔިތުން ގޮޑު ހޮވައިގެން ކައި ހަދާއިރު، މިކަމަށް ހައްލެއް ނުގެނެވޭކަމަށެވެ. މީހުން ދަތި ހާލުގައި ކުޑަކުޑަ ތަންތަން ކޮޅުގައި އުޅެމުންދާއިރު، މިކަން ސަރުކާރަށް ނުފެނޭކަމީ ކަންބޮޑުވާ ކަމެއްކަމަށެވެ.
