ރައްޔިތުންގެ މަޖިލިހުގެ ރައީސް މުހައްމަދު ނަޝީދުކަމަށް ގިނަ ބަޔަކު ގަބޫލުކުރާ އިތުރު ޓުވިޓަރ ހޭންޑްލްއެއް ސޯޝަލް މީޑިއާގައި ބޭނުން ކުރަން ފަށައިފިއެވެ.

މީގެ ކުރިންވެސް ފޭކް ޓުވިޓަރ އެކައުންޓުތައް ގެންގުޅުއްވާކަމަށް އެބަސްވެ ވަޑައިގެންފައިވާ، އަދި އެމަނިކްފާނު ގެންގުޅުއްވާ ފޭކް އެއް އެކައުންޓުން ރަސްމީކޮށްވެސް ސޯޝަލް މިޑިއާގައި ބައެއް ފަރާތްތަކަށް ޖަވާބު ދެއްވަމުން ގެންދަވާ ނަޝީދު މިހާރު ގެންގުޅއްވަން ފައްޓަވާފައިވާ "ފޭކް" އާ ޓުވިޓަރ ހޭންޑްލްކަމަށް ގިނަބަޔަކު ބުނާ ހޭންޑްލްއަކީ، @HKurusee އެވެ.

މި ޓުވިޓަރ ހޭންޑްލްއިން މިހާރު ގެންދަނީ ބަރުލަމާނީ ނިޒާމަށް ވަރަށް ބޮޑަށް ތާއީދުކޮށް އަދި ވެރިކަމުގެ އެހެން ނިޒާމުތަކާ އެނިޒާމާ ދެމެދު ހުރިތަފާތުތައް ހާމަކޮށް، އަދި ނަޝީދުގެ ސިޔާސީ ވިސްނުމަށްވެސް ވަރަށް ބޮޑަށް ތާއީދުކޮށް ޓުވީޓު ކުރަމުންނެވެ. އަދި މީގެ އިތުރުންވެސް، ކޯލިޝަން ސަރުކާރުގައި ތިބެން ނަޝީދު ބެނުންފުޅު ނުވާކަމަށް ގަބޫލުކުރެވޭ ގިނަ ބަޔަކާ ދެކޮޅަށް މި އެކައުންޓުން ގިިނަ ޓުވީޓުތަކެއް ކުރަމުންދާކަންވެސް ފާހަގަ ކޮށްލެވެއެވެ. ވަކީން ޚާއްސަކޮށް މި އެކައުންޓުން، ރައީސް އޮފީހުގެ ޗީފް އޮފް ސްޓާފް އަލީ ޒާހިރާ ދެކޮޅަށް މި ހަފްތާގައި ގިނަ ޓުވީޓުތަކެއް ކުރަމުންދާކަން ފާހަގަ ކޮށްލެވެއެވެ.

Former judges are confirming that they received calls from +9607774***

We all are waiting for the result of this litmus test.

He @alixahir really is not worth it, @ibusolih. Talk to Fazu. Her instincts are not bad. Make a decision soon.

— Hassan Kurusee (@HKurusee) September 5, 2021

@HKurusee ގެ ނަމުގައި ހިންގަމުންދާ ޓުވިޓަރ ހޭންޑްއިން ކުރަމުންދާ ޓުވީޓުތަކަށް ބަރޯސާކޮށް، އެއީ މަޖިލިސް ރައީސް މުހައްމަދު ނަޝީދުކަމަށް ބައެއް ފަރާތްތަކުން ދެކެމުންދާއިރު، ވެރިފައި ކޮށްފައިވާ، އަމިއްލަފުޅު ރަސްމީ ޓުވިޓަރ އެކައުންޓުގެ އިތުރުން އެލެކްސް އަހުމަދުގެ ނަމުގައި @anedhivehirajje ޓުވިޓަރ ހޭންޑްލް ގެންގުޅުއްވާކަމަށް އެ އެކައުންޓުން ޓުވީޓު ކުރައްވާ ނަޝީދުވަނީ ވިދާޅުވެފައެވެ.

"ދެން ކިތައް ފަހަރު ބުނެފިން މިއީ އަޅުގަނޑު ކެނެރީގޭ ނަޝީދުއޭ. އެލެކްސް އަކީ އަޅުގަނޑުގެ ނުރަސްމީ އެކައުންޓް،" މިދިޔަ އަހަރުގެ އޮގަސްޓް 14ގައި އެލެކްސް ޓުވިޓަރ ހޭންޑްލްއިން ނަޝީދުގެ ނަމުގައި ކޮށްފައިވާ ޓުވީޓެއްގައި ބުނެފައި ވެއެވެ.

Dhen kithah faharu bunefin mee Alhugadu Kenereygey Nasheed ey. Alex akee Alugadu genurasmee account.

— Alex Ahmed (@anedhivehirajje) August 14, 2020

ފޭކް ޓުވިޓަރ ހޭންޑްލްތަކެއް ގެންގުޅުއްވާކަމަށް، ވެރިފައި ކޮށްފައިވާ އަމިއްލަފުޅު ޓުވިޓަރ އެކައުންޓުން ނަޝީދު ވިދާޅުވެފައި ނުވިނަމަވެސް، @anedhivehirajje ޓުވިޓަރ ހޭންޑްލްއިން ކޮށްފައިވާ ގިނަ ޓުވީޓުތަކަކީ،  ނަޝީދުގެ ޓުވީޓުތައް ކަން އެހެން އެތައްގޮތަކުން ވަނީ ޔަގީން ކުރެވިފައެވެ. މި ޓުވިޓަރ ހޭންޑްލްއަކީ 2012 ވަނަ އަހަރުގެ އެޕްރިލް މަހުން ފެށިގެން ބޭނުންކުރަމުން އަންނަ އެކައުންޓަކަށް ވާއިރު، މި އެކައުންޓް މިހާރު 27 ހާސް މީހުންދަނީ ފޮލޯ ކުރަމުންނެވެ.

ނަޝީދު އެހެން ނަންނަމުގައި ޓުވިޓަރ އެކައުންޓްތައް ގެންގުޅޭކަމަށް އެތައް ބަޔަކު ތުހުމަތު ކުރަމުން ދާއިރު، ޝާފިއު ކިޔާ މީހެއްގެ ނަމުގައި އަޑު ބަދަލުކޮށްގެން، ކްލަބު ހައުސްގެ ބައެއް ފޯރަމްތަކުގައި ނަޝީދު ވާހަކަ ދައްކަވާކަމަށްވެސް ދާދިފަހުން ބައެއް ފަރާތްތަކުން ވަނީ ތުހުމަތު ކޮށްފައެވެ.

އެހެންނަމަވެސް މިކަން ނަޝީދުވަނީ ވެރިފައި ކޮށްފައިވާ އަމިއްލަފުޅު ޓުވިޓަރ އެކައުންޓުން ދޮގު ކޮށްފައެވެ.

Konmeves meehaku alhugadu ge namugai Clubhouse ga eba varah fithuna ufahdha. Alhugaduge hama ekani clubhouse account akee mohamednasheed ge namuga hadhaafa in account. Clubhouse ga e ee kaaku kameh neyge, mi kan saaf kohdhinun varah edhen

— Mohamed Nasheed (@MohamedNasheed) August 14, 2021

"ފޭކް" ޓުވިޓަރ ހޭންޑްލްތައް ގެންގުޅުމަކީ، ދުނިޔޭގެ ހުރިހާ ގައުމެއްގައިވެސް އާންމު ކަމެކެވެ. އެހެންނަމަވެސް، ރާއްޖޭގައި "ފޭކް" ޓުވިޓަރ ހޭންޑްލްތައް ގިނައިން ގެންގުޅެމުން އަންނަނީ ސިޔާސީ ފަރާތްތަކުންކަން ފާހަގަ ކޮށްލެވެއެވެ.

@HKurusee ގެ ނަމުގައި އޮޕަރޭޓް ކުރަމުންދާ އެކައުންޓަކީ ނަޝީދުގެ "ފޭކް" އެކައުންޓެއް ކަމަށް ގިނަބަޔަކުން ބުނަމުންދާ ބުނުން، އެ އެކައުންޓުންވެސް އަދި ނަޝީދުއާ ގުޅުންހުރި އެހެން ފަރާތަކުންވެސް އަދި މިހާތަނަސް ދޮގު ކޮށްފައެއް ނުވެއެވެ.